Mensahe iti Visiting Teaching, Oktubre 2010
Ti Nasantuan a Templo
Kadagiti templo, dagiti miembro ti Simbaan a mamagbalin iti bagbagida a maikari ket mabalinda ti makiraman iti katan-okan kadagiti panangsubbot nga ordinansa a naipaltiingen iti sangkataw-an.
Kadagiti templo mabalintayo ti makiraman iti katan-okan kadagiti panangsubbot nga ordinansa
Adu dagiti gapu no apay a nasken a tarigagayan ti maysa a tao a mapan iti templo. Uray ti akinruar a langana ket kasla ipakpakitana dagiti naespirituan unay a panggepna. Dagitoy naespirituan a panggepna ket ad-adda pay a makita iti uneg dagiti didingna. Iti ngatuen ti ridaw iti templo ket makita ti pammadayaw a “Holiness to the Lord [Kinasantuan iti Apo].” No sumrekka iti ania man a naidaton a templo, addaka iti balay ti Apo.
Kadagiti templo, dagiti miembro ti Simbaan a mamagbalin iti bagbagida a maikari ket mabalinda ti makiraman iti katan-okan kadagiti panangsubbot nga ordinansa naipaltiingen iti sangkataw-an. Sadiay, iti maysa a sagrado a seremonia, ti maysa a tao ket mabalin a maugasan ken mapulotan ken masursuruan ken ma-endow ken mailantip. Ket no naawattayon dagitoy a bendision para iti bagbagitayo, mabalintayo ti mangannong para kadagiti pimmusayen a di nakaawat kadagitoy a bendision. Kadagiti templo ket maannong dagiti sagrado nga ordinansa nga agpaay kadagiti sibibiag ken kasta met nga agpaay kadagiti natay.
Dagiti ordinansa ken seremonia ti templo ket simple, napintas, ken sagrado
Ti naannad a panagbasa kadagiti nasantuan a kasuratan ket mangipakita a saan nga imbaga ti Apo ti amin a banag iti amin a tao. Adda sumagmamano a naituding a pakaikarian nga umuna a kasapulan iti panangawat iti sagrado nga impormasion. Maibilang dagiti seremonia ti templo iti daytoy a kategoria.
Saantayo a pagsasaritaan dagiti ordinansa ti templo iti ruar dagiti templo. Saan a kaano man naisangrat a ti pannakaammo kadagitoy a seremonia ti templo ket limitado kadagiti manmano a napili nga akinrebbengto a mangpennek a saanto pulos masursuro dagiti dadduma ti maipapan kadagitoy. Kinapudnona, maisupadi daytoy. Addaan iti dakkel a panagkalikagum allukoyenmi ti tunggal tao nga agbalin a maikari ken agsagana para iti padas iti templo. Dagiti mapmapan iti templo ket nasuruandan iti maysa a pagulidanan: Iti maysa nga aldaw tunggal sibibiag a kararua ken tunggal kararua a nagbiagen ket maaddaandanto iti gundaway a makangngeg iti ebanghelio ken mangawat wenno magtallikud iti idiaya ti templo. No matallikudan daytoy a gundaway, ti panangtallikud ket nasken a pagrebbengan ti tao.
Simple dagiti ordinansa ken seremonia ti templo. Nangayed dagitoy. Sagrado dagitoy. Mailimed dagitoy tapno saanda a maited kadagiti saan a nakasagana. Ti kinamanangusisa ket saan a panagsagana. Ti napalalo a panagessem mismo ket saan a panagsagana. Ti panagsagana para kadagiti ordinansa ket iramanna dagiti umuna nga addang: pammati, panagbabawi, panagbuniag, kompirmasion, pannakaikari, kaadda iti husto a kananakem ken dignidad a maikari iti maysa a tao nga umay a naawis a sangaili iti balay ti Apo.
Mabalin dagiti maikari a sumrek iti templo
Amin a maikari ken kualipikado iti tunggal wagas ket mabalinda ti sumrek iti templo, a sadiay mayam-ammoda kadagiti sagrado a seremonia ken ordinansa.
