Mensahe sang Unang Panguluhan, Hulyo 2010
Matutom nga mga Abyan
Isa sang halangdon nga mga pagdayaw nga mahimo ihatag sang Manluluwas amo ang tawgon kita bilang “mga abyan.” Nakahibalo kita nga ginapalangga Niya sing isa ka perpekto nga paghigugma ang tanan nga mga anak sang Iya Amay nga Langitnon. Pero para sadtong mga nangin matutom sa ila pag-alagad upod sa Iya, ginatigana Niya ining espesyal nga ngalan. Madumduman ninyo ang mga pulong gikan sa ika-84 nga seksyon sang Doctrine and Covenants kon sa diin ang Ginuo nagasiling sa mga santos, nga iya mga abyan—kay sugod karon pagatawgon Niya sila nga mga abyan—nga nagakadapat nga ihatag Niya sa ila ining kasuguan, nga mangin kasubong sila sang Iya mga abyan sang mga tinion nga Sia kaupod nila, nga nagapanglakaton sa pagwali sang ebanghelyo sa Iya gahum (tan-awa sa (D&C 84:77).
Kita mangin Iya mga abyan sa aton pag-alagad sa iban para sa Iya. Sia ang perpekto nga ehemplo sang sahi sang abyan nga dapat kita mangin. Luyag lamang Niya ang kon ano ang pinakamaayo para sa mga anak sang Iya Amay nga Langitnon. Ang ila kalipayan amo ang Iya kalipayan. Ginabatyag Niya ang ila mga kalisud kasubong nga Iya bangud ginbayaran Niya ang bili sang tanan nila nga mga kasal-anan, ginpas-an sa Iya kaugalingon ang tanan nila nga mga kahuyang, ginbatas ang tanan nila nga mga kabudlayan, kag nahangpan ang tanan nila nga mga handum. Ang Iya mga motibo putli. Wala sia nagapangita sang pagkilala para sa Iya kaugalingon kundi agud ihatag ang tanan nga himaya sa Iya Amay nga Langitnon. Ang perpekto nga abyan, si Jesucristo, bug-os nga di-makinaugalingon sa pagtanyag sang kalipay sa iban.
Ang tagsa sa aton nga naghimo sang kasugtanan sa pagbunyag nagpromisa nga sundon ang Iya ehemplo sa pagpas-an sang palas-anon sang isa kag isa kasubong sang ginhimo Niya (tan-awa sa Mosias 18:8).
Sa madason nga pila ka adlaw makaangkon kamo sang madamo nga mga kahigayunan nga mangin isa ka abyan para sa Iya. Ayhan ini samtang nagalakat kamo sa isa ka yab-ukon nga dalan. Ayhan ini samtang nagapungko kamo sa isa ka pang-publiko nga salakyan. Ayhan ini samtang nagapangita kamo sang pulungkuan sa isa ka miting sa Simbahan. Kon nagabantay kamo, makakita kamo sang isa ka tawo nga nagadala sang isa ka mabug-at nga palas-anon. Ayhan ini isa ka palas-anon sang kalisud ukon pag-isahanon ukon kalain sang buot. Mangin athagon lamang ini sa imo kon nagpangamuyo ka para sa Espiritu nga maghatag sa imo sang mga mata nga makakita sa sulod sang mga tagipusuon kag nagpromisa nga ibayaw ang mga kamot nga nagapalamuypuy.
Ang sabat sa inyo pangamuyo ayhan amo ang nawong sang isa ka madugay na nga abyan, isa nga wala ninyo makita sa madamo nga tinuig pero ang mga panginahanglan gulpi lang nagsulod sa inyo panghunahuna kag tagipusuon kag nabatyagan kasubong nga ang mga ini inyo kaugalingon. Natabo ina sa akon. Ang madugay na nga mga abyan nagdab-ot sa akon gikan sa malayo nga mga lugar kag madamo nga mga tinuig agud maghatag sang pagpaisog sa tion nga ang Dios gid lang ang sarang makasugid sa ila sang akon palas-anon.
Ang buhi nga mga propeta sang Dios nagpangabay sa aton nga mangin matutom nga mga abyan sa mga nagakadto sa Simbahan bilang mga hinaylo kag magsagop sa mga nagpalayo. Sarang naton mahimo ini, kag himuon naton ini kon pirme naton ginadumdom ang Manluluwas. Kon magdab-ot kita sa paghatag sang bulig kag sa pagpamag-an sang isa ka palas-anon, nagadab-ot Sia upod sa aton. Tuytuyan Niya kita sa ila nga mga nagakinahanglan. Bendisyunan Niya kita nga mabatyagan ang ila ginabatyag. Sa pagpadayon naton sang aton paghimakas nga mag-alagad sa ila, dugang pa gid nga hatagan kita sang dulot nga mabatyagan ang Iya pagpalangga para sa ila. Magahatag ina sa aton sang kaisog kag kusog sa padayon nga pagdab-ot nga may katutom.
Kag, sa panahon kag sa katubtuban, mabatyagan naton ang kalipay nga maabi-abi sa pagpakig-upod sa Iya matutom nga mga abyan. Nagapangamuyo ako sinang bugay para sa aton tanan kag para sa ila nga aton pagaalagaran.
© 2010 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/09. Petsa sang pagtugot sa paglubad: 6/09. Linubad sang First Presidency Message, July 2010. Hiligaynon. 09367 861
Pagtudlo gikan sa Sining Mensahe
Ang mga miyembro sang pamilya mas may huyog nga magpasakop sing mas makahuluganon kon ginapangabay sila sa pagpangita sang pila ka butang samtang nagasiyasat sila sang balaan nga mga kasulatan kag mga pulong sang mga propeta (tan-awa sa Teaching, No Greater Call [1999], 55). Samtang ginabasa ninyo ining artikulo, pangabaya ang mga miyembro sang pamilya nga tandaan ang mga prinsipyo nga makabulig sa ila nga mangin takos agud tawgon nga abyan sang Ginuo.
Ang Teaching, No Greater Call nagasiling: “Kon may Cristohanon ka nga gugma, mas mangin handa ka sa pagtudlo sang ebanghelyo. Mangin inspirado ka sa pagbulig sa iban nga kilalahon ang Manluluwas kag sundon Sia” (12). Pangitaa gikan sa artikulo ang mga prinsipyo nga makabulig sa imo nga mangin mas maayo nga home teacher. Hambali ang mga ini upod sa imo kaupod [companion], kag binagbinaga sing mainampuon kon paano mangin “matutom nga mga abyan” sa inyo mga ginaalagaran.