Rongorongo man te Moan Beretitentii, Tebetembwa 2010
Ana Boki Moomon bwa te Kairi Nakoim
Ngaira ni kabane ti namakinna, inanon ara tai ae te kabanea n tamaroa, te nano ni kan okira mweengara ni maeka ma te Atua. E anganiira te bwaintangira Natina ae Tangiraki bwa ara Tia Kamaiu ni katauraoa te kawai ao n reireiniira bwa tina kanga n iria. E anganiira burabeti bwa a ana kaota te kawai. Te Burabeti Iotebwa Timiti e bon kairaki iroun te tamnei bwa e na rairii aia rekooti burabeti ae ngaia ana Boki Moomon. Boni ngaia kawaira ni koaua n okira mweengara nakon te Atua.
E taku Iotebwa Timiti n taekan te boki ae kakaawaki arei, “I tuangiia taari bwa Ana Boki Moomon bon te boki ae te kabanea n eti mai buakon booki nako iaon te aonaaba, ao boni ngaia kiingin ara ekaretia, ao e na kaania riki te Atua te aomata ngkana e iri nanon reirei ake a taekinaki inanona, nakon taian boki riki tabeua.”1
Taian reirei n ana Boki Moomon bon ana tua te Atua aika ti kunei inanona. Tabeua bon tuua ake a kaineti mai iroun te Tia Kamaiu rinanon Ana burabeti n aron bwaai ake ti karaoi ao arora are tina kona n riki iai. Ana Boki Moomnon e anganira ana banna ni katoto te Tia Kamaiu ni karikirakei ara onimaki ao ara kantaninga n ongeaba n Ana tua ao n Iria. Te boki e kanoaaki n ana reirei Kristo ibukin kairakira. Aio te katotoo man 2 Nibwaai:
“Ao e taku ana taeka nakoia natiia aomata: Kam na irirai. Mangaia ae tariu aika kam tangiraki, ti na kan irira Iesu ngkana ti aki tauraoi ni kaawakin ana tua te Tama?
“Ao e kangai te Tama: rairananom, rairananom, ao bwabetitoaki n aran Natiu ae Tangiraki” (2 Nibwaai 31:10–11).
Te boki e kamatataa bwa ti na riai ni karekea te Tamnei ae Raoiroi n te bwabetitoaki n te ai ni buokiira n tiku iaon te kawai ae eti man irariki. Ti reireinaki bwa ti na teimatoa n tataro n aran Kristo, ao n aki mamaara, ao ngkana ti karaoia, ti karekea te berita aio: “Ngaia ae kam waaki nako man teimatoa inanon Kristo, ma te kaantaninga ae tamaroa ma ni kororaoi, ma tangiran te Atua ma aomata ni kabane. Mangaia ae kam na waaki nako, ni kaawakin ana taeka Kristo, ao n teimatoa ni karokoa te toki, ao taraia, e kangai ana taeka te Tama: E na reke iroumi te maiu ae akea tokina” (2 Nibwaai 31:20).
Ana Boki Moomon e kamatataa inanon ana kabwarabwara ae kamimi te Uea ae Beniamina tera ae nanonaki ni karekean ana tangira te Atua ma aomata ni kabane. Ngkana a ibitaki aron rikira man mwaakan te mwakuri ni kamaiu ao rinanon ara kakaonimaki n te ongeaaba nakon taian tua, ti na kaonaki n ana tangira te Atua (taraa Motiaea 4:1–12).
Ana Boki Moomon e bon anganiira naba te kakoaua bwa ti kona ni kaitiakaki n te maiu aei bwa a na akea riki te iango ni karaoakin te buakaka (taraa Motiaea 5:2). Te kaantaninga aei e anganiira te ninikoria ao te karaunano ngkai Tatan e kataia ni karirii ao ni kabwarai nanora inanon kawaira.
Ni katoa tai are I warekii tabeua taeka inanon ana Boki Moomon, I namakina au kakoaua bwa e kakorakoraaki bwa e bon koaua te boki, bwa Iesu bon te Kristo, bwa ti kona n iriia nakon mweengana, ao ti kona ni kairiia ake ti tangiriia n okira mweengana ma ngaira. E a tia n reke irou te boki ae kakaawaki. Bon ana taeka te Atua.
I tataro bwa ngaira ao ni kabane te koraki ake ti tangiriia a na momooi ni katoa bong mai iai. I kakoaua n aran Iesu Kristo are bon te tia kairi ae koaua.
© 2010 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki n te Kiribati. Kariaiakaki n te Ingiriti: 6/09. Kariaiakaki rairana: 6/09. Rairan te First Presidency Message, September 2010. Kiribati. 09369 859
Anga reirei man te Rongorongo Aei
“Ngkana ti kaboonganai taian koroboki aika a tabu ao aia taeka burabeti ni boong aika kaitira bwa te tabo are ti karekei oin ara reirei ni kabane mai iai, ti kaoa te Tamnei n riki bwa te tia kakoaua. Aio e uotia nakon ara reirei mwaakan te Atua nakon anaakin nanoia aomata (taraa D&C 11:21) (Teaching, No Greater Call [1999], 51). Iangoa warekan ana rongorongo Beretitenti Eyring ake a katekenano, ni ikotaki ma ana kabwarabwara Iotebwa Timiti ibukin taekan ana Boki Moomon. Kaoia kaain te utu bwa a na tibwaia bwa e kangaa maiuakinan taian reirei ake a kuneaki n ana Boki Moomon ni buokiia ni kaania riki nakon te Atua.
“Ngkana taan kan reirei a marooroakinii taian reirei man koroboki aika a tabu, a karikirakea aia konabwai are a kainnanoia ibukin oin aia kamatebwai iaon koroboki aika a tabu” (Teaching, No Greater Call, 54). Iangoa warekan koroboki aika a tabu are a kaineti nakon te rongorongo ao ni kakaea ao ni marooroakin taian reirei aike a reiakinii.