Cov Mus Xyuas tom Tsev tsab Xov, Kaum Hli Ntuj 2010
Lub Tuam Tsev Dawb Huv
Nyob hauv tej tuam tsev, cov mej zeej ntawm lub Koom Txoos uas ua rau lawv tus kheej mus tau rau sab haud muaj peev xwm ua tau tej kab ke cawm neeg uas siab tshaj plaws uas tau muab qhia tshwm los rau noob neej.
Nyob hauv tej tuam tsev peb muaj peev xwm ua tau tej kab ke cawm neeg uas siab tshaj plaws
Muaj ntau lub ntsiab uas tsim nyog ib tug neeg yuav xav mus rau hauv lub tuam tsev. Lub tuam tsev sab nraud los yeej qhia tau tej hom phiaj ntawm sab ntsuj plig heev. Nws qhia tau ntau dua nyob rau sab haud. Nyob sab saum lub qhov rooj tuam tsev muaj lus sau tias “Kev Dawb Huv rau tus Tswv.” Thaum nej nkag mus rau hauv ib lub tuam tsev twg uas tau muab fij rau Vajtswv lawm, ces yog nej nyob hauv tus Tswv lub tsev ntag.
Nyob hauv tej tuam tsev, cov mej zeej ntawm lub Koom Txoos uas ua rau lawv tus kheej tsim nyog muaj peev xwm ua tau tej kab ke cawm neeg uas siab tshaj plaws uas tau muab qhia tshwm los rau noob neej. Nyob rau haud, los ntawm tej kab ke dawb ceev, yuav muab ib tug neeg ntxuav thiab pleev roj thiab qhia thiab muab vaj txiaj ntsim thiab khi ua ke. Thiab thaum peb tau txais tej koob hmoov no rau peb tus kheej lawm, peb mus ua tau rau cov uas tuag lawm es tsis tau muaj lub cib fim txais tib qho koob hmoov ntawd. Nyob hauv tej tuam tsev luag ua tej kab ke dawb ceev rau cov tseem nyob thiab rau cov uas tuag lawm tib yam nkaus.
Tej kab ke thiab tej kev cai ntawm lub tuam tsev mas yooj yim, zoo nkauj, thiab dawb ceev
Yog ua zoo nyeem tej vaj lug kub ces lawv qhia hais tias tus Tswv tsis tau qhia txhua yam rau neeg sawv daws. Muaj ib co kev tsim nyog uas yuav tsum xub ua ua ntej tau txais tej kev qhia dawb ceev. Tej kab ke hauv lub tuam tsev yeej zoo li no.
Peb tsis tham txog tej kab ke ua hauv lub tuam tsev nyob rau sab nraud. Nws tsis yog txhob txwm kom tej kev paub txog tej kab ke hauv lub tuam tsev tsuas yog cia rau ob peb tug uas yuav xyuas kom lwm cov tsis txhob tau kawm txog tej ntawd. Nws twb tsis yog zoo li ntawd. Peb sib zog pab thiab yaum kom txhua tus yuav npaj thiab ua kom tsim nyog mus hauv lub tuam tsev. Cov uas tau mus hauv lub tuam tsev los lawm tau kawm ib qho hais tias: Muaj ib hnub txhua tus neeg uas tseem nyob thiab txhua tus uas tau los nyob hauv ntiaj teb yuav muaj lub cib fim hnov txoj moo zoo thiab txais los sis xyeej tej uas lub tuam tsev pub tau. Yog hais tias lub cib fim no raug xyeej, txoj kev xyeej yuav tsum yog rau tus ntawd tib leeg.
Tej kab ke thiab tej kev cai ntawm lub tuam tsev mas yooj yim. Tej ntawd zoo nkauj heev. Tej ntawd dawb ceev heev. Peb muab tej ntawd ceev twj ywm tsam yuav lam muab qhia rau cov uas tsis tau npaj txhij. Txoj kev lam xav paub tsis yog ib txoj kev npaj. Txoj kev xav xav paub xwb nws tsis yog ib qho kev npaj. Kev npaj rau tej kab ke mas muaj ntau theem yuav tsum xub xub ua: kev ntseeg, kev hloov siab lees txim, kev cai raus dej, kev pom zoo, kev tsim nyog, kev paub tab thiab kev zoo tsim nyog zoo li ib tug neeg uas tau muab caw tuaj mus rau hauv tus Tswv lub tsev.