Apaman a maaddaanka iti pannakaawat iti kinapateg dagiti bendision ti templo ken para iti kinasagrado dagiti ordinansa a naaramid iti templo, agkedkedkanto nga agsaludsod maipapan kadagiti nangato a pagrukodan nga intuding ti Apo para iti iseserrek iti nasantuan a templo.
Nasken nga addaanka iti agdama a rekomenda ti templo tapno maawatka iti templo. Daytoy a rekomenda ket nasken a pirmaan dagiti umno nga opisial ti Simbaan. Dagiti laeng maikari ti nasken a mapan iti templo. Ti lokal a bishop wenno branch presidentmo ket addaan iti pagrebbengan nga agsaludsod maipapan iti bukodmo a pannakaikarim sakbay a maawatmo dagiti ordinansam iti templo. Daytoy nga interbyu ket napateg unay, gapu ta daytoy ket maysa a gundaway a panangamiris ti naordenan a katulongan ti Apo iti wagas ti panagbiagmo. No adda man maysa a banag a nagbiddutam iti biagmo, matulongannakanto ti bishop a mangrisut iti daytoy. Babaen daytoy a wagas, mabalinmo nga ibaga wenno mabalin a matulonganka a mangpatalged iti pannakaikarim a sumrek iti templo babaen ti pananganamong ti Apo.
Ti interbyu para iti rekomenda ti templo ket sililimed a maaramid iti nagbaetan ti bishop ken ti maseknan a miembro ti Simbaan. Ditoy mapagsaludsodan ti miembro kadagiti pangsukisok a saludsod maipapan iti bukodna nga ugali, pannakaikari, ken kinapudnona iti Simbaan ken kadagiti opisial daytoy. Nasken a paneknekan ti tao nga isu ket nadalus iti dayaw ken agtungtungpal iti Word of Wisdom, agbaybayad iti naan-anay nga apagkapullo, agbibiag a maitunos kadagiti pannursuro ti Simbaan, ken saan a makikappeng wenno makipagrikna kadagiti kimmalilis a grupo. Naibilin iti bishop a ti pannakailimed ti panangimaton kadagitoy a banag iti tunggal tao a mainterbyu ket napateg unay.
Dagiti maawat a sungbat kadagiti saludsod ti bishop ket gagangayto a mangpatalged iti pannakaikari ti tao nga umawat iti rekomenda ti templo. No ti aplikante ket saan nga agtungtungpal kadagiti bilin wenno adda maysa a banag a di pay narisut maipapan iti biagna a nasken a maurnos, kasapulan nga ipakitananto ti pudno a panagbabawi sakbay a maikkan iti rekomenda ti templo.
Kalpasan ti panangiturong ti bishop iti kasta nga interbyu, mainterbyuka met ti stake president sakbay a maawatmo dagiti ordinansam iti templo.
Ti panangisuro iti templo ket babaen kadagiti simbolo
Sakbay ti ipapan iti templo iti umuna a gundaway, wenno kalpasan ti adu a gundaway, mabalin a matulonganka a mangamiris a ti panangisuro iti templo ket maar-aramid iti wagas a pakaaramatan dagiti simbolo. Ti Apo, ti Nalaing a Mannursuro, ket nangted iti kaaduan a pannursurona iti kastoy a wagas:
Ti templo ket maysa a naindaklan a pagadalan. Balay daytoy a pagsursuruan. Mapagtalinaed ti aglawlaw kadagiti templo tapno mayannnatup daytoy iti panangisuro kadagiti banag a naespirituan unay. Ti pimmusayen a ni Elder John A. Widtsoe iti Korum dagiti Sangapulo-ket-dua nga Apostol ket maysa idi a nalatak a presidente ti unibersidad ken am-ammo nga eskolar iti sangalubongan. Addaan isuna iti dakkel a panagraem iti aramid iti templo ket kinunana iti maysa nga okasion:
“Dagiti ordinansa ti templo ket iramanna ti sibubukel a plano ti pannakaisalakan, kas kanayon nga isursuro dagiti dadaulo ti Simbaan, ken ilawlawagda dagiti banag a narigat a maawatan. Awan ti panangballikug wenno panangbalbaliw kadagiti pannursuro iti templo iti dakkel a plano ti pannakaisalakan. Ti mainaig iti pilosopia a kinaan-anay ti endowment ket maysa kadagiti dadakkel nga argumento para iti kinapudno dagiti ordinansa ti templo. Maysa pay, daytoy a kinaan-anay ti panangamiris ken panangilawlawag iti plano ti Ebanghelio, ket mamagbalin iti panagrukbab iti templo a maysa kadagiti kasamayan a wagas ti panangpasantak iti lagip maipanggep iti sibubukel nga istruktura ti Ebanghelio” (Temple Worship,” Utah Genealogical and Historical Magazine, Abr. 1921, 58).
