Mensahe sa Visiting Teaching, Hulyo 2010

Pagpabakod sang mga Pamilya kag mga Puluy-an

Tun-i ining balasahon, kag sa nagakaigo, hambali ini upod sa mga sister nga inyo ginabisita. Gamita ang mga pamangkutanon agud buligan kamo nga mapabakod ang inyo mga sister kag agud himuon ang Relief Society nga isa ka aktibo nga bahin sang inyo kaugalingon nga kabuhi.

Gikan sa Balaan nga mga Kasulatan: Genesis 18:19; Mosias 4:15; D&C 93:40; Moses 6:55–58

Pagpabakod sa Tagsa ka Kahigayunan

“Ang tagsa sa aton yara sa magkatuhay nga sitwasyon-pangpamilya. Ang pila ka mga pamilya may iloy kag amay nga may kabataan sa puluy-an. Ang pila ka mga mag-asawa wala na sang kabataan sa puluy-an. Madamo nga mga miyembro sang Simbahan wala sang bana ukon asawa, kag ang pila solo lang nga mga ginikanan. Ang iban mga balo nga nagapangabuhi sing isahanon.

“Wala sapayan kon ano man ang aton pamilya, ang tagsa sa aton sarang magtinguha agud mapabakod ang aton kaugalingon nga mga pamilya ukon magbulig sa pagpabakod sang iban.

“[Kaisa], nagtulog ako sa balay sang akon hinablos nga babayi kag sang iya pamilya. Sina nga gab-i antes ang kabataan magtulog, naghiwat kami sang isa ka malip-ot nga family home evening kag nagbasa sang isa ka sugilanon gikan sa balaan nga mga kasulatan. Ang ila amay nagsaysay parte sa pamilya ni Lehi kag kon paano niya gintudloan ang iya kabataan nga kinahanglan sila magkapyot sing hugot sa barandilya nga salsalon [iron rod], nga amo ang pulong sang Dios. Ang pagkapyot sing hugot sa barandilya nga salsalon magatipig sa ila nga luwas kag magatuytoy sa ila sa kalipay. Kon magbuya sila sa barandilya nga salsalon, may peligro nga malumos sila sa suba sang mahigko nga tubig.

“Agud ipakita ini sa kabataan, ang ila iloy amo ang nangin ‘barandilya nga salsalon’ nga kinahanglan nila kapyutan, kag ang ila amay amo ang nagpakunokuno nga yawa nga nagatinguha sa pagbutong sang kabataan palayo sa kaluwasan kag kalipay. Ang kabataan nanamian sang istorya kag nakatuon kon ano ka importante ang magkapyut sing hugot sa barandilya nga salsalon. Pagkatapos sang sugilanon gikan sa balaan nga mga kasulatan tion na para sa pangpamilya nga pangamuyo. …

“Ang balaan nga mga kasulatan, family home evening, kag pangpamilya nga pangamuyo magapabakod sang mga pamilya. Kinahanglan naton nga gamiton ang tagsa ka kahigayunan sa pagpabakod sang mga pamilya kag pagsakdag sang isa kag isa nga magpabilin sa husto nga dalan.”¹

Barbara Thompson, ikaduhang manuglaygay sa pangkabilugan nga panguluhan sang Relief Society.

Ano ang Sarang Naton Mahimo?

Ano nga mga ideya sa pagpabakod sang mga pamilya kag mga puluy-an ang inyo mapaambit sa inyo mga sister? Samtang ginabinagbinag ninyo ang ila indibidwal nga mga sirkumstansya, ang Espiritu sarang magdala sang mga ideya sa inyo panghunahuna.
Ano nga mga prayoridad ang sarang ninyo mailisan sini nga bulan agud mas mapabakod ang inyo kaugalingon nga pamilya kag puluy-an?

Gikan sa Aton Kasaysayan

Halin sa ginsuguran ang Relief Society gintulinan sa pagpabakod sang mga pamilya kag mga puluy-an. Ang Propetang si Joseph nagtudlo sa mga sister sang una nga miting sang Relief Society, “Sa inyo pagpauli, indi gid magbuya sang akig ukon masakit nga tinaga sa inyo mga bana, kundi, nga tugotan ang kaayo, kaluoy kag pagpalangga nga magpangibabaw sa inyo mga buluhaton sumugod karon.”²

Sang 1914 si Pangulong Joseph F. Smith naghambal sa mga sister sa Relief Society, “Kon sa bisan diin nga may kakulang sang kaalam ukon bisan kakulang sang paghangop nahanungod sa pamilya, … dira ini nga katilingban nagaluntad ukon mahapos malab-ot, kag paagi sa natural nga mga dulot kag inspirasyon nga yara sa katilingban ang mga ini handa sa pagpaambit sang mga panulin parte sining importante nga mga obligasyon.”³

© 2010 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/09. Petsa sang pagtugot sa paglubad: 6/09. Linubad sang Visiting Teaching Message, July 2010. Hiligaynon. 09367 861