Agtutubo
Bukodko a Libro ni Mormon
Idi Agosto 2005, idi nangted ni Presidente Gordon B. Hinckley (1910–2008) iti karit kadagiti miembro ti Simbaan a basaenda ti Libro ni Mormon sakbay ti gibus ti tawen, inkarik iti bagik a basaek ti sibubukel a libro. Pamiliarak kadagiti estoria iti Libro ni Mormon ngem diak pay pulos nabasa ti amin a pinanidna. Ita kayatko a tungpalen ti karik.
Nasuruanak idin a mangipakat kadagiti nasantuan a kasuratan iti biagko ket aramidek dagitoy a napapateg iti bukodko. Iti kasta bayat ti panagbasak, insuratko kadagiti mardyin ti panid no ania iti panagkunak a kangrunaan nga ideya dayta a binatog. Kasta met nga inugedak dagiti naulit a balikas ken ragup ti balikas a mangipakita iti panangyunay-unay.
Inkabilko ti naganko a sumaruno iti nagnagan kadagiti nasantuan a kasuratan tapno makatulong kaniak a manglagip a ti balikas ti Dios a naisao kadagiti sabali ket mabalin met a balikas a naisao kaniak. Kas pagarigan, iti 2 Nephi 2:28 insuratko ti naganko: “Ket ita, [Hillary], kayatko nga agtalekka iti naindaklan a Mangibabaet, ken denggem dagiti naindaklan a bilinna.” Ti ad-adda a panangaramidko a bukodko ti Libro ni Mormon, ad-adda met ti panaggagarko nga agbasa iti daytoy iti tunggal aldaw.
Bayat ti panagbasak iti inaldaw, nagbalin a naimpusuan ken personal dagiti kararagko. Kasta met a kinabaelak ti nangipamaysa kadagiti klasek ken nangsurot kadagiti parikna ti Espiritu a makigayyem kadagiti sabali. Iti maudi a rabii ti tawen, nalpasko a binasa ti Libro ni Mormon.
Naawatak kalpasanna ti kinapateg ti panagbasa iti sibubukel a Libro ni Mormon, a kagiddan dagiti dadduma pay a nasantuan a kasuratan, ken kayatko nga aramiden iti mamin-adu pay a gundaway iti biagko.