Pweng ke Forfor Luti, Ohkohs 2010

Ahkyohkye Luhlahlfongi ac Suwohswohs luhn Kais Sie

Lutlut ke sramsram se inge ac, fin ac fal sruhmuhn kac yurin tahmtahel kom muhtwacta yohroh an. Orekmakihn kihsen siyuck an in kahsrwe kom ahkfokokoye tahmtahel lom ac in oruh Rilif Sosaiti in ip yohk srihpac nuh ke moul lom an.

Luhlahlfongi • Sucu • Kuhlwacnsap

Ke Ma Suhmuhslah uh

Isaiah 2:2–3; D&C 109:22–23; 110:8–10

Kunohkohn Lasr in Nwacsnwacs ke Ahkfuhlwactyeyacn Tempuhl

“Wuhlweacng kuht oruh ke akwuck kuht eis ke tempuhl uh orwaclah kuht in utyak nuh yurin God. Wuhlweacng inge ahkkweye kuht nuh ke kuhiyen kuh ac kahlwem lasr sifacna uh. Kuht oruh wuhlweacng in ahkkahlwemye oaru lasr in muhsahelah tohkohsrahi an. Kuht pa mwet wuhlweacng ke kuht fihliyucklac ye muhtuhn God ke wuhlweacng an. Mwe insewowo nuh kwewa ma uliyuckme ma lasr ke luhlahlfongi lasr nuh ke wuhlweacng inge. …

“Meac muhtwacn ke Alu uh kuh in oruh in eis mwe insewowo in tempuhl uh?

“Sin mwet pahluh Lal, Leum El suli mwet suc soenna eis mwe insewowo in tempuhl uh in oruh ma nuh kwewa enenweyuck in eis ke mwe insewowo inge. El suli mwet suc eis tari mwe insewowo inge in fohlohk pacl nuh kwewa kuh in sulpac pwacrkihn pacl inge, in ahkyohkye etwacack ac lahlmwetmwet laltahl ke plwacn ma pahtpaht Lal an.

“Lwelah kuht in nwacsnwacs in sruok sie pwepuh in lwelah nuh ke tempuhl. Lwelah kuht in som nuh ke tempuhl in siliyac sucu lasr nuh tok ma pahtpaht. Lwelah kuht in fohlohk nuh ke tempuhl ke pacl nuh kwewa kuht kuh an. Lwelah kuht in sang nuh sin mwet lasr suc misac tari akwuck luhn moul ma pahtpaht yurin God. Lwelah kuht in engankihn ahkkweyeyuck ke nguhn ac fwackyuck ma kuht eis ke kuht fahsri tempuhl uh lwen nuh kwewa uh. Lwelah kuht in luhlahlfongi ac oruh ac karihngihn wuhlweacng in tempuhl in eis mwe insewowo nuh kwewa ke Iwaclah sac.”¹

Silvia H. Allred, mwet in kahsruh se met ke prestuhnsi luhlahp luhn Rilif Sosaiti.

Ke Ma Mahtuh Lasr

Prestuhn Gordon B. Hinckley (1910–2008) el luti lah Rilif Sosaiti kapwack ke tahmtahel suc kena in alu ke tempuhl uh:

“Ke muhsahiyucklac luhn Tempuhl Kirkland ah muhtwacn uh pahng in ipsrihsrihkiyac ahluh lalos an in kuhlamihsiyucki nuh ke mwe ahkfwel ma orekmakihnyuck nuh ke sinkacn tempuhl an, ma ac sruok kahlwem luhn faht ac mahlwem ah ac srweyac kahlwem sacn in ahkkahtoye ngwetngwetwacn muhsah sacn.

“Ke pacl inge, eltahl suhkahsruhp ke mani tuhsruhktuh fokoko ke luhlahlfongi, mwet orekma uh sang kuh ac ma laltahl in muhsahelah lohm sin Leum. Muhtwacn uh orek mongo, ma wo emet eltahl kuh in oruh. Edward W. Tullidge el fahk ke muhtwacn tuhta ma luhn tempuhl, Joseph Smith, ke el liyacltahl, fahk, ‘Koacl, tahmtahel, komtacl ahkolah pacl nuh kwewa Tahmtahel pa mwet se emet in oruh orekma wo. Mary el pa mwet se emet ke moulyak; ac tahmtahel uh ingena pa mwet emet in orekma in tempuhl an.’’ …

“Sulpacna fin acn Nauvoo, ke tempuhl sac tuh muhsahiyuck ah, muhtwacn ekahsr tuhkweni nuh sie in orek fohrohk luhn mwet orekma ah. Tuhkuh ke ohiyac inge pa mwet longoul selos tuhkweni ke Tuhstuh, 17 Mahs 1842, ke infuckihl se lucng ke lohm in kuhka luhn Mwet Pahluh ah.”² Na pa Rilif Sosaiti uh muhtwacwacack.

Meac Kuht Kuh In Oruh Uh?

Kahsruh fuhkah nga kuh in sang in kahsruh tahmtahel wiyuck uh in ahkolah in som wi nuh ke tempuhl?
Nga kuh in ahkkahlwemye srihkasrak luhn tahmtahel emet ah suc kihsackuhnlah in eis mwe insewowo luhn tempuhl uh fuhkah?
Nga kuh in eis mwe insewowo luhn tempuhl uh fuhkah?

© 2010 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/09. Ahkkweyeyucklac ke lweng: 6/09. Lwenglah luhn Visiting Teaching Message, August 2010. Kosraean. 09368 868