Cov uas tsim nyog ces nkag tau rau hauv lub tuam tsev
Tag nrho cov uas yeej tsim nyog thiab yeej zoo txaus lawm ces nkag tau mus rau hauv lub tuam tsev, mus kawm tej kab ke thiab kev cai uas dawb ceev.
Thaum uas nej muaj siab rau tej kev muaj nuj nqis ntawm lub tuam tsev tej koob hmoov thiab tej kab ke uas dawb ceev heev uas ua nyob hauv lub tuam tsev lawm, nej yuav tsis xav nug txog txoj kev tso cai ntawm tus Tswv ntsig txog txoj kev nkag mus rau hauv lub tuam tsev dawb huv lawm.
Nej yuav tsum muaj ib daim ntawv tso cai tij lim es lawv thiaj cia nej mus rau hauv lub tuam tsev. Daim ntawv tso cai no yuav tsum raug kos npe los ntawm cov thawj coj raws cai ntawm lub Koom Txoos. Tsuas yog cov uas tsim nyog yuav tau mus hauv lub tuam tsev. Nej tus npis sov los yog ceg ntseeg tus thawj tswj hwm muaj qhov ntiag tug xyuas mus rau hauv nej txoj kev tsim nyog ua ntej nej txais nej daim ntawm tso cai mus hauv lub tuam tsev. Txoj kev xam phaj no mas tseem ceeb heev, vim yog ib lub cib fim xyuas saib nej lub neej zoo li cas nrog tus Tswv ib tug tub txib uas nws muab tsa los. Yog hais tias tshuav dab tsi nyob hauv nej lub neej, tus npis sov yuav muaj peev xwm pab nej kho rau. Los ntawm tus txheej txheem no, nej muaj peev xwm qhia tau los yog txais tau kev pab kom nej tsim nyog nkag mus rau hauv lub tuam tsev nrog tus Tswv txoj kev pom zoo.
Txoj kev xam phaj rau daim ntawv tso cai mus hauv lub tuam tsev mas ua ntsiag to nyob ntawm tus npis sov thiab ntawm tus mej zeej xwb. Nyob rau qhov no yuav muab tej lus nug los nug tus mej zeej ntsig txog nws lub neej, kev tsim nyog, thiab kev ncaj ncees rau lub Koom Txoos thiab tej thawj coj. Tus neeg yuav tsum ua tim khawv hais tias nws yeej huv thiab yeej coj Lo Lus Txawj Ntse, them nyiaj ib feem kaum puv npo, ua neej haum xeeb nrog tej kev qhia ntawm lub Koom Txoos, thiab tsis koom siab nrog ib pawg neeg twg uas tso txoj kev ntseeg tseg. Tus npis sov twb raug qhia lawm hais tias txoj kev ceev twj ywm tsis qhia leej twg txog tej uas tau tham nrog tus tuaj xam phaj mas yog ib qho uas tseem ceeb tshaj plaws li.
Tej lus teb uas zoo txaus rau tus npis sov tej lus nug yuav qhia tias tus neeg ntawd tsim nyog mus txais ib daim ntawv tso cai mus hauv lub tuam tsev. Yog hais tias nws tsis coj tej lus txib los yog muaj ib yam dab tsi tsis tau kho ntsig txog nws lub neej uas yuav tsum tau kho kom ncaj tso, ces nws yuav tsum tau hloov siab lees txim tiag tiag los qhia tso ua ntej yuav muab ib daim ntawv tso cai mus hauv lub tuam tsev.
Tom qab tus npis sov tau coj ib qho kev xam phaj zoo li no lawm, tus thawj tswj hwm ntawm ceg txheem ntseeg yuav tau xam phaj tib yam li no rau nej thiab ua ntej yuav tau txais nej daim ntawv tso cai mus hauv lub tuam tsev.
Kev qhia hauv lub tuam tsev muaj kev piv txog
Ua ntej mus rau hauv lub tuam tsev thawj zaug, los sis tom qab ntau zaus lawm, yuav pab nej kawm paub hais tias tej kev qhia nyob hauv tej tuam tsev mas lawv qhia raws tej kev piv txog. Tus Tswv, tus Xib Hwb, tau muab nws tej kev qhia zoo li no.
