iVaqa ni Veisiko, Sepiteba 2010
Noda iTavi Me ra Susugi na iTabatamata Tubucake Tiko Mai
Vulica na itukutuku oqo, ka me veivosakitaki vata kei ira na marama o sikova ena kena gauna donu. Vakayagataka na taro me vukea na nomu vaqaqacotaki ira na marama ka cakava me sa tiki kaukauwa ni nomu bula na iSoqosoqo ni Veivukei.
Vakabauta • Matavuvale • Veivukei
Mai na iVolanikalou
Vosa Vakaibalebale 22:6; Efeso 6:4; Inosi 1:1; Alama 53:20–21; 56:47; 57:27
Kevaka e sega na veisusugi, ena rawa ni ra na vakaleqai na itabatamata tubucake tiko mai me vakataki ira na vakamacalataki tiko ena Mosaia 26. E lewe levu sara na itabagone era sega ni vakabauta na nodra ivakavuvuli na nodra qase, ka yaco me ra sa duidui sara mai na nodra vakabauta ka vaka sara tu ga o ya ena veigauna e qai muria mai. O ira na noda itabatamata tubucake tiko mai ena rawa ni ra na vuki tani kevaka me ra na sega ni kila vinaka na veika me ra vakayacora ena nona ituvatuva na Tamada Vakalomalagi.
Na cava ena qai taqomaki ira na itabatamata tubucake tiko mai? Eda vakavulica na ivakavuvuli ni veivakabulai ena Lotu, o ya na ivakavuvuli ni matavuvale, na ivakavuvuli ena vukei ira na itabatamata tubucake tiko mai me ra tekivuna e dua na matavuvale, vakavulica na matavuvale o ya, ka vakarautaka na matavuvale o ya baleta na cakacaka vakalotu kei na veiyalayalati—era sa na qai vakavulica vaka o ya na itabatamata e tarava ka vaka tiko o ya ena veigauna mai muri.
Me vaka ni da itubutubu, iliuliu, ka lewe ni Lotu eda sa vakarautaki ira tiko na itabatamata oqo me baleta na veivakalougatataki i Eparaama kei na valetabu. Sa noda itavi meda na vakamatatataka vei ira na ivakavuvuli e tiko ena ivakaro ni matavuvale. Na itutu vakatama kei na tina sa itavi ena tawamudu. O keda yadua e noda na itavi ni tagane se yalewa ena ituvatuva.
E rawa ni da vakavulica na ivakavuvuli oqo ena dua ga na vanua sa rawa. Sa dodonu meda dau vakamareqeta na bula-vakawati kei na matavuvale. Mai na noda ivakaraitaki, sa na rawa ni ra rawata na vakanuinui kei na kila o ira na itabatamata tubucake tiko mai—sega walega mai na vosa eda cavuta, ia ena vakatalega kina mai na ka eda na vakila ka vakaraitaka me baleta na yalo ni matavuvale.
Julie B. Beck, peresitedi raraba ni iSoqosoqo ni Veivukei.
Mai na Keda iTukutuku
E tukuna o Peresitedi Gordon B. Hinckley ena nona vosa ena soqoni raraba ni iSoqosoqo ni Veivukei ena ika 23 ni Sepiteba, 1995: “Na vuravura eda bula tiko kina sa vuravura ni veilecayaki, kei na veiveisau ni veika e dau vakamareqeti. Ena kacivaki vakadomoilevu e dua na ka se dua tale na kena veisau ni sa na lawakitaki na ivakarau ka sa vakatovolei tu mai vakadede.”1 Sa qai tomana o Peresitedi Hinckley ena nona sa vakaraitaka vei ira na marama, na Lotu, ka vakakina vei ira na tamata ena veivanua kece sara “Na Matavuvale: Ai Vakaro ki Vuravura Raraba.”
Ena veiyabaki mai muri sa vakadewataki na vakatutu vakaparofita oqo ki na levu sara na veimataqali vosa ka veisoliyaki yani vei ira na iliuliu. E kerei ira na lewena kei ira na kena iliuliu me ra “tutaka na veika e tukuna tiko ni na vakavinakataka ka vaqaqacotaka na matavuvale ni sa yavudei ni dua na itikotiko.”2
Na ivakaro sa yaco me dua na yavu ni vakabauta ni Yalododonu Edaidai me baleta na matavuvale, e dua na itukutuku ka rawa ni da maroroya sara vakavinaka ni da kila ni kevaka meda vakamuria na kena ivakavuvuli, eda sa na vaqaqacotaka tiko na noda matavuvale kei na vanua eda vakaitikotiko kina.
© 2010 mai na Intellectual Reserve, Inc.Dodonu kece e taqomaki. Tabaki e Amerika. Vakadonui me Vakavalagi: 6/09. Vakadonui me vakadewa: 6/09. iVakadewa ni Visiting Teaching Message, September 2010. Fijian. 09369 858