Cov Hluas
Kev uas Nuam Yaj Pom Tau
Thaum kuv tseem hluas kuv muaj ntau lub cib fim mus ua kev cai raus dej hauv lub Tuam Tsev San Diego California tam cov neeg uas tau tag sim neej lawm. Txawm hais tias txhua zaus thaum kuv mus yeej zoo heev li, los muaj ib zaug uas ua rau kuv yeej nco ntsoov li.
Kuv muaj 16 xyoo, thiab kuv tus niam hluas nyuam qhuav muaj 12 xyoos thiab nov yog thawj thawj zaug uas nws mus ua kev cai raus dej tam cov neeg uas tau tag sim neej lawm. Vim hais tias zaum no yog nws thawj zaug xwb ces, wb txiav txim siab hais tias wb yuav mus taug kev ncig sab nraum zoov ntawm lub tuam tsev tom qab wb ua tiav lawm.
Nyob ib ncig ntawm lub tuam tsev muaj ob peb qho chaw nuam yaj, ces wb txawm taug kev mus rau tod. Vim hais tias lub Tuam Tsev San Diego nyob kiag ib sab ntawm txoj kev loj uas muaj tsheb coob heev, ces thaum yus sawv ntawm qhov chaw nuam yaj ntawd, yus pom tau mus rau hauv txoj kev loj.
Sawv ntawm lub tuam tsev uas nyob siab me ntsis ntawd hnub ntawd ces ua rau kuv saib kuv lub neej txawv me ntsis lawm. Kuv saib mus rau hauv lub ntiaj teb uas muaj tsheb nrov vij voog mus mus los los, tej taj laj uas muaj neeg coob coob, thiab tej paib tiv ntawm kev uas muaj neej muab khij muab kos ua dog ua dig tag.
Thaum ntawd thiaj li muaj ib qho kev xav los rau hauv kuv lub siab uas hais tias: “Koj yuav tsis xav koom nrog tej yam zoo li no; kev ua neej tsis yog li no.” Kuv yeej ib txwm kawm tau hais tias lub ntsiab ntawm lub neej no yog npaj rov qab mus nrog peb Leej Txiv Saum Ntuj Ceeb Tsheej nyob thiab coj kom tau zoo li Nws. Kuv yeej paub hais tias kuv tsis toob kas tej yam hauv ntiaj teb no los mus ncav tau lub hom phiaj ntawd.
Kuv tig los ntsia lub tuam tsev uas zoo nkauj heev ntawd, ces kuv zoo siab heev rau qhov kuv paub txog txoj moo zoo thiab qhov kev ua neej tshiab uas txoj moo zoo tau qhia rau kuv. Kuv paub hais tias txawm lub ntiaj teb muaj kev ntxhov siab thiab xwm txheej ntau, los kuv nrhiav tau ib qho chaw siab dua los sawv lawm.
Txij hnub uas kuv nyob ntawm lub tuam tsev ntawd los kuv cog lus rau kuv Leej Txiv Saum Ntuj Ceeb Tsheej hais tias kuv yuav sawv rau ntawm Nws tog txhua lub sij hawm es tsis sawv rau lub ntiaj teb sab li. Txawm hais tias muaj dab tsi hauv lub ntiaj teb los peb yeej yuav kov yeej yog tias peb ceev tej kev khi lus uas peb tau cog tseg thiab sawv rau tej chaw dawb huv (saib D&C 87:8).