Mensahe ti Umuna a Panguluen, Septiembre 2010
Ti Libro ni Mormon kas Bukod a Pangiwanwan
Mariknatayo amin, kadagiti kasayaatan a kanitotayo, ti tarigagay nga agsubli iti pagtaengan a makadenna ti Dios. Inikkannatayo iti sagut ti Patpatgenna nga Anak kas Mangisalakantayo tapno mangipaay iti dalan ken tapno isurona kadatayo no kasano a surotentayo daytoy. Inikkannatayo kadagiti propeta a mangitudo iti dalan. Naparegta ni Propeta Joseph Smith a mangipatarus iti kasuratan dagiti propeta a daytoy ket ti Libro ni Mormon. Daytoy ti awan duadua a pangiwanwantayo iti dalan nga agawid iti Dios.
Kinuna ni Joseph Smith maipapan iti dayta a napateg a libro, “Imbagak kadagiti kakabsat a ti Libro ni Mormon ti kalintegan a libro ditoy daga ken isu ti pagbatayan ti pammatitayo, ket as-asideg ti tao iti Dios babaen ti panangsurotna kadagiti linaonna, ngem ti sabali a libro.”1
Dagiti linaon ti Libro ni Mormon ket dagiti bilin ti Dios a masarakantayo ditoy. Ti sumagmamano ket dagiti pudno ken nalawag a bilin manipud iti Mangisalakan babaen kadagiti propetana kas iti no ania ti nasken nga aramidentayo ken no ania ti nasken a pagbalinantayo. Ti Libro ni Mormon ket mangted kadatayo iti pagwadan ti Mangisalakan tapno mangpatibker iti pammati ken determinasiontayo nga agtungpal a sumurot Kenkuana. Napnuan ti libro iti doktrina ni Cristo a mangiwanwan kadatayo. Daytoy ti maysa a pagwadan manipud iti 2 Nephi:
“Kinuna ni [Jesus] kadagiti annak ti tao: Surotendak. Gapuna, ay-ayatek a kakabsatko, mabalintay kadi ti sumurot ken ni Jesus no saantayo met a salimetmetan ti bilin ti Ama?
“Ket kinuna ti Ama: Agbabawikayo, agbabawikayo, ket mabuniagankayo koma iti nagan ti Ay-ayatek nga Anak” (2 Nephi 31:10–11).
Ilawlawag ti libro a nasken nga awatentayo ti Espiritu Santo kas maysa a panagbuniag ti apuy a makatulong kadatayo nga agtalinaed iti nailet ken akikid a dalan. Nasuruantayo a nasken nga agkararagtayo a kanayon iti nagan ni Cristo, a saan nga agkapuy, ket no aramidentayo, addaantayo iti daytoy a kari: “Gapuna, masapul nga agtultuloykayo a sitatalingenngen ken ni Cristo, nga addaan iti naan-anay a kinalawag ti namnama, ken ayat iti Dios ken iti amin a tao. Gapuna, no agtultuloykayo, nga agpennek iti balikas ni Cristo, ken agibtur agingga iti panungpalan, adtoy, kuna ti Ama: Maaddaankayto iti biag nga agnanayon” (2 Nephi 31:20).
Ilawlawag ti Libro ni Mormon iti nakaskasdaaw a sermon ni Ari Benjamin no ania ti kayat a sawen ti maaddaan iti ayat ti Dios ken ti amin a tao. No agbalbaliw dagiti ugalitayo babaen ti bileg ti Pannubbot ken babaen ti napudno a panagtungpaltayo kadagiti bilin, mapnotayonto iti ayat ti Dios (kitaen iti Mosiah 4:1–12).
Mangted pay kadatayo ti Libro ni Mormon iti panagtalek a makapagbalintayo a natarnaw unay itoy a biag tapno awan tarigagaytayon nga agaramid pay iti dakes (kitaen iti Mosiah 5:2). Mangted kadatayo daytoy a namnama iti tured ken liwliwa bayat ti pananggandat ni Satanas a mangsulisog ken mangupay kadatayo iti dalantayo.
Tunggal kanito a basaek ti uray sumagmamano laeng a binatog iti Libro ni Mormon, mariknak a napapigsa ti pammaneknekko a pudno ti libro, a ni Jesus isu ti Cristo, a mabalintayo ti sumurot Kenkuana nga agsubli a makipagtaeng kenkuana, ken mabalintayo nga ikuyog a makipagtaeng dagiti ay-ayatentayo iti denna ti Dios. Para kaniak daytoy ti kaindaklan kadagiti libro. Daytoy ti balikas ti Dios.
Ikararagko ta sapay koma nga uminum a siuuneg ken inaldaw manipud ditoy ti amin nga ay-ayatentayo. Paneknekak iti nagan ni Jesucristo a daytoy ti pudno a pangiwanwan.
© 2010 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti First Presidency Message, September 2010. Ilokano. 09369 864
Panangisuro manipud iti Daytoy a Mensahe
“No usarentayo dagiti nasantuan a kasuratan ken dagiti balikas dagiti propeta iti ud-udina nga aldaw kas pagtaudan ti amin a panangisurotayo, awisentayo ti Espiritu nga agpaneknek. Daytoy ti mangyeg iti panangisurotayo ‘ti bileg ti Dios a mangallukoy kadagiti tao’ (DkK 11:21)” (Teaching, No Greater Call [1999], 51). Ibilang a basaen dagiti bugas [highlights] manipud iti mensahe ni Presidente Eyring, agraman ti palawag ni Joseph Smith maipapan iti Libro ni Mormon. Awisem dagiti miembro ti pamilia a mangiburay no kasano a makatulong kadakuada ti panagbiag kadagiti pannursuro a masarakan iti Libro ni Mormon tapno ad-adda a mayasidegda iti Dios.
“No paglilinnawagan dagiti sursuruan dagiti pagbatayan manipud kadagiti nasantuan a kasuratan, mapadur-asda dagiti paglaingan para iti bukodda a panagadal iti nasantuan a kasuratan” (Teaching, No Greater Call, 54). Ibilang nga adalen dagiti nasantuan a kasuratan maipapan iti daytoy a mensahe ken sapulen ken pailawlawag dagiti pagbatayan nga isuro dagitoy.