Klumech er a First Presidency, Ongeai el buil 2010
Klengeltengat er a Templo
Ak kmal dirk medengelii a taem el rechad er a blik a ngilikemam el telungalk el mora kmal dirk mlo dechor el Templo er a Swiss, el ngii a mle kot er a chelsel a Europe, el ki blom telungalk el mora ulebongel. Ng mle teruich me a elolem a rekik el kot el kekerei er a chelsir a reteuang el ngalk. Aki mlo dmak el outubaruach er a altar e mloak er tial beluulechad lokiu a klisiich er a priesthood, lobengkel a klebokel el telbiil el kmo aki mo moak el mora diak a ulebengelel. Ng kmal diak kubes er tial klebokel el taem.
Ng kora mlo mechas a renguk el ki mulleong a beluu el mo moak el telungalk. Ng uaia lolangch el kirel a ureor er a templo er a bekel beluu el ngii a mesterir a rokui el chad er a beluulechad a diak a ulebengelel klengeltengat. A templo er Ikelesia er a Jesus Kristo er a Uriur-klebesei el Santo a meral mokedechor el kirel a klungiolir a rechad el rokui, el diak el iior er a kmo ke chad er ker el beluu, siukang er kau, me a kabelment el mngara chelsel.
A templo a mesisiich el sioning el kmo a klungiaol a mo mesisiich. A President George Q. Cannon (1827–1901), Kot el Counselor er a First Presidency, a mle tal dul kmo, “A bekel uchelel a urerel a Templo, me a bekel Templo el mo merek … a ngosengesii a klisichel a diablong er a beluulechad, e oisisii a klisichel a Dios me a Kledios.”1
Meng uaisei el templo a oisisii a klisichel a llemalt er a beluulechad, eng di a ngarbab el klengeltengat, a mor tirkel tir a mora templo. Tiaikid sel kid a ngmai a lmuut el llomes me a uldasou e soiseb er a telbiil, el sekum e kede oltirakl, e ngosukid el ngara sel melemalt el rael. A dongedeb er ngii, ea templo a osischeklid el kirel a chedaol moktek er a klengar e ngosukid el ngmai aikel meral chedaol klisiich el bedenged me a reng er kid ousbech.
Kid a diak di debora templo el di kired el merekong, ng dirrek el. Bekel taem el desiseb er a chelsel aikal chedaol telbiil, e kede soiseb er a chedaol, el teletael er a ureor el kirel osebelir a rokui el ngelekel a Dios el sel Tngakireng er a Di Chimol Ngelekel a Chedam a uchul. Tiang a kmla teletael er a chedaol omesiou el meskid a techelled kid a rechad el meruul a chetengakl ureor el mo ngara Rois er a Zion el olsobel er a rechad.
Tirkel tir a kuk diak el sebecherir el mora templo el kmo ngerang a uchul, ea kmal mengelechel er kemiu me bor sel tkul rebab el sebechemiu el mo obang a beches el babier er a mo soiseb er a templo. Tial babier el mo soiseb er a templo a olengchelel a klaumerang me a blak el reng er kid el mo mesiou er a Rubak. Ngolengchelel a beltik el reng er kid el mora Rubak, el uaia ikel ulisechakl a Jesus, “Ngkel olab a llechuk, e oltirakl, a ngii a betik a rengul er ngak: e ngkel betik a rengul er ngak a mo betik a rengul er a Demak, e ngak a mo betik a renguk er ngii, e mo chemolt er ngii” (Johanes 14:21).
Me a ureor er a beluulechad el melemolem el donglebokel er ngii lolab aikal chedaol omekedecheraol el mla moterekokl er a Rubak, e nglunguchek me bol sebeched el remuul a ngercheled lokedii a babeluades el me kmeed er a beluulechad lokiu sel bo de klikiid lobang a babier er a mo soiseb er a templo e dousbech er ngii. Sel bo deuaisei, ea llemalt a diak di bol chachisois er a klengar kid me a rekeblid ng dirrek el mo chachisois er a beluu me a beluulechad el rokir.
© 2010 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/09. Kengei er a oidel: 6/09. Oidel a First Presidency Message, August 2010. Palauan. 09368 881
Osischeklel Tial Klumech
Oumesingd el rechad a ungil mesuub e meketeket el medengei sel mousbech a siasing el olisechakl er a suobel er a bai di mongedecheduch (mesang a Teaching, No Greater Call [1999], 182). Me a chelsel tial suobel, e momdasou a ochotii a siasing er a templo. Uriur er a omchiuii tial klumech, e mosaod el kmo ngera uchul me a temlpo a klou a belkul el mora President Uchtdorf. Msiotai er a remekekerei el ngalk er a telungalk el mo ousunga er a lecheklel a telungalk er tir el ngara templo.
Teaching, No Greater Call a kmul kmo, “Momeksemeriar tirkal molisechakl er tir el mo kudmeklii a chimong malechub eng betook el moktek er tir el ngii a ngosuterir el mo oltirakl er tial suobel el bla mosischeklii” (159). Momdasou a mo menguiiu er tial klemechel a President Uchtdorf lobengkel a telungalk e msiotai er a rechad er a tleungalk el mo luchesii a moktek er tir el ngii a mo ngosuterir el mo klikiid el mo nguu a babier tir el mo soiseb er a templo.