Koj txoj Kev Mus rau lub Tuam Tsev

Koj puas paub hais tias lub tuam tsev twg nyob ze koj tshaj plaws? Kos ib daim duab txog lub tuam tsev ntawd, thiab muab daim duab dai rau ib qho chaw uas koj yuav pom tau txhua hnub.

Lub tuam tsev yog tus Tswv lub tsev. Yog ib qho chaw rau peb kawm txog Leej Txiv Saum Ntuj Ceeb Tsheej, khi lus (los sis cog lus) nrog Nws, thiab txais tau tej koob hmoov zoo heev. Nyob hauv lub tuam tsev peb ua tej hauj lwm tseem ceeb heev rau peb tus kheej thiab rau peb cov neeg uas tau tuag lawm. Tej hauj lwm uas ua tau hauv lub tuam tsev yog ua kev cai raus dej rau cov uas tau tuag lawm, txais lub vaj txiaj ntsim, thiab ua kev cai sib khi. Tej no hu ua tej kab ke hauv lub tuam tsev.

Ua Dab Tsi hauv lub Tuam Tsev

Kev Cai Raus Dej rau cov uas Tau Tuag Lawm

Thaum koj muaj yim xyoo, koj ua tau kev cai raus dej thiab ua kev pom zoo los ua ib tug mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Nej muaj coob tug poj koob yawm txwv uas tuag lawm es tsis tau ua kev cai raus dej thiab ua kev pom zoo. Txawm hais tias lawv lub cev tuag lawm los, lawv tus ntsuj plig muaj sia nyob hauv lub ntuj ntsuj plig ces mam li qhia tau Yexus Khetos txoj moo zoo rau lawv.

Thaum koj muaj kaum ob xyoos, koj mus tau rau hauv lub tuam tsev thiab mus pab ua kev cai raus dej thiab ua kev pom zoo sawv lawv cev. Ces lawv yeej muaj kev xaiv saib lawv puas yuav txais txoj kev ua kev cai raus dej thiab kev pom zoo no. Koj yuav tau hnav dawb thaum koj ua kev cai raus dej rau cov uas tau tuag lawm, ib yam nkaus li koj hnav dawb thaum koj ua kev cai raus dej rau koj tus kheej.

Hais kom koj niam thiab txiv pab koj sau cov npe ntawm nej cov neeg uas tau tuag lawm uas tsis tau ua kev cai rau dej rau hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Nrhiav saib puas tau muaj leej twg mus rau hauv lub tuam tsev mus ua kev cai raus dej rau lawv.

Vaj Txiaj Ntsim

Ib txoj koob hmoov zoo tshaj plaws hauv lub tuam tsev yog lub vaj txiaj ntsim. Vaj Txiaj Ntsim txhais tau tias “khoom plig.” Thaum koj txais koj lub vaj txiaj ntsim, koj yuav kawm ntxiv txog txoj kev cawm seej thiab ua kev khi lus. Tej kev khi lus yog tej lus peb cog tsegnrog Leej Txiv Saum Ntuj Ceeb Tsheej. Thaum koj ua raws li tej kev khi lus, ces koj npaj tias muaj ib hnub twg koj yuav mus nrog Leej Txiv Saum Ntuj Ceeb Tsheej thiab Yexus Khetos nyob.

Nyob hauv lub tuam tsev muaj ib chav zoo nkauj heev thiab nyob kaj siab lug uas hu ua chav xilethi-aus. Nyob hauv chav xilethi-aus no peb nyob tau ze rau Leej Txiv Saum Ntuj Ceeb Tsheej thiab Yexus Khetos, thiab peb nyob tau li uas peb nrog Nkawd nyob hauv lub nceeg vaj xilethi-aus.

Kev Sib Khi rau lub Neej No thiab lub Neej Nyob Mus Ib Txhis.

Thaum ib tug txiv neej thiab ib tug poj niam sib yuav huav lub tuam tsev, nkawd txhos caug ntawm lub thaj ces sib khi rau lub neej no thiab lub neej nyob mus txhis. Nov txhais hais tias nkawd thiab nkawd cov me nyuam yuav sib koom ua ib tse neeg nyob mus ib txhis. Npaj siab tias muaj ib hnub twg koj mus sib yuav hauv lub tuam tsev. No yog ib txoj koob hmoov tshaj plaws ntawm lub tuam tsev.

Daim Ntawv Tso Cai Nkag Tuam Tsev

Lub tuam tsev yog ib qho chaw dawb huv. Cov npisov thiab cov ceg ntseeg thawj tswj hwm yuav ua tib zoo saib hais tias cov neeg uas mus rau hauv lub tuam tsev yuav tsum npaj zoo zoo thiab tsim nyog. Ua ntej koj yuav mus rau hauv lub tuam tsev koj yuav xam phaj zoo nrog tus npisov los sis ceg txheem ntseeg tus thawj tswj hwm. Nws yuav nug koj saib koj puas muaj ib zaj lus tim khawv txog lub Koom Txoos, puas ua raws li tej lus txib, puas txhawb nqa cov thawj coj hauv lub Koom Txoos, puas ua raws li Txoj Lus Txawj Ntse, puas them ib feem kaum, thiab puas ua raws li kev tseeb thiab hais lus tseeb. Nws yuav pab koj paub tias koj yuav tsum ua li cas kom koj thiaj li tsim nyog mus tau rau hauv lub tuam tsev.

Npaj Tam Sim No Mus Rau hauv lub Tuam Tsev

Leej Txiv Saum Ntuj Ceeb Tsheej foom koob hmoov ntau heev rau cov uas ua neej ncaj ncees thiab mus rau hauv lub tuam tsev. Tseem ceeb heev uas koj npaj mus rau hauv lub tuam tsev thaum koj tseem yau yau.

Leej Txiv Saum Ntuj Ceeb Tsheej hlub koj thiab xav kom koj txais tau tej koob hmoov hauv lub tuam tsev. Nws yuav foom koob hmoov rau koj thaum koj ua tej kab ke hauv lub tuam tsev rau koj tus kheej thiab rau lwm tus. Txawm hais tias tam sim no koj mus tsis tau rau hauv lub tuam tsev, los yog tias muaj ib lub tuam tsev nyob ze koj, ces koj yeej mus ncig tau nraum zoov thiab hnov tau tus ntsuj plig. Khaws ib daim duab txog lub tuam tsev cia rau hauv koj lub tsev kom thiaj pab koj nco ntsoov tias lub tuam tsev tseem ceeb npaum li cas. Ua lub neej ncaj ncees kom koj thiaj li tsim nyog mus rau hauv tus Tswv lub tsev.

Saib hauv daim iav hauv daim duab no. Tej chav sib khi muaj iav zoo li no. Vim txoj kev sib khi hauv lub tuam tsev, peb tsev neeg, zoo ib yam li pom hauv daim iav no, yuav nyob mus ib txhis.

Saib daim duab txog chav xilethi-aus no thiab daim duab nyob rau phab 64. Koj xav li cas thaum koj pom chav xilethi-aus?

Lub Tuam Tsev Boston Massachusetts Fij tseg thaum lub Kaum Hli Ntuj 1, 2000.

Chav xilethi-aus, lub Tuam Tsev Aba Nigeria.

Chav xilethi-aus, lub Tuam Tsev Nuku’alofa Tonga.