Thawj Pawg Thawj Tswj Hwm tsab Xov, Kaum Hli Ntuj 2010
Tej Koob Hmoov ntawm lub Tuam Tsev
Lub tuam tsev muab hom phiaj rau peb lub neej. Nws coj kev thaj yeeb los rau peb—tsis yog txoj kev thaj yeeb uas neeg muab tiam sis yog txoj kev thaj yeeb uas Vajtswv Leej Tub tau cog lus hais tias, “Kuv muab txoj kev nyob kaj siab lug tso rau nej, txoj ntawd yog kuv txoj uas kuv muab pub rau nej.”
Nyob hauv lub tuam tsev peb muaj peev xwm txav tau ze tus Tswv
Kuv xav hais tias yeej tsis muaj ib qho chaw nyob hauv lub ntiaj teb uas kuv yuav txav tau ze rau ntawm tus Tswv dua li nyob hauv Nws ib lub tuam tsev dawb huv. Muaj ib zag paj lug:
Ntuj ceeb tsheej nyob deb npaum li cas?
Nws twb tsis yog deb deb.
Nyob hauv Vajtswv tej tuam tsev,
Ntuj ceeb tsheej twb nyob kiag ntawm qhov chaw peb nyob.
Tus Tswv hais tias:
“Nej tsis txhob khaws nyiaj txiag thiab qhov txhia chaw cia rau hauv ntiaj teb no, rau qhov hauv ntiaj teb no muaj npauj, thiab xeb noj tau, thiab tub sab nyiag tau:
“Nej cia li khaws tej uas muaj nuj nqis cia rau saum ntuj ceeb tsheej. Nyob saud tsis muaj npauj, tsis muaj xeb noj, thiab tsis muaj tub sab nyiag:
“Tej yam muaj nqis uas yog nej tug nyob qhov twg, nej lub siab yeej nyob qhov ntawd.”1
Rau cov mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, lub tuam tsev yog qhov chaw uas dawb ceev tshaj plaws nyob hauv lub ntiaj teb no. Nws yog tus Tswv lub tsev, thiab ib yam li cov lus luag sau rau sab nraum lub tuam tsev, lub tuam tsev yeej yog “kev dawb huv rau tus Tswv.”
Lub tuam tsev txhawb nqa peb thiab muab peb tsa nto
Nyob hauv lub tuam tsev, lawv qhia txog Vajtswv txoj kev cawm seej. Tej kev khi lus uas nyob mus ib txhis yog ua nyob rau hauv lub tuam tsev. Lub tuam tsev txhawb nqa peb, muab peb tsa nto, nws sawv zoo li ib lub teeb rau sawv daws pom, thiab taw kev rau peb mus rau saum lub yeeb koob xi-le-thi-aus. Nws yog Vajtswv lub tsev. Txhua yam uas ua nyob hauv lub tuam tsev yeej puav leej txhawb zog thiab pab tau yus.
Lub tuam tsev yog rau tsev neeg, yog ib yam uas muaj nqis tshaj plaws uas peb muaj nyob rau lub neej no. Tus Tswv yeej tau hais meej meej rau peb cov uas ua txiv, hais tias peb muaj qhov ntiag tug hlub peb cov poj niam kom kawg peb lub siab thiab ua hauj lwm yug lawv thiab peb cov me nyuam. Nws tau hais tias qhov hauj lwm uas tseem ceeb tshaj plaws peb cov niam thiab txiv muaj peev xwm ua tau ces yog ua nyob hauv peb lub tsev, thiab peb lub tsev muaj peev xwm zoo li ntuj ceeb tsheej, qhov tseem ceeb yog thaum peb txoj kev sib yuav yog raug muab khi ua ke nyob hauv Vajtswv lub tsev.