No mapankanto iti templo ket malagipmo a ti pannursuro ket babaen kadagiti simbolo, dikanto kaano man makapan iti umno nga espiritu a saanka a makaadayo nga awanan iti napalawa a pannirigam, a mariknam ti ad-adda a pannakaitan-ok, nga addaanka iti dimmakkel a pannakaammom maipanggep kadagiti banag a naespirituan. Nakangayngayed ti plano ti panangisuro. Naparegta daytoy. Ti Apo a Mismo, ti Nalaing a Mannursuro, ket insurona a kanayon dagiti disipulona babaen kadagiti pangngarig—maysa a wagas ti panangisao a mangibagi kadagiti banag nga usaren dagiti simbolo ta no saan ket mabalin a narigatda a maawatan.
Ti templo a mismo ket agbalin a maysa a simbolo. No nakitamon ti maysa kadagiti templo iti rabii, a naan-anay ti pannakasilawna, ammom a makaawis unay a buya daytoy. Ti balay ti Apo, a napalawlawan iti silaw, nga agtaktakder iti kasipngetan, ket agbalin a simbolo ti bileg ken ti pammaregta ti ebanghelio ni Jesucristo nga agtaktakder a kas pagtaudan ti pammaregta iti maysa a lubong a lumlumned nga umadayo a mapan iti naespirituan a kinasipnget.
Apaman a makastrek iti templo, sukatam dagiti gagangay a pagan-anaymo iti puraw a kawes ti templo. Maaramid daytoy a panagpelles wenno panagsukat iti pagan-anay iti dressing room, a pangtedan iti tunggal tao iti maysa a locker ken iti maysa a pribado a kuarto a pagpellesan iti bado. Iti templo ti pagulidanan ti kinaemma wenno kinadalus ket siaannad a mapagtalinaed. Iti panangidulinmo iti pagan-anaymo iti locker, panawam dagiti pakarikutam ken pakaseknam ken pakaburiboram sadiay a karaman dagitoy. Rumuarka iti daytoy pribado a bassit a pagkawesan a nakakaweska iti puraw, ket mariknam ti pannakikaykaysa ken rikna ti panagpapada, gapu ta amin a tao iti aglawlawmo ket agpapadakayo iti pagan-anay.
Ti kallaysa iti templo ti kangrunaan nga ordinansa iti templo
Dakayo nga agplano nga agkallaysa iti templo ket mabalin a kayatyo a maammuan no anianto ti mapasamak. Saanmi a dakamaten dagiti balikas ti ordinansa ti panangilantip (kallaysa) iti ruar ti templo, ngem mabalinmi nga iladawan ti siled a pagilantipan a kas napintas iti pannakaaramidna, naulimek ken natalna iti espiritu, ken naaramid a nasantuan babaen ti sagrado nga aramid a maan-annong sadiay.
Sakbay a mapan dagiti agassawa iti altar para iti ordinansa ti panangilantip, pribilehio ti mangimatmaton [officiator] ti mangted, ken dagiti agtutubo nga agassawa ti umawat, iti balakad. Dagitoy ti sumagmamano kadagiti kapanunotan a mabalin a mangngegan dagiti agtutubo nga agassawa iti daytoy nga okasion.
