Cov Mus Xyuas tom Tsev tsab Xov, Xya Hli Ntuj 2010
Ntxiv Dag Zog rau tej Tsev Neeg thiab tej Vaj Tse
Ua tib zoo kawm tej ntaub ntawv no, thiab raws li qhov tsim nyog, nrog cov viv ncaus uas koj mus xyuas sib tham txog tej no. Siv cov lus nug kom pab ntxiv dag zog rau koj cov viv ncaus thiab kom thiaj nruab tau lub Koom Haum Niam Tsev tej kev coj ua rau hauv koj lub neej.
Los ntawm cov Vaj Lug Kub: Chiv Keeb 18:19; Mauxiyas 4:15; D&C 93:40; Moses 6:55–58
Pab Lwm tus Neeg Thaum Twg Muaj Cib Fim Pab
“Peb txhua tus nyias tsev neeg txawv nyias. Ib txhia tsev neeg muaj niam muaj txiv thiab muaj me nyuam tib si. Ib txhia khub niam txiv tsis muaj me nyuam nyob hauv tsev lawm. Coob tug mej zeej ntawm lub Koom Txoos tsis tau yuav poj niam los yog yuav txiv, thiab ib txhia kuj tau muaj me nyuam tiam sis sib nrauj lawm es nyob nws ib leeg niam txwv xwb. Lwm tus ho yog poj ntsuam los yog yawg ntsuam uas nyob lawv ib leeg xwb.
“Txawm hais tias peb tsev neeg zoo li cas lawm, peb sawv daws tseem ua hauj lwm ntxiv dag zog tau rau peb tej tsev neeg los yog pab lwm tus neeg ntxiv dag zog rau lawv tsev neeg.
“[Muaj ib zaug] kuv so hauv kuv ib tug txheeb ze tus ntxhais lub tsev nrog nws tsev neeg. Hmo ntawd ua ntej cov me nyuam mus pw, peb muaj tsev neeg hmo ua ke thiab nyeem vaj lug kub ua ke. Cov me nyuam txiv qhia txog Lihais tsev neeg thiab txog qhov uas nws hais kom nws cov me nyuam tuav rawv tus nqaj hlau, uas yog Vajtswv txoj lus. Thaum lawv tuav rawv tus nqaj hlau, ces lawv yuav puaj phais thiab yuav taug tau kev mus rau kev xyiv fab thiab kev zoo siab tag nrho. Yog tias lawv tso tseg tsis tuav tus nqaj hlau lawm, ces tej zaum lawv yuav poob deg hauv tus dej liam sim.
“Kom thiaj qhia txog tej no rau cov me nyuam, lawv niam ua txuj ua tus ‘nqaj hlau’ uas lawv yuav tsum tuav rawv, thiab lawv txiv ua txuj ua tus dab ntxwg nyoog, uas sim ntxias cov me nyuam tawm ntawm kev puaj phais thiab kev zoo siab. Cov me nyuam puav leej nyiam zaj dab neeg ntawd heev thiab lawv kawm saib nws tseem ceeb npaum li cas kom tuav rawv tus nqaj hlau. Tom qab zaj dab neeg los ntawm vaj lub kub ntawd, txog sij hawm rau tsev neeg thov Vajtswv ua ke. …
“Kev kawm vaj lug kub, tsev neeg hmo ua ke, thiab kev thov Vajtswv ua ib tse neeg puav leej yuav ntxiv dag zog rau tsev neeg. Peb yuav tsum siv txhua lub cib fim kom ntxiv dag zog rau tsev neeg thiab ib leeg txhawb nqa thiab pab ib leeg kom taug nraim txoj kev yog.”1
Barbara Thompson, tus pab cuam thib ob hauv Koom Haum Niam Tsev pawg thawj tswj hwm.
Peb Ua Tau Dab Tsi?
-
Muaj tej tswv yim dab tsi hais txog kev ntxiv dag zog rau tsev neeg thiab tej vaj tse uas koj yuav qhia tau rau koj cov viv ncaus? Thaum koj xav txog saib lawv xav tau kev pab li cas, tus Ntsuj Plig yuav muab tswv yim rau koj.
-
Koj yuav hloov tau tej yam uas koj saib ua tseem ceeb li cas lub hli no kom thiaj ntxiv dag zog rau koj tsev neeg thiab koj vaj tse zoo dua?
Los ntawm Peb zaj Keeb Kwm
Txij thaum chiv keeb los, lub Koom Haum Niam Tsev muaj txoj hauj lwm kom ntxiv dag zog rau tej tsev neeg thiab tej vaj tse. Tus Yaj Saub Yauxej qhia cov muam nyob ntawm ib lub rooj sab laj ntawm lub Koom Haum Niam Tsev hais tias, “Thaum nej mus txog tsev, tsis txhob hais lus saib tsis tau los yog siab nej tus txiv, tiam sis cia kev ua siab zoo, kev siab hlub, thiab kev hlub coj nej tej hauj lwm mus lawm tom ntej.”2
Thaum xyoo 1914 Thawj Tswj Hwm Joseph F. Smith qhia cov poj niam hauv lub Koom Haum Niam Tsev hais tias, “Nyob txhua qhov txhia chaw uas tib neeg tsis paub zoo los yog to taub zoo hais txog tsev neeg, … ces lub koom haum no nyob ntawd los yog nyob ze, thiab dhau los ntawm lawv tej txuj ci thiab tej kev tshoov siab uas lub koom haum no muaj, cov poj niam no npaj lawm qhia txog tej hauj lwm tseem ceeb no.”3
© 2010 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/09. Pub txhais ua lus Hmoob: 6/09. Kev txhais Visiting Teaching Message, Xya Hli Ntuj 2010. Hmong. 09367 295