Mensahe ti Umuna a Panguluen, Hulio 2010
Dagiti Napudno a Gagayyem
Maysa kadagiti naindaklan a pangpadayaw a mabalin nga ited ti Mangisalakan ket ti panangawagna kadatayo a “gagayyem.” Ammotayo nga ay-ayatenna iti naan-anay nga ayat ti amin nga annak ti Nailangitan nga Amana. Ngem para kadagiti napudno iti panagserbi Kenkuana, inlatangna daytoy naisangsangayan a pangawag. Malagipyo dagiti balikas manipud iti maika-84 a benneg ti Doktrina ken Katulagan: “Ket kunak manen kadakayo, gagayyemko, ta manipud ita awagankayon iti gagayyem, nasken unay nga itedko kadakayo daytoy a bilin, tapno agbalinkayo a kas kadagiti gagayyemko kadagidi aldaw a kaaddak kadakuada, nga agdaldaliasat a mangikasaba iti ebanghelio babaen ti bilegko” (DkK 84:77).
Agbalintayo a gagayyemna bayat ti panagserbitayo kadagiti dadduma nga agpaay Kenkuana. Isu ti naan-anay a pagwadan ti kita ti gayyem a nasken a pagbalinantayo. Tarigagayanna laeng ti pagsayaatan dagiti annak ti Nailangitan nga Amana. Ragsakna ti ragsakda. Mariknana mismo ti lidayda gapu ta Isu ti nagikaro iti amin a basbasolda, nga inawatna iti Bagina ti amin a saksakitenda, imbaklayna ti amin a parikutda, ken nariknana ti amin a panaggagarda. Nadalus dagiti gagemna. Saan nga agkalikagum iti pammigbig para iti Bagina ngem tapno mangted iti amin a dayag iti Nailangitan nga Amana. Ti perpekto a gayyem, ni Jesucristo, ket naan-anay a di managimbubukod iti panangiruknoyna iti ragsak kadagiti dadduma.
Tunggal maysa kadatayo a nakaaramiden iti katulagan iti panagbuniag ket nagkaritayo a sumurot iti pagwadanna a makipagbaklay iti imet ti tunggal maysa a kas Kenkuana (kitaen iti Mosiah 18:8).
Kadagiti sumaruno a sumagmamano nga aldaw maaddaankayonto iti adu a gundaway nga agbalin a maysa a gayyem Kenkuana. Mabalin a bayat ti pannagnayo iti natapok a dalan. Mabalin a bayat ti panagtugawyo iti lugan nga adda iti riles ti kalsada. Mabalin a bayat ti panagsapulyo iti maysa a lugar a pagtugawan iti kongregasion ti Simbaan. No agsipsiputkayo, makitayonto ti maysa a tao a mangibakbaklay iti nadagsen nga imet. Mabalin a maysa daytoy a dagensen ti liday wenno ladingit wenno sakit ti nakem. Mabalin a madlawyo laeng no nagkararagkayo tapno ikkannakayo ti Espiritu kadagiti mata a kumita iti puspuso ken nagkarikayo a mangitag-ay kadagiti ima a naidasay.
Ti sungbat iti kararagyo ket mabalin a rupa ti maysa a nabayagen a gayyem, maysa a diyo pay nakitkita iti uneg ti adu a tawen ngem kellaat a simken iti panunot ken pusoyo dagiti kasapulanna ket nariknayo a kasla dakayo mismo ti agkasapulan. Napasamaken dayta kaniak. Tinulongandak dagiti nabayagen a gagayyem a naggapu iti ballasiw taaw ken iti adu a tawen a nangtedda iti pammaregta idi a ti Dios laeng ti makaibaga kadakuada maipapan iti dagensenko.
Indawat kadatayo dagiti sibibiag a propeta ti Dios nga agbalintayo a napudno a gagayyem kadagiti um-umay iti Simbaan kas napasurot ken ispalentayo dagiti saan unay nga aktibo nga umad-adayon a miembro (ti Simbaan). Maaramidtayo daytoy, ket aramidentayonto daytoy no kanayon a laglagipentayo ti Mangisalakan. No dumanontayo a mangted iti tulong ken mangibaklay iti maysa nga imet, Isu ket danonennatayo. Iturongnatayonto kadagiti agkasapulan. Bendisionannatayonto a mangrikna iti marikriknada. No naganetgettayo kadagiti aramidtayo nga agserbi kadakuada, ad-adda met a maikkantayo iti sagut a makarikna iti ayatna para kadakuada. Daytanto ti mangted kadatayo iti tured ken pigsa a tumulong manen ken manen iti kinapudno.
Ken, iti kanito ken iti agnanayon, mariknatayonto ti ragsak ti pannakapasangbay iti ragup dagiti napupudno a gagayyemna. Ikararagak dayta a bendision para iti amin kadatayo ken para kadagiti pagserbiantayonto.
© 2010 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti First Presidency Message, July 2010. Ilokano. 09367 864
Panangisuro manipud iti Daytoy a Mensahe
Ad-adda a makiraman a napnuan pateg dagiti miembro ti pamilia no maidawat kadakuada a mangbirok iti maysa a banag bayat ti panagsapulda kadagiti nasantuan a kasuratan ken dagiti balikas dagiti propeta (kitaen iti Teaching, No Greater Call [1999], 55). Bayat ti panangbasam iti artikulo, kiddawem kadagiti miembro ti pamilia a lasinenda dagiti pagbatayan wenno prinsipio a mangtulongto kadakuada nga agbalin a maikari tapno maawaganda nga agbalin a gayyem ti Apo.
Dakamaten ti Teaching, No Greater Call: “No addaankayo iti ayat a kas ken ni Cristo, nasaysayaat a nakasaganakayonto a mangisuro iti ebanghelio. Maparegtakanto a mangtulong kadagiti dadduma a mangam-ammo iti Mangisalakan ken sumurot Kenkuana” (12). Lasinem manipud iti artikulo dagiti pagbatayan wenno prinsipio a makatulong kenka nga agbalin a nasaysayaat a home teacher. Ilawlawagmo dagitoy iti kaduam, ket sikakararag nga utobenyo no kasano ti agbalin a “napudno a gagayyem” kadagiti pagserbianyo.