Mensahe iti Visiting Teaching, Septiembre 2010

Ti Pagrebbengantayo a Mangaywan iti Tumantanor a Kaputotan

Adalem daytoy a material ken, no mayannatup, ilawlawagmo daytoy kadagiti kakabsat a babbai a sarungkaranyo. Usarem dagiti saludsod a makatulong kenka a mangpapigsa kadagiti kakabsat a babbai ken tapno mangaramid iti Relief Society kas aktibo a paset ti bukodmo a biag.

Pammati • Pamilia • Tulong

Manipud kadagiti Nasantuan a Kasuratan

Dagiti Proverbio 22:6; Taga-Efeso 6:4; Enos 1:1; Alma 53:20–21; 56:47; 57:27

No awan ti panagaywan, mabalin nga agpeggad ti tumantanor a kaputotantayo iti panagbalinda a kas iti maysa a nailadawan iti Mosiah 26. Adu nga agtutubo ti saan a namati kadagiti kannawidan dagiti ammada ken nagbalinda a naisina a tattao iti pammatida, a nagtalinaedda a kasta kalpasanna. Mabalin a maipada a mayaw-awan ti tumantanor a kaputotantayo no saanda a maawatan ti pasetda iti plano ti Nailangitan nga Ama.

Ngarud ania ti mangpatalinaed a natalgedto ti tumantanor a kaputotan? Iti Simbaan, isurotayo dagiti pangisalakan a pagbatayan, ken dagita a pagbatayan ket pagbatayan ti pamilia, dagiti pagbatayan a mangtulongto iti tumantanor a kaputotan a mangbukel iti maysa a pamilia, suruan dayta a pamila, ken isagana dayta a pamilia para kadagiti ordinansa ken katulagan—ket kalpasanna suruanto ti sumaruno a kaputotan ti sumaruno ken agtultuloy.

Kas nagannak, dadaulo, ken miembro ti Simbaan, isagsaganatayo daytoy a kaputotan para kadagiti bendision ni Abraham, para iti templo. Adda pagrebbengantayo a mangilawlawag a nasayaat kadagiti kangrunaan a punto ti doktrina a masarakan iti waragawag iti kaaamaan. Ti kinaina ken kinaama ket agnanayon nga akem ken pagrebbengan. Tunggal maysa kadatayo ket addaan iti pagrebbengan para iti akem ti lalaki wenno ti babai iti plano.

Mabalintayo nga isuro daytoy a doktrina iti ania man a lugar. Nasken nga isaritatayo nga addaan iti panagraem ti kallaysa ken pamilia. Ken manipud iti pagwadantayo, ti tumantanor a kaputotan ket makagun-od iti dakkel a namnama ken pannakaawat—saan laeng a manipud kadagiti balikas nga isaotayo no di ketdi pay manipud iti wagas a panagriknatayo ken panangipagwadan kadagiti nasayaat a pagbatayan maipanggep iti pamilia.

Ni Julie B. Beck, sapasap a presidente ti Relief Society.

Manipud iti Pakasaritaantayo

Iti panagsaritana kadagiti kakabsat a babbai iti sapasap a miting ti Relief Society idi Septiembre 23, 1995, kinuna ni Presidente Gordon B. Hinckley: “Ti lubong a yantayo ket maysa a lubong a napnuan iti riribuk, napnuan kadagiti masukansukat nga ik-ikkan pateg. Gargariennatayo dagiti napipigsa a timek a mangaramid kadagiti adu a banag tapno mangliput iti nabayagen a nasubok a pagrukodan ti ugali.”¹ Kalpasanna intuloy ni Presidente Hinckley nga inyam-ammo kadagiti kakabsat a babbai, ti Simbaan, ken iti kamaudiananna kadagiti tao iti amin a lugar ti “Ti Kaamaan: Maysa a Waragawag iti Lubong.”

Kadagiti sumaruno a tawen naipatarus daytoy napropetaan a dokumento iti adu a pagsasao ken naibunong kadagiti dadaulo iti sangalubongan. Agkiddaw daytoy kadagiti umili ken dadaulo ti gobierno “a mangitandudo kadagita a pagrukodan a naisangrat a mangpatalinaed ken mangpapigsa iti kaamaan a kas kangrunaan a benneg ti kagimongan.”²

Nagbalin ti waragawag a pundasion dagiti pammati ti Santo iti Ud-udina nga Aldaw maipapan iti pamilia, maysa a palawag a pagkaptantayo a naimbag ken pakaammuan a babaen ti panagbiag kadagiti pammilinna, pappapigsaentayo dagiti pamilia ken pagtaengantayo.

© 2010 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti Visiting Teaching Message, September 2010. Ilokano. 09369 864

Ania ti Maaramidko?

Kasano a matulongak dagiti kakabsatko a babbai a mangusar iti “Ti Kaamaan: Maysa a Waragawag iti Lubong” tapno mangaywan iti tumantanor a kaputotan? Mabalin nga ibilangmo ti panangibinglay iti kopia ti waragawag ken panangtulong kadagiti kakabsat a babbai a mangilasin ken mangmarka kadagita a binatog a kasayaatan a mangisuro kadagiti kangrunaan a doktrina.
Kasano a maaywanak ti tumantanor a kaputotan? Mabalin nga ibilangmo ti panangtulong kadagiti miembro ti wardmo, branchmo, pamiliam, wenno komunidadmo a mabalin a mairanud iti atension ken ayatmo.