Pweng sin Prestuhnsi Se Met, Ohkohs 2010
Mwe Insewowo luhn Tempuhl
Nga kuh in srack esam ke pacl se ma ninac ac pahpah tuhmuhk uskuhtlac nuh ke Swiss Tempuhl suc tuhfahna oreklac, tempuhl se emet fin acn Europe, in orwaclah sie sucu ma pahtpaht. Nga tuh yac 16 ke pacl sac ac fuhsr emet sin tuhlihk ahkosr. Kuht tuhkweni sikuckmuhtuhnte ke loang ah in siliyucki fin facluh ke kuh luhn pristut, wi olwelah se ma kuht kuh in siliyucki ke ma pahtpaht. Nga tiac kuh in muhlkuhnlah pacl wolacna se inge.
Ke nga mukul fuhsr se nga fwefwelac kuhtuh ke kuht som tuhpallah mahsrol ke muhtuhnfacl sahyac in siliyucki oacna sie sucu. Nuh sihk oruh se oacna orekma luhn tempuhl ke som tuhpal fin facl inmahsrol in us mwe insewowo ne tok ma pahtpaht nuh sin mwet nuhkwewa fin facluh. Tempuhl luhn Alu luhn Jisus Kraist luhn Mwet Luhlahlfongi Lal ke Lwen-sahflah muhsahiyucklac na pwacye nuh sin mwet nuhkwewa facluh, tiacna sol muhtuhnfacl, facsin, kuh kainin kafucrmacn.
Tempuhl pa mwe loh se lah ma wo uh fah tiac muhnahslah. Prestuhn George Q. Cannon (1827–1901), Mwet in Kahsruh Se Met ke Prestuhnsi Se Met, tuh fahk ke sie pacl ah lah “Kais sie yot ke pwelucng suc akwucki nuh ke Tempuhl uh, ac Tempuhl nuh kwewa ma ahksahfyeyuhklac … ahkmuhnahsyelah kuh luhn Setuhn fin facluh, ac ahkfokokoye kuh luhn God ac muhtahl luhn God.”1
Kais sie tempuhl ahkfokokoye mokleyuck luhn ma suwohswohs fin facluh, mwe insewowo yohk emet, pwacye, tuhkuh nuh sin mwet suc som nuh ke tempuhl. Ke acn se inge kuht eis kahlwem ac mwe etwacack ac oruh olwelah ma, fin kuht ukwe, ac kahsrwe kuht in fahsr ke inkacnek luhn mwet tuhmal lutlut. In ahkfototoye, tempuhl uh luti kuht ke srihpac muhtahl luhn moul ac kahsruh in kol kuht ke ma pwacye luhn mahno ac nguhn.
Kuht tiac som nuh ke tempuhl nuh sesr muhkwena, tuhsruhk. Kais sie pacl kuht utyak nuh ke lohm muhtahl inge, kuht wi orekma muhtahl, ac moullac nuh ke molwelah luhn tuhlihk nuh kwewa nuhtin God kuh in eis ke srihpen Iwaclah luhn Wen Sefanna nuhtin Pahpah. Orekma se inge muhtahl ac tiacna nuhnkuh kac sifacna ac lwelah kuht suc moul in mahno in wi orekma wolacna in luhmahlah mwet lahngo fin Finohl Saion.
Nuh sin mwet suc tiac kuh in wi nuh tempuhl ke kuhtwena srihpac, Nga kwacfwe kowos in oruh ma nuh kwewa kowos kuh in eis pwepuh in lwelah nuh ke tempuhl. Pwepuh in lwelah nuh ke tempuhl pa mwe akucl se luhn luhlahlfongi ac oaru lasr in kuhlwacnsapuh Leum. Pa inge mwe akucl ke luhngse lasr nuh sin Leum, oacna ke Jisus el luti, “Kuhtwena mwet suc lohng, ac liyacacng masap luhk, el luhngse nga: ac el suc luhngse nga Pahpah tuhmuhk fah luhngse pac el, Nga fah luhngse el, ac tuhfah fahkyucyak nuh sel” (John 14:21).
Ke facluh tuhtahflah in kahtoi pacna ke lohm muhtahl ahkmuhtahlyeyucklac nuh sin Leum, pa inge pruhe luhk tuh kuht fah oruh ip lasr in ahkfototoye inkuhsrao nuh facluh ke kuht sruok pwepuh in lwelah nuh ke tempuhl ac orekmakihn pwepuh se inge. Ke kuht oruh ohinge, ma suwohswohs uh fah yohyohkwelihk na tiac nuh ke moul lasr uh ac lohm sesr uh muhkwena tuhsruhktuh nuh ke acn sesr uh ac fin facluh kwewa.
© 2010 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/09. Ahkkweyeyucklac ke lweng: 6/09. Lwenglah luhn First Presidency Message, August 2010. Kosraean. 09368 868
Luti ke Pweng Se Inge
Inkaiyacn mwet uh lotwelah wo ac esamyac paht ke kom sang nuhnak an orekmakihn mwe kahsruh in liyeyuck likina in sruhmuhn muhkwena (liye Teaching, No Greater Call [1999], 182). Ke pacl in lesin an, kom kuh in ahkkahlwemye sie petsac ke tempuhl. Tukun kom riti pweng se inge, ahkuhtweyac lah efuh tempuhl uh yohk srihpac nuh sel Prestuhn Uchtdorf. Suli tuhlihk fuhsr ke sucu an in srolwaclah sie petsac ke sucu laltahl an e ke tempuhl.
Teaching, No Greater Call fahk, “Encourage those you teach to set one or more goals that can help them live the principle you have taught” (159). Nuhnkuh in riti pweng lal Prestuhn Uchtdorf ke sucu ac suli mempucr ke sucu an in suhmuhslah finsrak luhn kais sie ma ac fah kahsrweltahl in nwacsnwacs na eltahl in muh kuh in sruok pwepuh in lwelah nuh ke tempuhl.