Agtutubo
Agdadamo a Tao
Marigatanak a makarikna a pasetak ti ward. Kaak-akarmi la unay iti pamiliak iti sabali a pagilian. Addaan iti dakkel a grupo dagiti agtutubo ti ward nga immakaranmi, ngem daytoy ti umuna a gundaway nga agbalinak nga “agdadamo a tao.” Ti pagdaksanna ket masapul a sumrekak iti baro a pagadalan, ket immapay a dagus daytoy iti panunotko, “Asinonto ngata ti kagiddanko a mangan iti pangngaldaw?” Nalabit a makakitaakto iti maysa a tao a taga simbaan, ngem diak kayat ti dumursok nga umasideg a makilanglang iti sango ti lamisaan iti pangngaldaw, aglalo ta diak ammo no kayatdak a kagiddan a mangan wenno saan.
Ti umuna nga aldawko iti pagadalan ket kasla agpaut iti agnanayon. Iti kamaudiananna naguni ti kampana para iti pangngaldaw. Bayat ti naannad nga iseserrekko iti siled a panganan, nagkararagak iti Nailangitan nga Ama tapno tulongannak koma a makasarak iti maysa a tao nga am-ammok. Inlawlawko ti panagkitak no adda asino man a mabigbigko nga am-ammok. Awan uray maysa. Iti kasta napanak iti maysa a lamisaan iti adayo a suli ti panganan ket kinnanko ti pangngaldawko.
Idi agangay iti dayta nga aldaw kabayatan ti klasemi iti Matematika, nailasinko ti maysa nga am-ammok. Nakitakon ni David iti seminary iti dayta nga agsapa. Kiniddawna a kitaek ti iskediulko ket natakuatak nga agpadakami iti oras a mangan iti pangngaldaw. “Hoy, ayanmo kadi itay oras ti pangngaldaw?” kinunana.
“Nanganak iti adayo a suli ti panganan,” insungbatko.
“Ala ngarud, inton bigat umaykanto ket aggiddanta a mangan iti pangngaldaw,” kinunana.
Agyamanak iti managayat a Nailangitan nga Ama, a makaammo iti tunggal kasapulantayo ken sungbatanna ti tunggal maysa kadagiti kararagtayo. Agyamanak pay iti maysa a tao a natallugod a nangidiaya iti imana tapno makigayyem. Gagangay laeng nga awis ngem makaaramid iti napateg unay a banag.