Lub tuam tsev yog ib qho chaw kawm zoo kawg. Nws yog ib lub tsev ntawm kev kawm. Nyob hauv tej tuam tsev lawv ceev tej chaw kom zoo haum rau kev qhia txog tej yam uas tob heev ntawm sab ntsuj plig. Tus Txwj Laug John A. Widtsoe ntawm Pawg Kaum Ob tug Thwj Tim uas tso ntiaj teb no tseg lawm tau yog ib tug thawj tswj hwm rau tsev kawm ntawv qib siab thiab yog ib tug kws sau ntawv uas neeg ntiaj teb paub. Nws muaj kev hwm rau tej hauj lwm ua hauv tuam tsev heev thiab muaj ib zaug nws tau hais tias:
“Lub tuam tsev tej kab ke muaj tag nrho txoj kev cawm seej, ib yam li cov thawj coj ntawm lub Koom Txoos qhia ib lub sij hawm rau ib lub, thiab txhais tej yam uas nyuaj to taub. Tsis tas yuav muab tej kev qhia ntawm lub tuam tsev hloov los yog pauv es kom haum nrog rau txoj kev cawm seej. Lub tswv yim ntawm qhov vaj txiaj ntsim uas txhij txhua yog ib yam puav pheej loj heev uas qhia tias lub tuam tsev tej kab ke muaj tseeb tiag. Tsis tas li ntawd xwb, txoj kev ntsuam xyuas huv si no thiab kev piav txog Txoj Moo Zoo, ua rau kev teev tiam hauv lub tuam tsev yog ib qho kev tij lim tshaj plaws los ua rau yus nco qab ntsoov ntsig txog txoj Moo Zoo” (“Temple Worship,” Utah Genealogical and Historical Magazine, Apr. 1921, 58).
Yog thaum nej mus tim lub tuam tsev es nco ntsoov hais tias tej kev qhia yog ua piv txwv, yog nej npaj kom zoo thaum nej rov qab tawm hauv los nej yuav pom tau deb ntxiv, yuav ua rau nej txhawb siab zog tuaj, thiab yuav paub ntxiv txog tej yam ntawm sab ntsuj plig. Lub hom phiaj kev qhia mas zoo heev. Yog kev tshoov siab. Tus Tswv Tus Kheej kiag, uas yog tus Tswv Xib Hwb, tau nquag nquag qhia Nws cov thwj tim nrog tej lus piv txwv—yog ib txoj kev hais lus piav tej kev piv txwv uas yuav nyuaj to taub yog tsis ua li ntawd.
Lub tuam tsev rais los mus ua ib qho piv txwv. Yog hais tias nej tau pom ib lub tuam tsev hmo ntuj, es taws teeb tag nrho, nej yuav paub hais tias nws zoo nkauj npaum li cas. Tus Tswv lub tsev, ci ntsa iab, nyob hauv qhov tsaus ntuj nti, rais los mus ua ib qho piv txwv ntawm lub hwj chim ntawm Yexus Khetos txoj moo zoo sawv ib yam li ib lub teeb nyob hauv lub ntiaj teb uas pheej tog zuj zus rau txoj kev tsaus ntuj.
Thaum mus rau hauv lub tuam tsev, nej hloov nej cov khaub ncaws ua hauj lwm los mus rau lub tuam tsev cov khaub ncaws dawb. Txoj kev hloov khaub ncaws no yog hloov nyob hauv chav hloov khaub ncaws, uas txhua tus muaj ib kem chaw xauv thiab ib kem thaiv tag nrho los hloov khaub ncaws. Nyob hauv lub tuam tsev peb yeej ua raws nraim li txoj ntsiab cai qhia tias yuav tsum npog lub cev. Thaum nej muab nej tej khaub ncaws xauv rau hauv kem chaw xauv, nej tso nej tej kev nyuaj siab thiab kev txhawj xeeb tseg nrog tej ntawd. Nej tawm hauv chav hloov khaub ncaws no los nrog ib ce dawb paug, thiab nej xav li tias sawv daws zoo ib yam, vim sawv daws ib puag ncig yus hnav zoo tib yam nkaus.
Txoj kev sib yuav hauv tuam tsev yog txoj kab ke tseem ceeb tshaj plaws nyob hauv lub tuam tsev
Nej cov uas xav mus sib yuav hauv lub tuam tsev tej zaum nej yuav xav paub seb muaj dab tsi ntxiv. Peb tsis qog tej lus ntawm txoj kab ke sib yuav sib khi ua ke tawm sab nraum lub tuam tsev, tiam sis peb piav tau chav uas ua kev cai sib khi ua ke ntawd hais tias zoo nkauj heev, ntsiag to thiab muaj tus ntsuj plig heev, thiab dawb huv los ntawm qhov hauj lwm dawb ceev uas ua nyob hauv.
