Mensahe ti Umuna a Panguluen, Agosto 2010
Dagiti Bendision iti Templo
Malagipko pay laeng idi intugot dagiti nagannak kaniak ti pamiliami iti kaipatpatakder a Templo ti Swiss, ti kaunaan iti Europa, tapno agbalin nga agnanayon a pamilia. Agtawenak idi iti 16 ken ti kaubingan iti uppat nga annak. Nagparintumengkami a sangkamaysa iti altar tapno mailantip iti daga babaen ti bileg ti priesthood, nga addaan nakakaskasdaaw a kari a mabalinmi ti mailantip para iti kinaagnanayon. Diakto pulos malipatan daytoy nakaskasdaaw a kanito.
Kas ubing a lalaki naawis bassit ti riknak gapu ta bimmalasiwkami iti nagbedngan ti pagilian tapno mailantip a kas maysa a pamilia. Para kaniak isimbolo daytoy ti wagas a pakapagballasiwan ti aramid iti templo kadagiti beddeng ti lubong tapno maidanon dagiti agnanayon a bendision kadagiti amin nga agindeg iti daga. Dagiti templo ti Ti Simbaan ni Jesucristo dagiti Santo iti Ud-udina nga Aldaw ket pudno a nabangon para iti pagsayaatan ti amin a lubong, ania man iti nasionalidad, kultura, wenno posision iti pulitika.
Dagiti templo ket napakumbaba a saksi a ti kinaimbag ti mangrimbaw. Ni Presidente George Q. Cannon (1827–1901), Umuna a Mammagbaga iti Umuna a Panguluen, naminsan a kinunana, “Tunggal pamuon a bato a naipan iti maysa a Templo, ken tunggal Templo a naileppas … ket mangkissay iti bileg ni Satanas iti daga, ken mangnayon iti bileg ti Dios ken Kinadiosan.”1
Bayat ti inanayon ti impluensia ti kinalinteg iti daga ti tunggal templo, ti kaindaklan a bendision, siyempre, ket sumangbay kadagiti pudno a dumardar-ay iti templo. Sadiay maawattayo ti nayon a lawag ken pannakaammo ken agaramid kadagiti napasnek a katulagan a, no matungpal, tumulong kadatayo a magna iti dalan iti kinadisipulo. Iti ababa a pannao, ti templo ket mangisuro kadatayo maipanggep iti sagrado a panggep ti biag ken tulongannatayo a makasarak kadagiti naindagaan ken naespirituan a turongen.
Nupay kasta, saantayo a dumar-ay iti templo para iti bagbagitayo laeng. Tunggal kanito a sumrektayo kadagitoy sagrado a pasdek, addaantayo iti napateg nga akem iti nasagraduan, pangsubbot nga aramid ti pannakaisalakan a sidadaan a magun-od ti amin nga annak ti Dios a kas bunga ti Pannubbot ti Bugbugtong nga Anak ti Ama. Daytoy ket saan a managimbubukod ken sagrado a panagserbi ken mangpalugod kadatayo kas mortal a makiraman iti nagloriaan nga aramid ti panagbalin a mangisalakan iti Bantay Sion.
Para kadagiti saan a makadar-ay iti templo ita iti ania man a gapu, allukoyenkayo nga aramidenyo ti amin a kabaelanyo a mangikut wenno maaddaan iti agdama a rekomenda ti templo. Ti rekomenda ti templo ket maysa a simbolo iti kinapudno ken kinapasnektayo nga agserbi iti Apo. Simbolo daytoy ti panagayattayo iti Apo, a kas iti insuro ni Jesus, “Ti addaan kadagiti bilbilinko ket tungpalenna, ida isu dayta ti agayat kaniak, ket ti agayat kaniak, ayatento ni Amak, ken isu ayatekto, ket agparangakto kenkuana” (Juan 14:21).
Bayat ti agtultuloy a panagbalin a napintas ti lubong gapu kadagitoy sagrado a pasdek a naidaton iti Apo, ikararagko nga aramidentayo koma ti pasettayo a mangyas-asideg iti langit iti daga babaen iti panagbalin a maikari nga agikut iti rekomenda ti templo ken panangusar iti daytoy. Bayat ti panangaramidtayo iti daytoy, awan duadua nga umad-adunto ti kinalinteg saan laeng iti panagbiagtayo ken kadagiti pagtaengantayo no di ketdi pay kadagiti komunidadtayo ken iti intero a lubong.
© 2010 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti First Presidency Message, August 2010. Ilokano. 09368 864
Panangisuro manipud iti Daytoy a Mensahe
Kaaduanna a tattao ti ad-adda a makasursuro ken makalagip a napapaut no idatagyo dagiti kapanunotan a mangaramat kadagiti visual aids ngem iti panangisarita laeng (kitaen iti Teaching, No Greater Call [1999], 182). Bayat ti panagadal, ibilang ti panangipakita iti ladawan ti templo. Kalpasan ti panangbasa iti artikulo, ilawlawag no apay a napateg ti templo ken ni Presidente Uchtdorf. Awisen dagiti in-inaudi nga ubbing iti pamilia a mangidrowing iti maysa a ladawan ti pamiliada iti templo.
Ibaga ti Teaching, No Greater Call,“Allukoyenyo dagiti sursuruanyo a mangilatang iti maysa wenno ad-adu pay a panggep a tun-oyen a makatulong kadakuada a mangtungpal iti pagbatayan nga insuroyo” (159). Ibilang a basaen ti mensahe ni Presidente Uchtdorf iti pamilia ken mangawis kadagiti miembro ti pamilia nga isuratda ti bukodda a panggep a tun-oyen a mangtulong kadakuada nga agtalinaed a maikari nga agikut ken mangusar iti rekomenda ti templo.