Lamharon
Isa ka Lalantawon gikan sa Mas Mataas nga Lugar
Bilang isa ka lamharon may madamo ako nga mga oportunidad sa paghikot sang mga pagbunyag para sa minatay sa templo sang San Diego California. Bisan pa nga pirme ako may maayo nga eksperiyensya, isa ka pagbiyahe ang nagapangibabaw sa akon kaisipan.
Disesais anyos ako sadto, kag ang akon manghod nga babayi bag-o lang mag-12 kag magabiyahe sa una nga kahigayunan sa paghikot sang mga pagbunyag para sa minatay. Tungod iya ini una nga kahigayunan, nagpamat-od kami nga maglibot sa gwa sang templo pagkatapos namon.
Ang palibot sang templo may duha ka lalantawan sa isa ka lugar gani nagkadto kami didto. Tungod ang templo sang San Diego nahamtang sa tupad sang isa ka masako nga dalan, kon magtindog ka sa isa ka lalantawan, nagatamwa ka gid sa dalan.
Ang pagtindog sa mataas nga lugar sang templo sina nga adlaw naghatag sa akon sang bag-o nga panglantaw sa kabuhi. Nagatamwa ako sa kalibutan upod sang iya sini nagasinibad nga mga salakyan, nagaginutok nga mga balaklan, kag napuno sang kuris-kuris nga mga tanda sa dalan.
Sa amo sadto nga tion nga ang isa ka panghunahuna nagsulod sa akon kaisipan: “Indi mo luyag nga mangin kabahin sini; indi ini ang kahulugan sang kabuhi.” Natudloan gid ako nga ang katuyuan sang kabuhi amo ang magbalik agud magpuyo upod sang aton Amay nga Langitnon kag mangin kasubong sa Iya. Nahibaloan ko nga indi ko kinahanglan ang mga butang sang kalibutan agud matuman inang katuyuan.
Nagliso ako kag nagtulok sa matahum nga templo, kag nagapasalamat ako sa ihibalo parte sa ebanghelyo kag ang panglantaw nga ginhatag sini sa akon. Nahibaloan ko nga sa tunga sang magamo kag makatalagam nga kalibutan, nakakita ako sang mas mataas nga lugar nga matindugan.
Sang sina nga adlaw sa templo nagsaad ako sa akon Amay nga Langitnon nga pirme ako magatindog sa Iya tupad kag indi sa tupad sang kalibutan. Bisan ano pa ang ihaboy sang kalibutan sa aton, malampuwasan naton ini paagi sa pagtipig sang mga kasugtanan nga aton ginhimo kag sa pagtindog sa balaan nga mga duog (tan-awa sa D&C 87:8).