Ua ntej khub niam txiv los rau ntawm lub thaj los ua txoj kab ke sib khi ua ke, ces tus uas coj muaj cib fim hais ib co lus ntuas thiab nkawm niam txiv muaj cib fim khaws cia. Tej no yog ib txhia lus lawv hais uas nkawm niam txiv hluas yuav hnov rau txoj kab ke no.
“Hnub no yog hnub uas neb sib yuav. Neb muaj kev xav ntau rau neb txoj kev sib yuav. Tej tuam tsev yog chaw zoo kawg nkaus ua tej kab ke uas zoo li qhov no. Peb tsis nyob hauv lub ntiaj teb. Tej yam ntawm lub ntiaj teb tsis muaj ntawm no thiab tsim nyog tsis muaj hwj chim tshoov tej peb ua ntawm no. Peb tau tawm hauv ntiaj teb tuaj rau hauv tus Tswv lub tuam tsev. Hnub no rais los mus ua hnub tseem ceeb tshaj plaws nyob hauv neb lub neej.
“Neb tau yug los mus rau hauv lub ntiaj teb, los ntawm cov niam thiab txiv uas tau npaj lub cev nqaij daim tawv rau neb ob tug ntsuj plig nyob. Neb puav leej tau ua kev cai raus dej lawm. Kev cai raus dej, yog ib qho kab ke dawb ceev, ib qho kev piv txwv ntawm kev ntxuav kom huv, piv txwv txog kev tuag thiab kev sawv rov los, piv txwv txog kev tawm los es muaj ib lub neej tshiab. Ua rau neb xav txog kev hloov siab lees txim thiab kev zam txim rau tej kev txhaum. Lub cim nco txog ntawm tus Tswv Pluas Hmo yog ib qho kev txuas txoj kev khi lus ntawm txoj kev cai raus dej, thiab yog peb coj nws es peb muaj peev xwm txais tau txoj kev zam txim rau peb tej kev txhaum.
“Koj, tus uas yog nraug vauv, twb raug tsa rau lub pov thawj hwj lawm. Koj xub xub tau txais lub Pov thawj hwj Aloos thiab tej zaum tau loj hlob mus dhau tag nrho cov hauj lwm ntawd—dis kas, xib hwb, thiab pov thawj. Ces sij hawm tau los thaum uas pom tias koj tsim nyog los mus txais lub Pov Thawj Hwj Mekixedes. Lub pov thawj hwj ntawd, uas yog lub pov thawj hwj siab zog, hu ua lub pov thawj hwj raws li tus txheej txheem dawb huv tshaj plaws ntawm Vajtswv, los sis lub Pov thawj hwj Dawb Huv raws tus Txheej Txheem ntawm Vajtswv Leej Tub (saib Amas 13:18; Hilamas 8:18; Lus Qhuab Qhia thiab Kev Khi Lus 107:2–4). Luag tau tsa koj rau ib txoj hauj lwm ntawm lub pov thawj hwj. Ziag no koj yog ib tug txwj laug.
“Neb ob leeg puav leej tau txais neb vaj txiaj ntsim lawm. Nyob rau hauv qhov vaj txiaj ntsim ntawd neb tau txais ib qho kev cia siab rau tej uas yuav nyob mus ib txhis. Tiam sis tag nrho tej yam no, yog muaj ua ntej thiab muaj npaj neb txoj kev los mus rau ntawm lub thaj no los mus sib khi ua ke ua tus txiv thiab tus poj niam rau tiam no thiab nyob mus ib txhis li. Ziag no neb rais los ua ib tsev neeg, muaj kev ywj siab ua kom tsim neeg, muaj peev xwm sib hlub thiab fij siab kom coj tau tej me nyuam los rau hauv lub ntiaj teb thiab yug thiab saib lawv kom zoo thaum lawv ua neej; kom muaj ib hnub lawv tuaj txais tej kab ke dawb ceev ntawm lub tuam tsev no li neb tau tuaj txais.
“Neb zoo siab hlo tuaj thiab twb tau muab neb pom zoo hais tias neb tsim nyog. Txoj kev ib leeg txais yuav ib leeg nyob ntawm txoj kev sib yuav txoj kev khi lus mas yog ib qho ntiag tug loj heev, tus uas tau tej koob hmoov nrog uas yeej suav tsis tas.”
