Mensahe iti Visiting Teaching, Hulio 2010
Panangpapigsa kadagiti Pamilia ken Pagtaengan
Adalenyo daytoy a material, ken no maitutop, paglilinnawaganyo kadagiti kakabsat a babbai a sarungkaranyo. Usarenyo dagiti saludsod a pangtulong kadakayo a mangpapigsa kadagiti kakabsat a babbai ken mangaramid iti Relief Society kas naregta a paset ti bukodyo a panagbiag.
Manipud kadagiti Nasantuan a Kasuratan: Genesis 18:19; Mosiah 4:15; DkK 93:40; Moises 6:55–58
Panangpapigsa iti Tunggal Gundaway
“Tunggal maysa kadatayo ket saan nga agpapada ti kasasaadtayo iti pamilia. Adda dagiti pamilia nga addaan iti maysa nga ina ken ama nga addaan kadagiti annak iti pagtaengan. Adda dagiti agassawa a saanen a maaddaan kadagiti annak iti pagtaengan. Adu a miembro ti Simbaan ti saan pay a naasawaan, ket adda dagiti awan asawana a nagannak. Adda dagiti balo a babai wenno balo a lalaki nga agbibiag nga agmaymaysa.
“Ania man ti kasasaad ti pamiliatayo, makapagbibinnadang ti tunggal maysa kadatayo tapno mapapigsatayo dagiti bukodtayo a pamilia wenno makapagtitinnulongtayo iti panangpapigsa kadagiti dadduma pay.
“[Naminsan] a nakidagusak iti pagtaengan ti kaanakak a babai ken ti pamiliana. Iti dayta a rabii sakbay a naturog dagiti ubbing, nangangaykami iti ababa a family home evening ken nagsalaysay iti estoria iti nasantuan a kasuratan. Sinarita ti amada maipapan iti pamilia ni Lehi ken no kasano nga insurona dagiti annakna a masapul a kumpetda a nasayaat iti landok a pagkaptan [iron rod], a daytoy ti balikas ti Dios. Ti ikakapetda iti landok a pagkaptan [iron rod] ket mangpatalged kadakuada ken mangiturong kadakuada iti rag-o ken ragsak. No umibbetda iti landok a pagkaptan, adda peggad a malmesda iti narugit a danum ti karayan.
“Tapno maipakita daytoy kadagiti ubbing, ti ina ti nagbalin a ‘landok a pagkaptan’ [iron rod] a nasken a kaptenda, ken ti ama ti nagakem a sairo, a mangpadpadas a mangguyguyod kadagiti ubbing a mangyadayo manipud iti talged ken ragsak. Nagustuan dagiti ubbing ti estoria ket nasursuroda no kasano ti kapateg ti kumpet a naimbag iti landok a pagkaptan. Kalpasan ti pannakaisarita ti nasantuan a kasuratan, orasen para iti kararag ti pamilia. …
“Dagiti nasantuan a kasuratan, family home evening, ken kararag ti sangapamilia ket mangpapigsa kadagiti pamilia. Masapul nga alaentayo ti tunggal gundaway a mangpapigsa kadagiti pamilia ken agtitinnulongtayo tapno makapagtalinaedtayo iti umno a dalan.”1
Barbara Thompson, maikadua mammagbaga iti sapasap a panguluen ti Relief Society.
Manipud iti Pakasaritaantayo
Manipud idi rugina addaanen ti Relief Society iti pagrebbengan a mangpapigsa kadagiti pamilia ken pagtaengan. Insuro ni Propeta Joseph dagiti kakabsat a babbai iti umuna a miting ti Relief Society, “No agawidkayo, saanyo a pagsawsaw-an iti dakes wenno narusanger a balikas dagiti assawayo, ngem ketdi, padur-asenyo ti kinasayaat, kinaasi, ken ayat a kas paset dagiti aramidyo manipud itan.”2
Idi 1914 imbaga ni Presidente Joseph F. Smith kadagiti kakabsat a babbai ti Relief Society, “No adda man kinaignorante wenno agkurang ti pannakaawat maipanggep iti pamilia, … sidadaan daytoy a timpuyog wenno nakasagana latta, ken babaen kadagiti gagangay a talugading wenno pammaregta a naggapu iti timpuyog nakasaganada ken sidadaanda a mangted iti annuroten wenno pangiturong a maibatay kadagiti napapateg a pagrebbengan.”3
© 2010 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti Visiting Teaching Message, July 2010. Ilokano. 09367 864