Thawj Pawg Thawj Tswj Hwm tsab Xov, Xya Hli Ntuj 2010
Cov Phooj Ywg uas Muaj Siab Ntseeg
Ib tug nqi zog zoo kawg uas tus Cawm Seej muab tau rau peb yog thaum nws hu peb ua nws “cov phooj ywg.” Peb yeej paub hais tias Nws hlub peb cov uas yog Leej Txiv Saum Ntuj Ceeb Tsheej cov me nyuam nrog txoj kev hlub uas zoo tag nrho. Txawm yog li ntawd los, rau lawv cov uas tau muaj siab ntseeg es rau siab nrog Nws ua Nws tej hauj lwm, Nws tseem muab lub npe zoo heev no tshwj tseg rau lawv. Tej zaum nej nco qab cov lus hauv phau Lus Qhuab Qhia thiab Kev Khi Lus tshooj 84: “Thiab kuv rov qab hais dua rau nej, kuv cov phooj ywg, vim txij no mus kuv yuav hu nej ua phooj ywg, tsim nyog uas kuv muab txoj lus txib no rau nej, kom nej thiaj rais los mus ua ib yam li kuv cov phooj ywg yav thaud kuv nrog lawv nyob ua ke, nrog lawv taug kev mus qhia txoj moo zoo yam muaj kuv lub hwj chim heev” (D&C 84:77).
Peb rais los mus ua Nws cov phooj ywg thaum peb sawv Nws cev mus ua hauj lwm pab lwm tus neeg. Nws yog tus yam ntxwv zoo tag nrho ntawm hom phooj ywg uas peb yuav tsum rais los mus ua. Nws tsuas xav kom tau qhov zoo tshaj plaws rau Nws Leej Txiv Saum Ntuj Ceeb Tsheej cov me nyuam xwb. Lawv tej kev siab yuav yog Nws tej kev zoo siab. Nws yeej tu siab rau lawv tej kev tu siab ib yam li yog Nws tej kev tu siab tiag, vim Nws tau them tus nqi rau lawv tej kev txhaum tag nrho tib si, Nws tau nyiaj lawv tej kev tsis zoo, tej teeb meem, thiab hnov tau lawv tej kev kho siab. Nws ua siab dawb paug ua tej no. Nws yeej tsis yuav nqi dab tsi rau Nws tus kheej li, tab sis muab tag nrho tej yeeb koob rau Nws Leej Txiv Saum Ntuj Ceeb Tsheej. Tus phooj ywg zoo tag nrho, Yexus Khetos, yeej ua siab dawb siab zoo muab kev zoo siab rau lwm tus.
Peb sawv daws uas tau khi lus thaum ua kev cai raus dej twb cog lus hais tias peb yuav ua raws li Nws tus yam ntxwv es ib leeg txaus siab ris ib leeg tej nra li uas Nws ua (saib Mauxiyas 18:8).
Ob peb hnub tom ntej no nej yuav muaj lub cib fim los ua ib tug phooj ywg rau Nws. Tej zaum yuav yog thaum nej taug ib txoj kev muaj plua av. Tej zaum yuav yog thaum nej zaum hauv ib tsheb ciav hlau. Tej zaum yuav yog thaum nej nrhiav chaw zaum hauv lub Koom Txoos ib pawg neeg ntseeg. Yog hais tias nej ntsia, ces nej yuav pom ib tug neeg ris ib lub nra hnyav heev. Tej zaum yuav yog ib nras kev tu siab los sis kev kho siab los sis kev chim siab. Tej zaum nej yuav pom tau thaum nej twb thov Vajtswv kom tus Ntsuj Plig muab qhov muag rau nej saib mus rau hauv tej siab thiab cog lus hais tias nej yuav pab tsa tej tes uas tsa tsis taus lawm xwb.
Cov lus teb rau nej cov lus thov Vajtswv tej zaum yuav yog ib tug phooj ywg, uas nej twb tsis tau pom ntev ntev los lawm, tab sis tam sim no nws ho xav tau kev pab es nej cia li xav txog nws thiab xav hais tias nws qhov teeb meem los yog nej qhov thiab. Tau muaj ib zaug li ntawd rau kuv thiab. Yeej muaj cov phooj ywg uas nyob deb deb heev thiab nco qab txhawb nqa kuv tau ntau xyoo lawm uas twb yog Vajtswv qhia rau lawv txog kuv lub nra es lawv thiaj li paub txog xwb.
Vajtswv cov yaj saub uas muaj sia nyob twb tau hais rau peb lawm kom ua cov phooj ywg uas muaj siab ntseeg es mus pab cov mej zeej uas hloov siab los ntseeg thiab mus pab cov uas tau txav mus deb lawm. Tej no peb yeej ua tau, thiab peb yeej ua tau yog hais tias peb nco ntsoov txog tus Cawm Seej. Thaum peb cev tes mus pab thiab mus pab ris lwm tus lub nra, tus Cawm Seej yeej nrog peb mus thiab. Nws yuav pab coj peb mus rau cov neeg uas xav tau kev pab. Nws yuav pab qhia peb kom peb paub hais tias lawv xav li cas. Thaum peb rau rau siab pab lawv, ces peb yuav tau qhov khoom plig uas qhia kom peb txawj paub tseeb hais tias Nws hlub lawv. Ces qhov no yuav ua rau peb muaj siab loj thiab muaj zog cev tes mus pab lwm tus ntxiv nrog kev ntseeg.
Ces ntev mus, thiab tas mus ib txhis, peb yuav muaj kev xyiv fab los ntawm qhov uas Nws yuav txais peb los ua Nws ib co phooj ywg uas muaj siab ntseeg. Kuv thov kom tau qhov koob hmoov ntawd rau peb sawv daws thiab rau cov neeg uas peb pab.
© 2010 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/09. Pub txhais lus Hmoob: 6/09. Kev txhais First Presidency Message, July 2010. Hmong. 09367 295