Mensahe sang Unang Panguluhan, Agosto 2010
Mga Bugay sang Templo
Madumduman ko pa sang gindala sang akon mga ginikanan ang amon pamilya sa bag-o lang gid matukod nga Swiss Temple, ang pinakauna sa Europa, agud mangin wala’y katapusan nga pamilya. Disesais anyos ako sadto kag kamanghuran sa apat ka kabataan. Ulolupod kami nga nagluhod sa altar agud mahugpong sa duta paagi sa gahum sang priesthood, upod ang isa ka matahum nga saad nga sarang kami mahugpong sa wala’y katapusan. Indi ko gid malimtan ining halandumon nga tion.
Sang bata pa dawsa nahalawhaw ako nga naggwa pa kami sa pungsod agud mahugpong bilang isa ka pamilya. Para sa akon simbolo ini sang paagi nga nagatabok ang buluhaton sang templo sa mga pungsod agud magdala sang wala’y katapusan nga mga bugay sa tanan nga nagapuyo sa duta. Ang mga templo sang Ang Simbahan ni Jesucristo sang mga Santos sa Ulihing mga Adlaw matuod nga ginpasad para sa benepisyo sang bilog nga kalibutan, wala’y sapayan sang nasyonalidad, kultura, ukon politikal nga huyog.
Ang mga templo isa ka di-mapukan nga saksi nga ang kaayo magapangibabaw. Si Pangulong George Q. Cannon (1827–1901), Unang Manuglaygay sa Unang Panguluhan, sadto nagsiling, “Ang tagsa ka pundasyon nga bato nga ginpahamtang para sa isa ka Templo, kag ang tagsa ka Templo nga nahuman … nagabuhin sang gahum ni Satanas sa duta, kag nagadugang sang gahum sang Dios kag sang Pagkadiosnon.”1
Samtang ang tagsa ka templo nagadugang sang impluwensya sang pagkamatarong sa duta, ang pinakadalagko nga mga bugay, siyempre, nagaabot sa ila nga nagatambong mismo sa templo. Didto nagabaton kita sang dugang nga kasanag kag ihibalo kag nagahimo sang sagrado nga mga kasugtanan nga, kon sundon, magabulig sa aton sa paglakat sa banas sang pagkadisipulo. Sa malip-ot, ang templo nagatudlo sa aton parte sa sagrado nga katuyuan sang kabuhi kag nagabulig sa aton nga maangkon ang aton matuod nga pisikal kag espirituhanon nga direksyon.
Apang, wala kita nagatambong sa templo nga para lamang sa aton mga kaugalingon. Sa tagsa ka tion nga nagasulod kita sa sining sagrado nga mga edipisyo, ginatungdan naton ang isa ka papel sa balaan, nagatubos nga buluhaton sang kaluwasan nga sarang mabaton sang tanan nga kabataan sang Dios bilang resulta sang Pagpasag-uli [Atonement] sang Bugtong nga Inanak sang Amay. Isa ini ka di-maiyaiyahon kag balaan nga pag-alagad kag isa nga nagatugot sa aton bilang mga mortal nga magpasakop sa mahimayaon nga buluhaton sang pagka-manluluwas sa Bukid sang Sion.
Sa mga nga indi makatambong sa templo sa karon sa ano man nga rason, ginapadasig ko kamo sa paghimo sang tanan sa inyo gahum agud makaangkon sang bag-o nga temple recommend. Ang temple recommend isa ka simbolo sang aton pagkamatinuohon kag determinasyon sa pag-alagad sa Ginuo. Isa ini ka simbolo sang aton pagpalangga sa Ginuo, tungod pareho sang gintudlo ni Jesus, “Ang nagahupot sang akon mga sugo kag nagatuman sa ila, sia amo ang nagahigugma sa akon; kag ang nagahigugma sa akon higugmaon sang akon Amay, kag ako magahigugma sa iya kag magapahayag sang akon kaugalingon sa iya” (Juan 14:21).
Samtang ang talan-awon sa kalibutan padayon nga nagatahum upod sining sagrado nga mga bilding nga ginkonsagrar sa Ginuo, akon pangamuyo nga himuon naton ang aton bahin sa pagdala sang langit nga mas malapit sa duta paagi sa pagkatakos sa pagkapot sang temple recommend kag sa paggamit sini. Sa paghimo naton sini, ang pagkamatarong matuod gid nga magdugang indi lamang sa aton mga kabuhi kag mga puluy-an kundi sa aton mga komunidad kag sa bug-os nga kalibutan.
© 2010 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/09. Petsa sang pagtugot sa paglubad: 6/09. Linubad sang First Presidency Message, August 2010. Hiligaynon. 09368 861
Pagtudlo gikan sa Sining Mensahe
Kalabanan sa mga tawo makatuon sing mas maayo kag makadumdom sing mas malawig kon ipresentar ninyo ang mga ideya nga nagagamit sang biswal nga mga bulig sangsa maghambal lang (tan-awa sa Teaching, No Greater Call [1999], 182). Sa tion sang leksyon, handai ang pagpakita sang litrato sang isa ka templo. Pagkatapos nga mabasa ang artikulo, hambali kon ngaa importante ang templo kay Pangulong Uchtdorf. Agdaha ang magagmay nga kabataan nga magdrowing sang isa ka larawan sang ila pamilya nga yara sa templo.
Ang Teaching, No Greater Call nagapahayag, “Paisoga yadtong inyo mga ginatudloan nga magpahamtang sang isa ukon mas madamo pa nga mga lalab-uton nga sarang magbulig sa ila nga ipangabuhi ang prinsipyo nga inyo gintudlo” (159). Maghanda sa pagbasa sang mensahe ni Pangulong Uchtdorf upod sa pamilya kag pag-agda sa mga miyembro sang pamilya nga magsulat sang isa ka personal nga lalab-uton nga magabulig sa ila nga magpadayon nga takos sa pagkapot kag paggamit sang isa ka temple recommend.