Tus Txwj laug Matthew Cowley uas tau tuag lawm, tus uas tau yog ib tug ntawm Pawg Kaum Ob tug Thwj Tim, muaj ib zaug nws tau tham txog ib hnub Saturday yav tav su dua, yog nws tus ntxhais xeeb ntxwv hnub yug. Nws txawm tuav rawv tus ntxhais xeeb ntxwv tes mus ua si rau nws hnub yug—tsis yog mus tim zoo los yog mus xyuas movie tiam sis yog mus xyuas lub tuam tsev. Thaum tau cai los ntawm tus neeg tu vaj tsev lawm, nkawd txawm mus rau ntawm lub rooj vaj loj loj mus hauv lub tuam tsev. Nws tau hais kom tus ntxhais xeeb ntxwv muab nws txhais tes tso rau ntawm sab phab ntsa uas khov khov thiab tom qab ntawd kom muab tso rau ntawm lub qhov rooj tuab tuab. Ces nws txawm maj mam hais tias, “Nco ntsoov hais tias hnub no koj tau chwv lub tuam tsev lawm. Ib hnub koj yuav mus sab haud.” Nws qhov txiaj ntsim rau tus me ntxhais no tsis yog qhaub noom los yog ice cream tiam sis ib qho uas muaj lub ntsiab tseem ceeb tshaj thiab kav ib txhis—yog txoj kev hlub tus Tswv lub tsev. Tus ntxhais tau chwv lub tuam tsev, thiab lub tuam tsev tau chwv nws.
Lub tuam tsev coj tau kev kaj siab los rau peb
Thaum uas peb chwv lub tuam tsev thiab hlub lub tuam tsev, peb lub neej yuav qhia tau peb txoj kev ntseeg. Thaum peb mus hauv lub tsev uas dawb huv no, thaum peb nco tej kev khi lus uas peb ua nyob rau haud, peb yuav muaj peev xwm nyiaj txhua txoj kev sim siab thiab kov yeej txhua txoj kev ntxias. Lub tuam tsev muab hom phiaj rau peb lub neej. Nws coj kev kaj siab los rau peb—tsis yog txoj kev kaj siab uas neeg muab tiam sis yog txoj kev kaj siab uas Vajtswv Leej Tub tau cog lus hais tias, “Kuv muab txoj kev kaj siab lug tso rau nej, txoj ntawd yog kuv txoj uas kuv muab pub rau nej: txoj uas kuv muab ntawd rau nej, tsis zoo li neeg ntiab teb txoj. Nej tsis txhob txhawj, thiab tsis txhob ntshai.”2
Muaj kev ntseeg loj heev nyob hauv Haiv Neeg Ntseeg hauv Hnub Nyoog Kawg. Tus Tswv muab cib fim rau peb saib peb puas yuav ua raws li Nws tej lus txib, seb peb puas yuav taug txoj kev uas tus Yexus Naxales tau taug, seb peb puas yuav hlub tus Tswv tag nrho peb lub siab lub ntsws, lub dag thiab lub zog, thiab hlub peb tej neeg zej zog ib yam li peb tus kheej.3
Kuv ntseeg zaj paj lug hais tias “Cia siab rau tus Tswv kom kawg koj lub siab lub ntsws; thiab txis txhob cia siab rau koj tej kev txawj ntse. Txhua yam uas koj ua koj yuav tsum nco ntsoov tus Tswv, nws thiaj yuav coj koj taug txoj kev uas yog txoj tseeb.”4
Ib txwm muaj li ntawd; yeej yuav zoo li ntawd tas mus li. Yog hais tias peb ua peb qhov dej num thiab tso siab plhuav rau tus Tswv, peb yuav mus puv nkaus Nws tej tuam tsev, tsis yog mus ua tej kab ke rau peb tus kheej xwb, tiam sis kuj muaj lub cib fim mus ua hauj lwm rau lwm tus thiab. Peb yuav txhos caug nyob ntawm tej thaj dawb ceev ua neeg sawv cev ua kev khi ua rau cov niam thiab cov txiv thiab tej me nyuam los ua ke ntev dhawv mus tas ib txhis. Tej tub hluas thiab ntxhais hluas li uas 12 xyoos muaj peev xwm mus ua tam rau cov uas tau tuag lawm es tseem tsis tau txais qhov koob hmoov ntawm txoj kev cai raus dej. Qhov no yog qhov uas peb Leej Txiv Saum Ntuj Ceeb Tsheej xav tau los ntawm nej thiab ntawm kuv.
Tau muaj ib qho txuj ci tseem ceeb
Ntau xyoo dhau los, muaj ib tug yawg suab uas txo hwj chim thiab muaj kev ntseeg heev uas yog Tij Laug Percy K. Fetzer. Lawv hu kom nws mus muab yawg suab tej koob hmoov rau cov mej zeej ntawm lub Koom Txoos uas nyob hauv Europe Sab Hnub Tuaj.
