Cov Mus Xyuas tom Tsev tsab Xov, Yim Hli Ntuj 2010

Kom Muaj Kev Ntseeg thiab Kev Ncaj Ncees ntawm tus Kheej Ntau Dua

Ua tib zoo kawm tej ntaub ntawv no, thiab raws li qhov tsim nyog, nrog cov viv ncaus uas koj mus xyuas siab tham txog tej no. Siv cov lus nug kom pab ntxiv dag zog rau koj cov viv ncaus thiab kom thiaj nruab tau lub Koom Haum Niam Tsev tej kev coj ua rau hauv koj lub neej.

Daim Duab

Relief Society seal

Kev Ntseeg • Tsev Neeg • Kev Pab

Los ntawm cov Vaj Lug Kub

Yaxayas 2:23; D&C 109:22–23; 110:8–10

“Yog Peb lub Luag Hauj Lwm uas Peb Yuav Tsum ua Neej Kom Tsim Nyog Ua tej Kab Ke Hauv lub Tuam Tsev

“Tej kev khi lus uas peb tau khi nrog rau tej kab ke uas peb tau txais hauv lub tuam tsev yuav los pab peb mus tau rau ntawm Vajtswv. Tej kev khi lus no tsa peb kom nyob siab me ntsis ntawm peb lub hwj chim thiab qhov uas peb pom tau. Peb muaj tej kev khi lus no kom thiaj qhia tau tias peb yeej muaj siab los txhim tsa lub nceeg vaj. Peb los ua cov neeg khi lus thaum peb los khi lus rau ntawm Vajtswv. Tag nrho cov lus uas tau cog tseg lawm yuav yog peb li yog tias peb muaj siab ntseeg ua raws li tej kev khi lus no. …

“Cov poj niam ntawm lub Koom Txoos yuav ua li cas thiaj li yuav tau cov koob hmoov ntawm lub tuam tsev?

“Dhau ntawm Nws cov yaj saub, tus Tswv caw cov uas tseem tsis tau txais cov koob hmoov ntawm lub tuam tsev kom ua txhua yam raws li ua tau kom thiaj li tsim nyog los txais tej koob hmoov. Nws caw cov uas twb tau txais cov koob hmoov no lawm kom rov qab mus ntau li ntau tau kom thiaj rov qab muaj qhov kev zoo no, kom lawv thiaj li pom zoo dua thiab to taub ntxiv txog Nws txoj hau kev nyob mus ib txhis.

“Cia peb ua lub neej kom tsim nyog muaj ib daim ntawv tso cai nkag tuam tsev uas zoo siv. Cia peb mus rau hauv lub tuam tsev es muab peb tsev neeg sib khi ua ke nyob mus ib txhis. Cia peb rov qab mus rau hauv lub tuam tsev ntau li ntau tau. Cia peb muab lub cib fim rau peb cov neeg ua tau tag sim neej lawm los txais tej kab ke ntawm txoj kev tsa nto. Cia peb los muaj kev xyiv fab rau txoj kev ntxiv dag zog ntawm sab ntsuj plig thiab kev tshwm sim uas peb tau los thaum peb ib sij mus ib zaug hauv lub tuam tsev. Cia peb muaj siab ntseeg thiab ua raws li thiab ceev tej kev khi lus kom peb thiaj li txais tau tag nrho tej koob hmoov ntawm txoj Kev Theej Txhoj.”¹

Silvia H. Allred, tus pab cuam thib ntawm lub Koom Haum Niam Tsev pawg tuam thawj tswj hwm.

Los ntawm Peb zaj Keeb Kwm

Thawj Tswj Hwm Gordon B. Hinckley (1910–2008) tau qhia hais tias lub Koom Haum Niam Tsev yog muaj los ntawm cov viv ncaus uas xav teev tiam hauv tej tuam tsev:

“Thaum pib txhim tsa lub tuam tsev hauv Kirtland, cov thawj coj tau hais rau cov poj niam kom muab lawv tej twj taig zoo nkauj uas yog muab av puab los zom mos mos los xyaw nrog rau cov hmoov pob zeb kom thiaj li siv tau los ua tej pob ntsa ntawm lub tuam tsev, ua li no kom thaum lub hnub thiab lub hli ci tuaj ces thiaj ci ci kom lub tsev thiaj li zoo nkauj.

“Thaum lub sij hawm ntawd, uas tsis tshua muaj nyiaj ntau tab sis muaj kev ntseeg loj heev, cov txiv neej siv dag zog thiab kev paub los mus ua tus Tswv lub tsev. Cov poj niam ua zaub mov zoo raws lawv txawj ua tau rau cov txiv neej noj. Edward W. Tullidge tau qhia hais tias thaum cov poj niam tseem tab tom xaws cov ntaub thaiv rau lub tuam tsev, Yauxej Xamiv, uas saib lawv ua, tau hais li no hais tias, ‘Cov muam, nej mas yeej npaj tau txhua lub sij hawm los ua hauj lwm li. Cov viv ncaus yeej yog cov uas xub los ua thiab rau siab ua txhua yam hauj lwm uas zoo. Maiv Liag twb yog thawj twg uas pom qhov kev sawv rov qab los; ces tam sim no cov viv ncaus twb ho yog cov uas xub ua cov hauj lwm rau sab hauv ntawm lub tuam tsev.’ …

“Rov qab muaj ib zaug ntxiv dua hauv Nauvoo thiab, thaum kho lub tuam tsev, ob peb tug poj niam twg yog cov uas los xaws cov tsho rau cov txiv neej uas ua tsev hnav. Twb yog pheej muaj tej kev sib pab li no ces nees nkaum tus poj niam thiaj li sib sau ua ke rau hnub Thursday, lub Peb Hli Ntuj hnub tim 17 xyoo 1842, hauv ib chav tsev uas nyob xab saud ntawm tus Yaj Saub lub taj laj.” Ces lub Koom Haum Niam Tsev Pib lawm lau

Peb Yuav Ua Tau Dab tsi?

Kuv yuav ua li cas thiaj li pab tau kuv cov viv ncaus npaj thiab mus rau hauv lub tuam tsev?
Kuv yuav ua li cas thiaj li coj tau tus yam ntxwv zoo li cov viv ncaus thaum ub uas muaj kev txi es thiaj li txais tau tej koob hmoov ntawm lub tuam tsev?
Kuv yuav ua li cas thiaj txais tau tej koob hmoov ntawm lub tuam tsev?

© 2010 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/09. Pub txhais ua lus Hmoob: 6/09. Kev txhais Visiting Teaching Message, August 2010. Hmong. 09368 295