Thawj Pawg Thawj Tswj Hwm tsab Xov, Yim Hli Ntuj 2010
Tej Koob Hmoov uas Tau hauv lub Tuam Tsev
Kuv tseem nco tau thaum kuv niam txiv coj peb tsev neeg mus rau lub Tuam Tsev Swiss, uas yog thawj thawj lub tuam tsev hauv Yus Lauv Teb Chaws, es coj peb tsev neeg mus ua kev cai sib khi kom thiaj nyob tau ua ke mus ib txhis li. Thaum ntawd, kuv muaj 16 xyoo thiab kuv yog tus tub ntxawg ntawm plaub tug me nyuam. Peb txhos caug rau ntawm lub thaj kom lawv thiaj muab tau peb sib khi ua ke hauv lub ntiaj teb no dhau los ntawm lub hwj chim ntawm lub pov thawj hwj, ua ke nrog txoj lus cog tseg hais tias txoj kev sib khi ua ke no yuav kav mus ib txhiab ib txhis thiab. Kuv yeej yuav nco qab ntsoov lub sij hawm zoo kawg nkaus ntawd.
Thaum kuv tseem yog ib tug me nyuam tub xwb kuv yeej xav tsis thoob li hais tias peb yuav tsum hla ciaj ciam teb chaws kom thiaj li muab tau peb tsev neeg sib khi ua ke. Qhov no ua tau ib lub cim txog tej kab ke hauv lub tuam tsev uas yeej hla tau ciaj ciam teb chaws kom thiaj li nqa tau tej koob hmoov los rau txhua tus neeg uas nyob hauv ntiaj teb. Cov tuam tsev ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yeej yog ua los rau txhua tus neeg hauv ntiaj teb tiag tiag li, txawm hais tias yog haiv neeg twg, coj tej kab lis kev cai twg, los yog tuaj tog tseev tsim twg.
Cov tuam tsev yeej ua tim khawv tsis tu tsis tseg li hais tias qhov zoo yeej yuav yeej xwb xwb. Thawj Tswj Hwm George Q. Cannon (1827–1901), tus Pab Cuam Thib Ib ntawm Thawj Pawg Thawj Tswj Hwm, muaj ib zaug tau hais tias, “Txhua lub pob zeb uas muab los teeb ua lub hauv paus rau ib lub Tuam Tsev, thiab txhua lub Tuam Tsev uas ua tau tiav lawm … yuav ua rau Ntxwg Nyoog lub hwj chim tsis muaj zog zuj zus hauv ntiaj teb, ces yuav ua rau lub hwj chim ntawm Vajtswv thiab tej yam uas zoo li Vajtswv muaj zog heev tuaj.”1
Txawm hais tias txhua lub tuam tsev yeej pab tau kom muaj ncaj ncees ntau dua hauv lub ntiaj teb, los cov neeg uas mus rau lub tuam tsev thiaj li yuav txais tau cov koob hmoov zoo tshaj plaws xwb. Nyob hauv peb thiaj txais tau kev kaj thiab kev txawj ntse thiab khi lus tseg, uas yog hais tias peb ua tau raws li ntawd tiag, ces thiaj li yuav pab peb los coj tau zoo li cov thwj tim. Tiag tiag, lub tuam tsev qhia peb txog saib lub ntsiab ntawm lub neej no yog dab tsi thiab lub tuam tsev pab taw kev rau peb taug, txawm yog hais txog peb lub neej hauv lub ntiaj teb no los yog peb sab ntsuj plig los yog.
Txawm yog li ntawd, peb tsis yog mus hauv lub tuam tsev rau peb tus kheej nkaus xwb. Txhua lub sij hawm uas peb nkag mus rau hauv tej tsev dawb ceev no, peb ua peb lub luag hauj lwm rau ntawm txoj kev pab cawm lwm tus neeg dim dawb huv uas muaj rau tag nrho Vajtswv cov me nyuam huv tib si vim yog Leej Txiv Tib Leej Tub txoj Kev Theej Txhoj. Txoj kev pab cawm hauv lub tuam tsev no yog ib yam dawb huv thiab ua pub dawb rau lwm tus neeg thiab yog ib yam uas cia peb cov neeg ntiaj teb no koom ua txoj hauj lwm yam muaj yeeb koob tiag kom ua tau neeg txhiv dim rau saum lub Roob Xi-oos.
Hais rau cov uas mus tsis tau rau hauv lub tuam tsev tam sim no txawm yog vim li cas los, kuv yaum kom nej ua txhua yam raws li nej ua tau kom tau daim ntawv tso cai nkag tuam tsev. Daim ntawv tso cai nkag tuam tsev yog ib lub cim qhia txog peb txoj kev ntseeg thiab kev rau siab los pab tus Tswv. Qhov no yog ib lub cim uas qhia txog peb txoj kev hlub rau tus Tswv, Yexus tau qhia hais tias, “Tus uas lees yuav kuv tej lus qhia, thiab ua raws li, tus ntawd yog tus uas muab siab npuab kuv: Kuv txiv yuav hlub tus uas muab siab npuab kuv. Kuv yuav hlub tus ntawd thiab qhib tus ntawd lub qhov muag kom nws pom kuv” (Yauhas 14:21).
Thaum lub ntiaj teb zoo nkauj zuj zus tuaj vim muab cov tsev dawb ceev uas muab fij tseg rau tus Tswv nyob hauv, kuv thov Vajtswv kom peb rau siab ua li peb ua tau kom rub tau lub ntuj ceeb tsheej los nyob ze me ntsis rau lub ntiaj teb thaum peb ua neej tsim nyog kom muaj ib daim ntawv tso cai nkag tuam tsev thiab siv daim ntawv ntawd. Thaum peb ua li ntawd, ces yeej yuav muaj kev ncaj ncees ntau dua tuaj tsis yog hauv peb lub neej thiab hauv tsev xwb, tab sis yuav muaj rau hauv peb tej koog zej zog thiab thoob plaws ntiaj teb.
© 2010 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/09. Pub txhais ua lus Hmoob: 6/09. Kev txhais First Presidency Message, August 2010. Hmong. 09368 295
Qhia los ntawm tsab Xov No
Cov neeg feem coob yuav kawm tau zoo dua thiab nco qab tej yam no ntev dua thaum koj qhia tej tswv yim siv duab thiab lwm yam uas lawv pom tau, tsis yog hais lus xwb (saib Teaching, No Greater Call [1999], 182). Thaum qhia zaj lus no, tej zaum yuav tsum muab ib daim duab txog lub tuam tsev rau lawv saib. Tom qab nyeem zaj lus no tas, ces sib tham saib yog vim li cas lub tuam tsev thiaj tseem ceeb rau Thawj Tswj Hwm Uchtdorf. Caw cov me nyuam yau hauv tsev neeg kom lawv kos ib daim duab txog lawv tsev neeg nyob ntawm lub tuam tsev.
Teaching, No Greater Call hais tias “Yaum kom cov neeg uas koj qhia cuab ib los sis ob peb lub hom phiaj kom pab lawv ua neej raws li txoj ntsiab cai uas koj nyuam qhuav qhia tas” (159). Xav saib puas tsim nyog nyeem Thawj Tswj Hwm Uchtdorf zaj lus ua ke nrog rau tsev neeg thiab caw kom cov neeg hauv tsev neeg cuab ib lub hom phiaj tseg kom pab tau lawv ua neej tsim nyog los muaj thiab siv tau daim ntawv tso cai nkag tuam tsev.