Tij Laug Fetzer tau mus rau hauv Poland teb chaws nyob rau lub sij hawm nyuaj thaud. Lawv muab tej ciaj ciam xov zoo zoo, thiab tsis pub ib tug pej xeem tawm li. Tij Laug Fetzer tau mus ntsib Haiv Neeg Ntseeg uas yog neeg Yelemes. Lawv twb mus tsis tau qhov twg lawm thaum lawv rov qab kho ciaj ciam teb chaws tom qab Tsov Rog Ntiaj Teb thib Ob thiab thaj av uas lawv nyob tau rais los mus ua Poland teb chaws lawm.
Peb tus thawj coj nyob hauv tag nrho Haiv Neeg Ntseeg ntawm cov neeg Yelemes yog Tij Laug Eric P. Konietz, nws nyob tid nrog nws tus poj niam thiab me nyuam. Tij Laug Fetzer tau muab cov yawg suab koob hmoov rau tus Kwv thiab Muam Konietz thiab cov me nyuam hlob zog.
Thaum tus Tij Laug Fetzer rov qab los rau hauv teb chaws Amelikas, nws tau hu xov tooj tuaj thiab nug seb puas kam nws tuaj xyuas kuv. Thaum nws zaum hauv kuv chav ua hauj lwm, nws tau pib quaj. Nws hais tias, “Tus Kwv Monson, thaum kuv tso tes rau saum tsev neeg Konietz taub hau, kuv tau cog ib cov lus uas yuav muaj tsis taus. Kuv cog lus rau tus Kwv thiab Muam Konietz hais tias nkawd yuav muaj peev xwm rov qab mus rau tim nkawd lub teb chaws Yelemes, thiab nkawd yuav tsis raug yuam los ntawm tej kev cai ntawm tej teb chaws uas kav lawv thiab hais tias nkawd yuav tau mus sib khi ua ke li ib tsev neeg nyob hauv tus Tswv lub tsev. Kuv cog lus rau nkawd tus tub hais tias nws yuav mus ua tub txib, thiab kuv cog lus rau nkawd tus ntxhais hais tias nws yuav tau sib yuav nyob hauv Vajtswv lub tuam tsev dawb huv. Koj thiab kuv paub hais tias vim luag kaw cov ciaj ciam teb chaws lawm, lawv yuav tsis muaj peev xwm txais tau cov koob hmoov ntawd. Kuv tau ua dab tsi li no?”
Kuv hais tias, “Tij Laug Fetzer, kuv paub koj zoo txaus los paub hais tias koj tau ua kiag qhov uas peb Leej Txiv Saum Ntuj Ceeb Tsheej tau xav kom koj ua ntag.” Wb ob leeg tau txhos caug ntawm kuv lub rooj ib sab thiab nchuav wb lub siab tawm rau peb Leej Txiv Saum Ntuj Ceeb Tsheej, hais tias tau muab ib co lus cog tseg rau ib tse neeg uas muaj kev ntseeg heev ntsig txog Vajtswv lub tuam tsev thiab lwm yam koob hmoov uas ziag no muab tsis tau rau lawv. Tsuas yog Nws xwb thiaj li ua tau qhov txuj ci tseem ceeb uas peb xav tau.
Tau muaj qhov txuj ci tseem ceeb. Cov thawj coj ntawm tseem fwv Poland thiab cov thawj coj ntawm cov Neeg Yelemes tau suam ib tsab cai pom zoo cia cov pej xeem Yelemes uas los khuam rau hauv qhov chaw ntawd mus lawm hauv Yelemes Sab Hnub Poob. Tus Kwv thiab tus Muam Konietz thiab nkawd cov me nyuam tau tsiv mus nyob hauv Yelemes Sab Hnub Poob, thiab Kwv Konietz rais los mus ua tus npis sov rau pawg ntseeg uas lawv los nyob rau hauv.
Tag nrho Konietz tsev neeg tau mus rau hauv lub tuam tsev dawb huv hauv Switzerland. Thiab leej twg yog tus thawj tswj hwm ntawm lub tuam tsev uas hnav ib ce khaub ncaws xuv dawb paug uas tau nrab tes hu tos txais lawv? Twb yog Percy Fetzer—tus yawg suab uas tau cog lus rau lawv. Ziag no, vim nws yog tus thawj tswj hwm rau Bern Switzerland lub Tuam Tsev, nws tau tos txais lawv mus rau hauv tus Tswv lub tsev, ua kom cov lus cog tseg ntawd muaj tiav, thiab tau muab leej txiv thiab leej niam sib khi ua ke thiab muab cov me nyuam khi ua ke nrog lawv niam thiab txiv.
