Mensahe sa Visiting Teaching, Agosto 2010

Pagpatubo sang Pagtuo kag Personal nga Pagkamatarong

Tun-i ining materyales, kag kon nagakabagay hambali ini upod sang kauturan nga babayi nga inyo ginabisita. Gamita ang mga pamangkot agud mabuligan kamo sa pagpabakod sang inyo kauturan nga babayi kag agud himuon ang Relief Society nga isa ka aktibo nga bahin sang inyo mismo kabuhi.

Litrato

Relief Society seal

Pagtuo • Pamilya • Pag-alagad

Gikan sa Balaan nga mga Kasulatan

Isaias 2:2–3; D&C 109:22–23; 110:8–10

Ang Aton Responsibilidad nga Mangin Takos sa Pagsimba sa Templo

“Ang mga kasugtanan nga aton ginahimo kaupod sang naangot nga mga ordinansa nga aton ginabaton sa templo mangin aton mga pasaporte agud makasulod sa presensya sang Dios. Ining mga kasugtanan nagapataas sa aton labaw pa sa masarangan sang aton kaugalingon nga gahum kag panglantaw. Nagahimo kita sang mga kasugtanan agud ipakita ang aton debosyon sa pagpasad sang ginharian. Kita mangin katawhan sang kasugtanan samtang nagapaidalom kita sa isa ka kasugtanan sa Dios. Ang tanan nga ginsaad nga mga bugay mangin aton paagi sa aton pagkatampad sa sining mga kasugtanan. …

“Ano ang sarang himuon sang kababayin-an sang Simbahan agud mabaton ang mga bugay sang templo?

“Paagi sa Iya mga propeta, ang Ginuo nagaagda sadtong mga wala pa makabaton sang mga bugay sang templo nga himuon ang kon ano nga kinahanglanon agud mangin takos sa pagbaton sang mga ini. Ginaagda Niya yadtong mga nakabaton na sining mga bugay nga magbalik sing masunson agud maangkon liwat ang eksperiyensya, sa pagpatubo sang ila panan-awon kag paghangop sang Iya wala’y katapusan nga plano.

“Magmangin takos kita sa pag-angkon sang isa ka temple recommend. Magkadto kita sa templo agud mahugpong ang aton mga pamilya sa wala’y katapusan. Magbalik kita sa templo sing masunson tubtob sa mahimo. Hatagan naton ang aton minatay nga mga himata sang oportunidad nga mabaton ang mga ordinansa sang pangkahitaasan. Magkalipay kita sa espirituhanon nga kusog kag sa bugna nga aton ginabaton samtang nagatambong kita sa templo sing masunson. Magmangin matutom kita kag maghimo kag magtipig sang mga kasugtanan sa templo agud mabaton ang bug-os nga mga bugay sang Pagpasag-uli.”¹

Silvia H. Allred, unang manuglaygay sa pangkabilugan nga panguluhan sang Relief Society.

Gikan sa Aton Kasaysayan

Si Pangulong Gordon B. Hinckley (1910–2008) nagtudlo nga ang Relief Society nagtubo tungod sang kaluyag sang kauturan nga babayi nga magsimba sa mga templo:

“Sa tion sang pagpatindog sang templo sa Kirtland ang kababayin-an gintawag agud pangpudpuron ang ila porselana nga mga pinggan agud isimpon sa dingding sang templo, nga masilakan sang adlaw kag sang bulan kag magaidlak agud patahumon ang hitsura sang bilding.

“Sadto nga panahon, sang may diutay kaayo nga kuwarta apang bugana nga pagtuo, ang mga trabahador naghatag sang ila kusog kag mga pagkabutang para sa pagpatindog sang balay sang Ginuo. Ang kababayin-an naghatag sa ila sang pagkaon, ang pinakamanami nga ila mahanda. Si Edward W. Tullidge nagreport nga samtang ang kababayin-an nagapanahi sang mga telon sang templo, si Joseph Smith, nga nagatan-aw sa ila, nagsiling, ‘Sisters, pirme gid kamo ‘ya handa. Ang kauturan nga babayi pirme gid una kag nagapanguna sa tanan nga maayong buhat. Si Maria una sa pagkabanhaw; kag ang kauturan nga babayi sa karon amo ang una sa pagtrabaho sa sulod sang templo.’ …

“Sa liwat sa Nauvoo, sang ginapasad ang templo, pila ka mga babayi ang nagtilingob agud maghimo sang biste para sa mga trabahador. Sa amo sini nga mga sirkumstansya nga ang baynte sa ila nagtipon sang Huwebes, 17 sang Marso 1842, sa ibabaw nga kuwarto sang tindahan sang Propeta.”² Sa amo sini nagsugod ang Relief Society.

Ano ang Akon Mahimo?

Ano nga suporta ang sarang ko matanyag agud buligan ang akon mga kauturan nga babayi nga maghanda kag magtambong sa templo?
Paano ko mapakita ang palanublion sang una nga kauturan nga babayi nga nagsakripisyo agud makabaton sang mga bugay sang templo?
Paano ko mabaton ang mga bugay sang templo?

© 2010 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/09. Petsa sang pagtugot sa paglubad: 6/09. Linubad sang Visiting Teaching Message, August 2010. Hiligaynon. 09368 861