Roronrikirake

Oin au Boki ae ana Boki Moomon

Iroun Hillary Holbrook

N Aokati 2005, ngke Beretitenti Gordon B. Hinckley (1910–2008) e anga te kakaewenako nakoia kaain te Ekaretia ni wareka ana Boki Moomon imwaain banen te ririki, I berita ibon irou bwa N na kataia ni warekia ni kabane kanoan te boki. I tataneiai ma taian karaki n ana Boki Moomon ma I bon tuai ni warekia mai moana ni karokoa ae bane. Ngkai I a bon riai ni kaawakina au berita.

I a tia n reireinaki bwa n na kamwakurii koroboki aika a tabu nakon maiu ao ni karaoia bwa bon oin au bwai. Ngaia are ngke I wareware, I koroboki ni mataniwiin te iteraniba are I taku bwa oin te kaantaninga n te rongorongo. I kanikinaai naba n rainii aan taian taeka aika a okioki ao kibuntaeka are a kaota te bwai ae kakaawaki.

I katuka arau irarikin aara inanon koroboki aika a tabu ni buokai n uringnga bwa ana taeka te Atua are a taekinaki nakoia aomata tabeman e kona naba n riki bwa te taeka ae taekinaki nakoiu. N aron te katotoo, inanon 2 Nibwaai 2:28 I korea arau: “Ao ngkai, [Hillary], I tangiria bwa kam na onimakina te Tia Tei ae korakora, ao n ongeaba nakon ana tua aika a korakora.” Kakorakoraan karaoan ana Boki Moomon bwa te bwai ae onoti kakaawakina nakoiu, e a karakaaki riki kukureiu ni wawarekana ni katoa bong.

Ngke I wareware ni katoa bong, au tataro a riki bwa namakin n te nano are a nanonaki ni koaua ao a onoti nakoiu. I a bon kona ni kabanea au tai iaon au kiraati nako ao n irii ana namakin te Tamnei ni iraorao ma ake a kainnanoa te ibuobuoki. Inanon te kabanea n tairiki n te ririki, e a bane Irou ana Boki Moomon.

I moanna ngkanne n oota bwa warekakin ana Boki Moomon ae bwanin, ni ikotaki ma tabeua koroboki aika a tabu, ao n tangiria ni kamwaita riki warekakina inanon maiu.