iTabagone
Na Noqu iVola i Momani
Ena Okosita ni 2005, ni a solia kina o President Gordon B. Hinckley (1910–2008) na bolebole vei ira na lewe ni Lotu me ra wilika na iVola i Momani ni bera ni cava na yabaki, au a yalataka vakataki au niu na vakayacora vakakina. Au kila vinaka tu na italanoa era tu ena iVola i Momani ia au se bera vakadua ni wilika kece sara na ivola. Oqo au sa yalataka meu na maroroya na noqu yalayala.
E sa tukuni vei au meu bulataka na ivolanikalou ka okata me noqu sara ga. Ena gauna au sa wiliwili kina au sa qai dau vola toka e tutuna na veivakasama e dau basika mai baleta na tikina o ya. Au dau lainitaka talega na veitamonivosa kei na vosa yadua ka daucavuti vakarua me vakaraitaka na kena vakabibitaki.
Au dau biuta na yacaqu ena yasa ni yaca ka volai tu ena ivolanikalou me vukei au ena noqu nanuma tiko ni vosa e a cavuti vua eso na tamata ena rawa talega ni vosa e dau cavuti vei au. Kena ivakaraitaki, na 2 Nifai 2:28 au a vola kina na yacaqu: “Ia oqo, [Hillary], mo dau vakararavi vua na Dauveisorovaki ka vakarorogo ki na nona ivunau.” Na levu ga ni noqu okata na iVola i Momani me noqu, na levu talega ni noqu taleitaka meu wilika ena veisiga.
Niu wiliwili ena veisiga, na noqu masu e tara na yaloqu ka vakataukeni au. Au sa vakanamata sara tikoga kina noqu kalasi ka vakamuria na veivakauqeti ni Yalo meu sasaga ka vakaitokanitaki ira na tani. Ni qai yaco mai na iotitoti ni bogi ni yabaki au sa wilika oti na iVola i Momani.
Au sa qai mai kila na bibi ni kena wiliki na iVola i Momani, kei na so tale na ivolanikalou, ka sasaga meu na dau cakava wasoma na ka oqo ena noqu bula.