Mensahe ti Umuna a Panguluen, Oktubre 2010
Dagiti Bendision ti Templo
Ti templo ket mangipaay iti panggep para kadagiti biagtayo. Mangyeg daytoy iti talna kadagiti kararuatayo—saan a ti talna nga impaay dagiti tao no di ketdi ti talna nga inkari ti Anak ti Dios idi kinunana, “Ti talna ibatik kadakayo, ti talnak itdek kadakayo.”
Iti templo mariknatayo a naasidegtayo iti Apo
Panagkunak awan ti lugar iti lubong a pakariknaak a naas-asidegak iti Apo no di iti maysa kadagiti nasantuan a templona. Tapno ikkan kaipapanan ti maysa a daniw:
Kasano ti kaadayo ti langit?
Saan unay nga adayo daytoy.
Kadagiti templo ti Dios,
Adda laeng daytoy iti yantayo.
Kinuna ti Apo:
“Saankayo nga agurnong iti kinabaknang nga agpaay kadakayo ditoy daga, a dadaelen ti sanga ken ti lati, ken takawan dagiti mannanakaw:
“Ngem agurnongkayo iti kinabaknang sadi langit, a di madadael ti sanga ken ti lati, ken di takawen dagiti mannanakaw:
“Ta no sadino ti yan ti kinabaknangyo, isu met ti yan ti pusoyo.”1
Kadagiti miembro ti Ti Simbaan ni Jesucristo dagiti Santo iti Ud-udina nga Aldaw, ti templo ti kasagraduan a lugar iti daga. Daytoy ti balay ti Apo, ket kas met laeng iti naisurat iti ruar ti templo nga agkuna, ti templo ket “kinasantuan iti Apo.”
Ti templo ket mangitag-ay ken mangitan-ok kadatayo
Iti templo, maisuro ti napateg a plano ti Dios. Iti templo ti pakaaramidan dagiti agnanayon a katulagan. Ti templo ket itag-aynatayo, itan-oknatayo, agtakder a kas maysa a pagtaudan ti pammaregta a kitaen ti amin, ken itudona kadatayo ti dalan nga agturong iti celestial a gloria. Daytoy ti balay ti Dios. Amin a mapaspasamak iti uneg ti templo ket makaitag-ay ken makapangayed.
Ti templo ket para kadagiti pamilia, maysa kadagiti kaindaklan a gameng nga adda kadatayo iti daytoy a biag. Ti Apo ket nalawag unay a makisasao kadatayo nga amma, a mangipakpakaammo nga addaantayo iti pagrebbengan a mangipateg kadagiti assawatayo iti amin a pusotayo ken mangipaay iti kasapulanda ken dagiti annaktayo. Impakaammona a ti kaindaklan a trabaho a maaramidtayo a kas nagannak ket maaramid kadagiti pagtaengantayo, ket dagiti pagtaengantayo mapagbalinda a langit no dagiti kallaysatayo ket mailantip iti balay ti Apo.
Ti pimmusayen a ni Elder Matthew Cowley, maysa a miembro idi ti Korum dagiti Sangapulo-ket-dua nga Apostol, ket insalaysayna iti naminsan maipapan iti padas iti malem ti Sabado maipanggep iti maysa a lelong a nangkibin iti bassit nga apokona a babai iti panangsarungkarna iti panagkasangay daytoy a nagturong—saan nga iti zoo wenno kadagiti pagsinean no di ketdi kadagiti arubayan ti templo. Addaan iti pammalubos ti agay-aywan iti arubayan, nagna dagiti dua a nagturong kadagiti dadakkel a ridaw ti templo. Insingasingna nga isagid ti apokona ti imana iti natibker a pader ket kalpasanna iti dakkel a ridaw. Kalpasanna kinunana a siaayat iti apokona, “Laglagipem nga iti daytoy nga aldaw sinagidmo ti templo. Iti maysa nga aldaw sumrekkanto iti unegna.” Ti sagutna iti bassit nga ubing ket saan a kendi wenno ice cream ngem maysa a padas a napatpateg nga amang ken agnanayon—maysa a panangbigbig iti pateg wenno panagdayaw iti balay ti Apo. Sinagidna ti templo, ket sinagid met ti templo isuna.