Lub hwj chim khi yuav muab khi ua ke thaum nyob hauv ntiaj teb thiab thaum nyob saum ntuj
Yog hais tias peb to taub lub keeb kwm thiab cov lus qhuab qhia ntawm tej hauj lwm hauv lub tuam tsev, peb yuav tsum to taub hais tias lub hwj chim khi yog dab tsi. Peb yuav tsum pom me ntsis hais tias yog vim li cas cov yuam sij ntawm txoj cai los mus siv lub hwj chim khi no yuav tseem ceeb ua luaj.
“Yexus mus pem lub xeev uas nyob ze ze lub moos Xixaleyas Filipis. Thaum ntawd nws nug nws cov thwj tim hais tias, Tej neeg hais tias Neeg Leej Tub yog leej twg? …
“Ximoos Petus teb hais tias, Koj yog tus Mexiyas uas yog tus Vajtswv muaj sia zees nyob Leej Tub.
“Yexus hais rau nws hais tias, Yaunas tus tub Ximoos es, koj hmoov zoo. Tej lus no tsis yog neeg qhia rau koj, tiam sis yog kuv Txiv tus uas nyob saum ntuj ceeb tsheej qhia rau koj.
“Kuv qhia rau koj hais tias, koj yog Petus, kuv yuav tsa cov neeg uas ntseeg kuv rau saum lub pob zeb no. Txawm yog kev tuag los yuav kov tsis yeej cov ntseeg ntawd.
“Kuv yuav muab cov yuam sij ntawm ntuj ceeb tsheej lub nceeg vaj rau koj tuav: thiab yam uas koj muab khi ua ke nyob hauv ntiaj teb no yuav raug muab khi ua ke nyob saum ntuj ceeb tsheej: thiab yam uas koj muab daws nyob hauv ntiaj teb no yuav raug muab daws nyob saum ntuj ceeb tsheej” (Mathais 16:13, 16–19).
Petus tau yog tus uas tuav cov yuam sij. Petus tau yog tus uas tuav lub hwj chim khi, txoj cai ntawd uas muaj lub hwj chim muab khi ua ke nyob hauv ntiaj teb no los yog muab daws nyob hauv ntiaj teb no ces yuav muaj li ntawd nyob saum ntuj. Cov yuam sij ntawd yog muab rau tus Thawj Tswj Hwm ntawm lub Koom Txoos—rau tus yaj saub, tus pom tau, thiab tus txais kev tshwm sim. Lub hwj chim khi uas dawb ceev ntawd twb muaj nrog lub Koom Txoos ziag no. Tsis muaj dab tsi uas cov neeg paub qhov tseem ceeb ntawm txoj cai no saib dawb ceev tshaj li qhov no. Tsis muaj dab tsi uas yuav ua zoo tuav tshaj qhov no. Muaj tsawg tsawg tus txiv neej thiaj tau muab lub hwj chim no rau tuav nyob rau ib lub sij hawm twg hauv ntiaj teb no—nyob hauv txhua lub tuam tsev muaj ob peb tug kwv tij thiaj tuav lub hwj chim khi no xwb. Tsis muaj leej twg yuav tau lub hwj chim ntawd, tsuas yog los ntawm tus yaj saub, tus pom tau, thiab tus txais kev tshwm sim thiab Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg xwb.
Tus Yaj Saub Yauxej Xamiv tau hais tias luag nquag nquag nug nws hais tias “‘Yuav tsis tau kev cawm dim yog tsis mus ua txhua txoj kab ke ntawd los?’ Kuv yuav teb hais tias, Tsis tau, tsis tau txoj kev cawm seej tag nrho. Yexus tau hais tias, ‘Kuv Txiv lub tsev muaj chaw ntau rau sawv daws nyob, kuv tab tom yuav mus tu chaw tseg cia rau nej nyob’ [Saib Yauhas 14:2. Lub tsev ntawm no tiag tiag yuav tsum txhais hais tias nceeg vaj; thiab tus neeg twg tau nce nto qho chaw uas siab tshaj plaws yuav tsum tau coj tej kev cai xi-le-thi-aus, thiab tag nrho tej kev cai thiab” (hauv History of the Church,, 6:184).