Lub sij hawm los txog thiab tus ntxhais hluas tau sib yuav nyob hauv tus Tswv lub tsev. Tus tub hluas tau txais nws qhov kev hu mus ua tub txib thiab tau ua tiav.
“Peb mam ntsib koj nyob hauv lub tuam tsev!”
Rau peb ib txhia mas peb txoj kev mus rau tom lub tuam tsev tsuas yog ob peb block kev xwb. Rau lwm cov mas yuav tau hla hiav txwv thiab mus deb deb mam tau mus nkag rau hauv Vajtswv lub tuam tsev dawb huv.
Ob peb xyoos dhau los, ua ntej lawv ua lub tuam tsev nram South Africa tiav, thaum peb mus koom ib lub rooj sab laj ntawm cheeb tsam hauv Salisbury, Rhodesia, kuv tau ntsib tus thawj tswj hwm ntawm cheeb tsam hu ua Reginald J. Nield. Nws thiab nws tus poj niam thiab cov ntxhais tau ntsib kuv thaum kuv nkag mus hauv lub tsev koom txoos. Lawv piav rau kuv hais tias lawv tau khawv lawv tej nyiaj thiab tau npaj rau hnub uas lawv yuav mus tau rau tim tus Tswv lub tuam tsev. Tiam sis mas, auj, lub tuam tsev nyob kev deb ua luaj.
Thaum xaus lub rooj sab laj lawm, lawv plaub tug ntxhais nug kuv txog lub tuam tsev tias: “Lub tuam tsev zoo li cas? Peb tsuas tau pom daim duab xwb.” “Peb yuav xav li cas thaum peb nkag mus hauv lub tuam tsev?” “Peb yuav nco txog dab tsi tshaj plaws?” Kuv tau muaj lub cib fim tham li ib teev nrog plaub tus ntxhais no txog tus Tswv lub tsev. Thaum kuv ncaim mus rau tim lub tshav dav hlau lawm, lawv co tes rau kuv, thiab tus ntxhais ntxawm hais tias, “Peb mam ntsib koj nyob hauv lub tuam tsev!”
Ib xyoos tom qab kuv tau muaj lub cib fim hu tos txais tsev neeg Nield nyob hauv Salt Lake Tuam Tsev. Nyob hauv ib chav tsev sib khi tsev neeg ua ke uas kaj siab lug, kuv tau muaj lub cib fim los muab Kwv thiab Muam Nield nkawd txis ua ke tiam no thiab mus ib txhis li. Ces tom qab ntawd lub qhov rooj tau qhib, thiab cov ntxhais zoo nkauj, lawv txhua tus hnav ib ce dawb paug, lawv txawm nkag los. Lawv khawm leej niam tag ces ho mus khawm leej txiv. Lawv tej kua muag teev yees, thiab kev ua tsaug nyob hauv lawv lub siab. Peb nyob ze ze rau ceeb tsheej ntuj thaum ntawd. Lawv txhua tus muaj peev xwm hais tias, “Ziag no peb yog ib tsev neeg mus tas ib txhis.”
Qhov no yog qhov koob hmoov zoo kawg nkaus uas tos rau cov uas tuaj rau hauv lub tuam tsev. Thov kom peb txhua tus ua lub neej tsim nyog, kom txhais tes huv thiab lub siab dawb paug, xwv lub tuam tsev thiaj yuav chwv peb lub neej thiab peb tsev neeg.
Ceeb tsheej ntuj nyob hov deb? Kuv ua tim khawv hais tias nyob hauv lub tuam tsev dawb huv mas nws twb tsis deb kiag li—vim twb yog nyob hauv tej chaw dawb ceev no es ceeb tsheej ntuj thiab ntiaj teb sib cuag thiab peb leej Txiv Saum Ntuj Ceeb Tsheej muab nws cov koob hmoov uas zoo tshaj plaws rau nws cov me nyuam.
© 2010 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/09. Pub txhais ua lus Hmoob: 6/09. Kev txhais First Presidency Message, October 2010. Hmong. 09370 295