Mensahe iti Visiting Teaching, Agosto 2010
Mangpadur-as iti Pammati ken Bukod a Kinalinteg
Adalenyo daytoy a material, ken no mayannatup ilawlawagyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset iti bukodyo a biag.
Pammati• Pamilia • Serbisio
Manipud kadagiti Nasantuan a Kasuratan
Ti Pagrebbengantayo nga Agbalin a Maikari iti Panagdaydayaw iti Templo
“Dagiti katulagan nga aramidentayo a karagpin dagiti ordinansa a maawattayo iti templo ket agbalin a kredensialtayo tapno maawattayo iti sidong ti Dios. Ital-onatayo dagitoy a katulagan iti labes dagiti pagpatinggaan ti bukodtayo a bileg ken pannirigan. Agaramidtayo kadagiti katulagan tapno ipakitatayo ti kinapasnektayo a mangbangon iti pagarian. Agbalintayo a tattao iti katulagan bayat ti pannakitulagtayo iti Dios. Kukuatayo amin a naikari a bendision babaen ti kinapudnotayo kadagitoy a katulagan. …
“Ania ti mabalin nga aramiden dagiti babbai ti Simbaan tapno matagikuada dagiti bendision ti templo?
“Babaen dagiti propetana, awisen ti Apo dagiti saan pay a nakaawat kadagitoy a bendision ti templo nga aramidenda aniaman ti mabalin a kasapulan tapno maikarida nga umawat kadagitoy. Awisenna dagiti nakaawaten kadagitoy a bendision nga agsubli a masansan agingga a mabalin tapno agrag-oda manen iti padas, tapno manayonan ti pannirigan ken pannakaawatda kadagiti agnanayon a planona.
“Agbalintayo koma a maikari a maaddaan iti agdama a rekomenda ti templo. Mapantayo iti templo tapno ilantip dagiti pamiliatayo iti agnanayon. Agsublitayo koma iti templo a masansan no ipalubos dagiti pasamak. Mangtedtayo koma kadagiti natay a kakabagiantayo iti gundaway a makaawat kadagiti ordinansa ti pannakaital-o. Agrag-otayo iti naespirituan a pigsa ken iti paltiing nga awatentayo bayat ti idadar-aytayo a kanayon iti templo. Agbalintayo koma a napudno ken agaramid ken agtungpal kadagiti katulagan tapno maawattayo ti sibubukel a bendision ti Pannubbot.”1
Silvia H. Alldred, umuna a mammagbaga iti sapasap a panguluen ti Relief Society.
Manipud iti Pakasaritaantayo
Ni Presidente Gordon B. Hinckley (1910-2008) insurona a dimmur-as ti Relief Society gapu ti tarigagay dagiti kakabsat a babbai nga agdaydayaw kadagiti templo:
“Bayat ti pannakaipatakder ti Templo ti Kirtland naawagan dagiti babbai tapno manggiling wenno mangpapino kadagiti porselana a mailaok kadagiti plaster a mausar kadagiti diding ti templo, a pakausaran ti lawag ti init ken bulan ken manganninaw dayta a lawag a mangpapintas ti langa ti pasdek.
“Kadagita a panawen, idi adda bassit laeng a kuarta ngem adda aglapusanan a pammati, inted dagiti agtartrabaho ti pigsada ken pamataudan para iti pannakabangon ti balay ti Apo. Inyegan ida dagiti babbai iti taraon, ti kasayaatan a taraon a maisaganada. Ni Edward W Tullidge imbagana a bayat ti panagdait dagiti babbai kadagiti belo ti templo, ni Joseph Smith a mangpalpaliiw kadakuada, kinunana, ‘Nasayaat, kakabsat a babbai, addakayo a kanayon a sidadaan. Kanayon nga umun-una ken kangrunaan dagiti kakabsat a babbai iti amin a nasayaat nga aramid. Ni Maria ti immuna iti panagungar; ken dagiti kakabsat a babbai ita ti immun-una a nagtrabaho iti uneg ti templo.’ …
“Manen iti Nauvoo, idi agdama a maipatpatakder ti templo, sumagmamano a babbai ti sangkamaysa a timmipon tapno agaramid kadagiti aruaten para kadagiti agtartrabaho. Kadagitoy a pasamak a duapulo kadakuada ti naguummong iti Huebes, maika-17 ti Marso 1842, iti akinngato a siled iti tiendaan ti Propeta.2 Daytoy ti nangrugian ti Relief Society.
Ania ti Mabalintayo nga Aramiden?
-
Ania a suporta ti maipaayko tapno matulongak dagiti kakabsatko a babbai nga agsagana ken dumar-ay iti templo?
-
Kasano a maipagwadak ti tawid dagiti nagkauna a kakabsat a babbai a nagsakripisio nga umawat kadagiti bendision ti templo?
-
Kasano a matagikuak dagiti bendision ti templo?
© 2010 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti Visiting Teaching Message, August 2010. Ilokano. 09368 864