Tej hauj lwm hauv tuam tsev yog ib yam hwj chim ntawm sab ntsuj plig
Tej tuam tsev yog qhov nruab nrab ntawm lub Koom Txoos lub zog ntawm sab ntsuj plig. Peb yuav tsum paub hais tias tus yeeb ncuab yeej yuav los cuam tshuam peb kev li uas lub Koom Txoos thiab peb txhua tus thaum peb nrhiav kev mus ua tej hauj lwm dawb ceev no. Tej hauj lwm hauv tuam tsev muaj kev fab ntxeev heev vim nws yog ib yam uas muaj hwj chim ntawm sab ntsuj plig heev rau Haiv Neeg Ntseeg hauv Hnub Nyoog Kawg thiab rau tag nrho lub Koom Txoos.
Thaum lawv fij tus ncej zeb tag rau lub tuam tsev hauv Logan Utah, Thawj Tswj Hwm George Q. Cannon, thaum ntawd nyob hauv Thawj Pawg Thawj Tswj Hwm, nws tau hais cov lus no:
“Txhua lub pob zeb hauv paus uas tau muab teeb ua ib lub Tuam Tsev, thiab txhua lub Tuam Tsev uas tau ua tiav raws li tus txheej txheem tus Tswv tau qhia los rau nws lub Pov thawj hwm, yuav ua kom Xatas lub hwj chim me zog nyob hauv ntiaj teb no, thiab ua rau Vajtswv lub hwj chim thiab txoj kev zoo loj zog tuaj, tau muab lub ntuj sib zog tig rau peb sab, ua thiab nqus tus Vajtswv uas nyob mus ib txhis tej koob hmoov los rau peb, thiab cov uas nyob ntawm lawv xub ntiag” (hauv “The Logan Temple,” Millennial Star, Kaum Ib Hlis Ntuj 12, 1877, 743).
Thaum cov mej zeej ntawm lub Koom Txoos muaj kev nyuaj siab los yog thaum muaj ib qho kev txiav txim siab loj es ntxov siab, nws yog ib lub sij hawm uas lawv yuav mus rau hauv lub tuam tsev. Nws yog ib qhov chaw zoo coj peb tuaj kev nyuaj siab mus rau. Nyob hauv lub tuam tsev peb muaj peev xwm txais tau tej kev pom rau ntawm sab ntsuj plig. Nyob haud, thaum lub sij hawm ua tej hauj lwm, peb twb “tsis nyob hauv ntiaj teb.”
Tej lub sij hawm peb lub siab hnyav nrog tej teeb meem thiab muaj ntau yam sib txeeb kom peb ua rau tib lub sij hawm ces peb tsis muaj peev xwm xav kom tshab thiab pom kom meej. Nyob hauv lub tuam tsev tej kev cuam tshuam zoo li ploj tawm lawm, zoo li tej huab tau yaj mus lawm, thiab peb muaj peev xwm “pom tau” tej yam uas peb pom tsis tau yav tas los thiab nrhiav tau kev daws peb tej teeb meem uas yav tas los tsis paub.
Tus Tswv yuav foom koob hmoov rau peb thaum peb mus ua tej kab ke dawb ceev nyob hauv lub tuam tsev. Tej koob hmoov haud yuav tsis yog los rau tej hauj lwm peb ua nyob hauv tuam tsev xwb. Peb yuav tau koob hmoov rau txhua yam peb yuav ua.
Peb tej hauj lwm hauv lub tuam tsev thaiv peb yam li daim hlau thiab ib txog kev thaiv
Tsis muaj ib txog hauj lwm uas thaiv tau zoo tshaj rau lub Koom Txoos no dua li tej hauj lwm hauv lub tuam tsev thiab tsev neeg keeb puam uas txhawb tej hauj lwm ntawd. Tsis muaj dab tsi uas zoo tshaj rau ntawm sab ntsuj plig. Tsis muaj ib yam hauj lwm peb ua uas muab tau hwj chim tshaj rau peb li qho no. Tsis muaj ib yam hauj lwm uas yuav tsum muaj txoj kev ncaj ncees tshaj qhov no.
Peb tej hauj lwm hauv lub tuam tsev thaiv peb yam li daim hlau thiab ib qho kev thaiv, rau peb txhua tus thiab rau peb haiv neeg.
Yog li ntawd tuaj mus rau hauv lub tuam tsev—tuaj thiab txais nej tej koob hmoov. Nws yog ib txog hauj lwm dawb ceev.
© 2010 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/09. Pub txhais ua lus Hmoob: 6/09. Kev txhais Visiting Teaching Message, October 2010. Hmong. 09370 295