Ti templo ket mangisangbay iti talna kadagiti kararuatayo
Bayat ti panangsagidtayo iti templo ken panangipategtayo iti templo, ti panagbiagtayo ket mangiladawan iti pammatitayo. Bayat ti ipapantayo iti nasantuan a balay, bayat ti pananglagiptayo kadagiti katulagan nga inaramidtayo sadiay, kabaelantayonto nga ibturan ti tunggal pannubok ken marimbawantayonto ti tunggal pannulisog. Ti templo ket mangipaay iti panggep para iti panagbiagtayo. Mangyeg daytoy iti talna kadagiti kararuatayo—saan a ti talna nga impaay dagiti tao no di ketdi ti talna nga inkari ti Anak ti Dios idi kinunana, “Ti talna ibatik kadakayo, ti talnak itdek kadakayo.” Saan koma nga agpulkok ti pusoyo, ken di agbuteng.”2
Adda dakkel a pammati kadagiti Santo iti Ud-udina nga Aldaw. Mangmangted kadatayo ti Apo kadagiti gundaway tapno makita no tungpalentayonto dagiti bilinna, no surotentayonto ti dalan a sinurot ni Jesus iti Nazaret, no ayatentayonto ti Apo iti amin a puso, bileg, panunot, ken pigsatayo, ken ayatentayo dagiti padatayo a tao a kas iti bagbagitayo.3
Mamatiak iti proverbio nga “Agtalekka iti Apo iti amin a pusom, ket dika agtalged iti pannakaawatmo met laeng. Kadagiti amin a dalanmo isu ti bigbigem, ket isu iturongnanto dagiti desdesmo.”4
Kasta a kanayon; isu a kastanto latta a kanayon. No aramidentayo ti pagrebbengantayo ket agtalektayo a naan-anay iti Apo, punnuentayonto dagiti templona, saan laeng nga iti panangaramid iti bukodtayo nga aramiden nga ordinansa, ngem maaddaantayo pay iti pribilehio a panangaramid iti aramid nga agpaay kadagiti dadduma. Agparintumengtayo kadagiti sagrado nga altar tapno agbalintayo a proxy kadagiti panangilantip [sealing] a mamagkaykaysa kadagiti agassawa ken dagiti annak para iti amin a kinaagnanayon. Dagiti maikari nga agtutubo a lallaki ken agtutubo a babbai nga agtawen iti 12 ket mabalindan ti ag-proxy para kadagiti natayen nga awanan kadagiti bendision ti pannakabuniag. Daytoy ti tarigagay ti Nailangitan nga Amatayo para kadakayo ken para kaniak.
Maysa a milagro ti napasamak
Adun a tawen ti napalabas, maysa a napakumbaba ken napudno a patriarka, ni Brother Percy K. Fetzer, ket naawagan a mangted kadagiti bendision ti kinapatriarka kadagiti miembro ti Simbaan nga agnanaed iti likudan ti Iron Curtain.
Napan ni Brother Fetzer iti daga ti Poland kadagita a narigat a panawen. Naserraan dagiti beddeng, ken awan ti umili a napalubosan a pumanaw. Nakipagkita ni Brother Fetzer kadagiti Santo nga Aleman a napupok sadiay idi nabaliwan dagiti beddeng kalpasan ti Maikadua a Gubat ti Sangalubongan ken nagbalin a paset ti Poland ti daga a pagnanaedanda.
Ti dadaulotayo kadagiti amin a Santo nga Aleman ket ni Brother Eric P. Konietz, a nagnaed sadiay a kaduana ti asawana ken dagiti annakna. Impaayan ni Brother Fetzer da Brother ken Sister Konietz ken dagiti inauna nga annak kadagiti bendision ti kinapatriarka.
Idi nagsubli ni Brother Fetzer iti Estados Unidos, timmawag ket dinamagna no mabalinna ti umay sumarungkar kaniak. Bayat ti panagtugawna iti opisinak, nangrugi a nagsangit. Kinunana, “Brother Monson, bayat ti panangipatayko kadagiti dakulapko kadagiti ulo dagiti miembro ti pamilia a Konietz, nagaramidak kadagiti kari a saan a mabalin a maipatungpal. Inkarik kada Brother ken Sister Konietz a makapagsublidanto iti pagilianda nga Alemania, a saandanto nga agbalin nga adipen dagiti di mabaliwan a pangngeddeng dagiti manangrebbek a pagilian ken mailantipdanto a sangkamaysa kas pamilia iti templo ti Apo. Inkarik iti anakda a lalaki a makapagmisionto, ken inkarik iti anakda a babai a makapagkallaysanto iti nasantuan a templo ti Dios. Ammom ken ammok a gapu kadagiti naserraan a beddeng, saandanto a maawat ti pannakaipatungpal dagidiay a bendision. Ania ti naaramidko?
Kinunak, “Brother Fetzer, am-ammoka unay tapno ammok nga inaramidmo laeng no ania ti tinarigagayan ti Nailangitan nga Amatayo nga aramidem.” Nagparintumengkami a dua iti abay ti tugawko ket nagkararagkami iti Nailangitan nga Amami, nga impasimudaagmi a naiteden dagiti kari iti napudno a pamilia maipapan iti templo ti Dios ken dadduma pay a bendision a maipapaidam ita kadakuada. Isu laeng ti makayeg iti milagro a kasapulanmi.
