iTukutuku ni Mataveiliutaki Taumada, Sepiteba 2010
Na iVola i Momani e dua na iDusidusi Vakayadua
Ena gauna e vinaka sara tu ga kina na noda bula, eda dau vakila na noda gadreva meda na laki bula vata kei na Kalou. E solia vei keda na isolisoli ni Luvena Daulomani me mai noda iVakabula me vakarautaka na sala ka vakavulici keda meda muria. E soli ira na parofita vei keda me ra dusia na sala. E a vakauqeti o Parofita Josefa Simici me vakadewataka na kedra itukutuku na parofita ena iVola i Momani. Sa ikoya na noda idusidusi matata ni lesu vua na Kalou.
A kaya vakaoqo oqo o Josefa Simici me baleta na ivola vakamareqeti o ya, “Au a tukuna vei ira na veitacini ni iVola i Momani e ivola ka dodonu taudua e tiko e vuravura, ka sa vatu-ivakadei ni noda lotu, ka na toro voleka vua na Kalou e dua na tamata kevaka me na talairawarawa ki na kena ivakavuvuli mai na so tale na ivola.”1
Na ivakavuvuli ni iVola i Momani sa ikoya na ivakaro ni Kalou eda na wilika kina. Eso era ivakaro sara ga mai vua na iVakabula ka ra tukuna kina na Nona parofita se cava e dodonu meda cakava kei na ka e dodonu me da yacova. Na iVola i Momani e tukuna vei keda na ivakaraitaki vinaka e cakava na iVakabula me vaqaqacotaka na noda vakabauta kei na noda talairawarawa ki na Nona ivakaro meda muri Koya. E sinai tu ena ivola oqo na ivakavuvuli i Karisito me tuberi keda. Oqo ga e dua na kena ivakaraitaki mai na 2 Nifai:
“[Jisu] e kaya vei ira na luve ni tamata: Dou muri au. Ia, oi kemudou na wekaqu lomani, sa rawa li meda muri Jisu kevaka eda sa sega ni muria na nona vunau na Tamada?
“A sa kaya ko Tamada: Dou veivutuni, dou veivutuni, ka papitaiso ena yaca ni Luvequ Lomani” (2 Nifai 31:10–11).
E vakamacalataka vakarawarawa sara na ivola ni dodonu meda ciqoma na Yalo Tabu ena veipapitaisotaki ni bukawaqa me vukei keda me da na muria tiko na sala rabailailai ka qiqo. Eda vakavulici meda na daumasu tikoga ena yaca i Karisito, ka kakua ni soro, ni kevaka eda cakava o ya, sa na soli vei keda na yalayala oqo: “Ia mo dou toso ki liu ka tudei vei Karisito ena nomudou vakanuinui taucoko sara, mo dou lomana na Kalou kei na tamata kecega. Ia kevaka dou sa toso ki liu ka tugana ki lomamudou na vosa i Karisito, ka vosota me yacova na ivakataotioti, raica sa kaya vakaoqo na Tamada: Dou na rawata na bula tawamudu” (2 Nifai 31:20).
Na iVola i Momani e vakamatatataka ena ivunau totoka nei Penijamini na Tui na ibalebale ni lomana na Kalou kei na tamata kecega. Ni sa na veisau na noda bula mai na kaukauwa ni Veisorovaki kei na noda talairawarawa ki na ivunau eda na vakasinaiti ena lomana na Kalou (raica Mosaia 4:1–12).
Na iVola i Momani ena vakadeitaki keda talega ni na rawa ni da vakasavasavataki ena bula oqo ka da na sega ni vinakata meda ivalavala ca tikoga (raica Mosaia 5:2). Na vakanuinui oqo ena solia vei keda na yaloqaqa kei na veivakacegui ni sasaga tiko o Setani me temaki keda meda lutu laivi mai na noda ilakolako.
Ena veigauna au wilika kina e vica na iyatuvosa mai na iVola i Momani, sa dau vaqaqacotaka dina na noqu ivakadinadina ni dina na ivola, ni o Jisu na Karisito, ni o keda e rawa ni da muri Koya ki na vanua eda lako tiko kina, ka na rawa talega ni da kauti ira yani o ira eda lomani ira ki na vanua eda lako tiko kina. Vei au sa ikoya oqo na ivola mai vei ira kece na ivola. Sai koya na vosa ni Kalou.
Au masulaka ni o keda kei ira kece eda lomani ira ni da na dau vakaceguya na noda karamaca ena veisiga mai na ivola oqo. Au vakadinadinataka ena yaca i Jisu Karisito ni ivola oqo e idusidusi dina.
© 2010 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/09. Vakadonui me vakadewa: 6/09. iVakadewa ni First Presidency Message, September 2010. Fijian. 09369 858