Napasamak ti milagro. Maysa a katulagan ti napirmaan iti nagbaetan dagiti dadaulo ti gobierno ti Poland ken dagiti dadaulo ti Federal a Republika ti Alemania, a namalubos kadagiti umili nga Aleman a napupok iti dayta a lugar a makapan iti Akinlaud nga Alemania. Immakar da Brother ken Sister Fetzer ken dagiti annakda iti Akinlaud nga Alemania, ket nagbalin nga obispo ni Brother Konietz iti ward a nagnaedanda.
Napan ti sibubukel a pamilia Konietz iti nasantuan a templo iti Switzerland. Ket asino ti presidente ti templo a nakakawes iti puraw a siaayat a nangkablaaw kadakuada? Awan ti sabali no di ni Percy Fetzer—ti patriarka a nangted kadakuada iti kari. Ita, iti pagrebbenganna a kas presidente ti Bern Switzerland Temple, inawatna ida iti balay ti Apo, kas pannakatungpal dayta a kari, ket inlantipna a sangkamaysa dagiti agassawa ken dagiti annak kadagiti nagannakda.
Iti kamaudiananna nagkallaysa ti agtutubo nga anak a babai iti templo ti Apo. Naawat ti agtutubo nga anak a lalaki ti awagna ket natungpalna ti maysa a full-time mission.
“Agkikitatayto iti templo!”
Para iti sumagmamano kadatayo, ti biahetayo nga agturong iti templo ket ababa laeng a distansia. Para kadagiti dadduma, adda dagiti taaw a ballasiwen ken adu a kilometro ti daliasaten sakbay a makastrekda iti nasantuan a templo ti Dios.
Sumagmamano a tawen ti napalabasen, sakbay ti pannakaileppas ti maysa a templo iti South Africa, bayat ti idadar-ayko iti komperensia ti distrito iti Salisbury, Rhodesia idi, naam-ammok ti district president, ni Reginald J. Nield. Simmabat kaniak isuda nga agassawa ken dagiti napipintas nga annakna a babbai bayat ti iseserrekko iti kapilia. Inlawlawagda kaniak a nabayagen nga agur-urnongda iti kuarta ken agsagsaganada para iti aldaw a makapagbiaheda a mapan iti templo ti Apo. Ngem, anian, a kinaadayo unay ti templo.
Iti panaggibus ti miting, nagsaludsod kaniak dagiti uppat a napipintas nga annak a babbai maipapan iti templo: “Ania ti langa ti templo? Ladawan pay laeng ti nakitami.” “Kasanonto ngata ti riknami no sumrekkami iti templo?” “Anianto ngata ti malagipmi unay?” Iti agarup maysa nga oras naaddaanak iti gundaway a nakisao kadagiti uppat a babbai maipapan iti templo ti Apo. Bayat ti ipapanawko nga agturong iti airport, nagpayapayda kaniak, ket kinuna ti kaubingan a babai, “Agkikitatayto iti templo!”
Kalpasan ti makatawen naaddaanak iti gundaway a nangkablaaw iti pamilia Nield iti Templo ti Salt Lake. Iti naulimek a siled a pagilantipan naaddaanak iti pribilehio a namagkaysa para iti kinaagnanayon, kasta met para iti panawen, kada Brother ken Sister Nield. Kalpasanna naluktan dagiti ridaw, ket dagiti napipintas nga annak a babbai, a tunggal maysa ket nakakawes iti natarnaw a puraw, simrekda iti siled. Inarakupda ti ina, kalpasanna ti ama. Adda lua kadagiti matada, ken panagyaman ket adda iti puspusoda. Kasla addakami iti langit. Mabalin a makuna ti tunggal maysa, “Ita pamiliakamin para iti kinaagnanayon.”
Daytoy ti nakaskasdaaw a bendision nga agur-uray kadagiti umay iti templo. Sapay koma ta tunggal maysa kadatayo ket agbiag a maikari, nga addaan kadagiti nadalus nga ima ken natarnaw a puspuso, tapno iti kasta masagid ti templo dagiti biagtayo ken dagiti pamiliatayo.
Kasano ti kaadayo ti langit? Paneknekak a kadagiti nasantuan a templo saan a pudno nga adayo—ta kadagitoy a sagrado a lugar nga agsabat ti langit ken daga ken pangpangtedan ti Nailangitan nga Amatayo kadagiti annakna kadagiti kaindaklan a bendisionna.
© 2010 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti First Presidency Message, October 2010. Ilokano. 09370 864