“Ita nga aldaw ti aldaw a panagkallaysayo. Nalapunoskayo iti rikna ti panagkallaysayo. Nabangon dagiti templo a kas santuario para kadagita nga ordinansa a kas iti daytoy. Awantayo iti lubong. Saan a mayaplikar ditoy dagiti banag a mainaig iti lubong ken nasken a saanda nga aringan ti ar-aramidentayo ditoy. Rimmuartayon iti lubong tapno umay iti templo ti Apo. Agbalin daytoy a kapatgan nga aldaw iti biagyo.
“Nayanakkayo, naawis iti daga, babaen kadagiti nagannak a nangisagana iti mortal a tabernakulo para iti pagnaedan ti espirituyo. Nabuniaganen ti tunggal maysa kadakayo. Ti panagbuniag, maysa a sagrado nga ordinansa, ket mangisimbolo iti panangdalus, mangisimbolo iti ipapatay ken panagungar, mangisimbolo iti isasangbay iti baro a panagbiag. Iramanna ti panagbabawi ken pannakaugas dagiti basol. Ti sakramento ti Pangrabii ti Apo ket panangpabaro iti katulagan iti panagbuniag, ken kabaelantayo, no agbiagtayo para iti daytoy, a mapagtalinaed ti pannakaugas dagiti basoltayo.
“Sika, ti nobio, ket naordenan iti priesthood. Immuna a naited kenka ti Aaronic Priesthood ket mabalin a dimmur-aska babaen dagiti amin nga opisina daytoy—deacon, teacher, ken priest. Kalpasanna dimteng ti aldaw a nagbalinka a maikari nga umawat iti Melchizedek Priesthood. Dayta a priesthood, ti nangatngato a priesthood, ket mailawlawag a kas priesthood a maibatay iti kasantuan nga urnos ti Dios, wenno ti Nasantuan a Priesthood a maibatay iti urnos ti Anak ti Dios (kitaen iti Alma 13:18; Helaman 8:18; Doktrina ken Katulagan 107:2–4. Naikkanka iti maysa a takem iti priesthood. Maysaka itan nga elder.
“Immawaten ti tunggal maysa kadakayo iti endowmentyo. Iti dayta nga endowment naawatyo ti karbengan ti agnanayon a potensial. Ngem amin dagitoy a banag, iti maysa a kaipapanan, ket pangyuna ken pangisagana iti yaayyo iti altar tapno mailantip a kas agassawa para iti panawen ken para iti amin a kinaagnanayon. Agbalinkayo itan a pamilia, nawaya nga agtignay iti panagparsua iti biag, tapno maaddaan iti gundaway babaen ti kinapasnek ken sakripisio a mangisangbay kadagiti annak iti lubong ken mangpatanor kadakuada ken mangpadur-as kadakuada a sitatalged iti panagbiagda iti daytoy a biag; tapno makita ida nga umayda iti maysa nga aldaw, a kas iti yaayyo, tapno makiraman kadagitoy sagrado nga ordinansa ti templo.
“Umaykayo a sitatallugod ken nakedngankayon a maikari. Ti mangawat iti tunggal maysa iti katulagan ti panagkallaysa ket maysa a dakkel a pagrebbengan, maysa nga addaan kadagiti bendision a di mabubos.”
Ti bileg a pangilantip ket mamagreppeng iti daga ken iti langit
No maawatan nga agpada ti pakasaritaan ken ti doktrina ti aramid iti templo, nasken a maawatantayo no ania ti bileg a pangilantip. Nasken nga iladawantayo iti panunottayo, uray iti maysa laeng a tukad, no apay a dagiti tulbek ti turay a pangaramat iti bileg a pangilantip ket napateg unay.
“Ket idi ni Jesus immay kadagiti disso ti Cesarea ni Filipo, inimtuudna kadagiti adalanna, a kinunana, Siasino ti Anak ti tao iti panagkuna dagiti tao? …
“Ket simmungbat ni Simon Pedro, ket kinunana: Sika ti Cristo, ti Anak ti Dios a sibibiag.
“Ket simmungbat ni Jesus ket kinunana kenkuana: Nagasatka, Simon, anak ni Jonas; ta saan a ti lasag wenno dara, ti nangipaltiing kenka no di ket ni Amak nga adda sadi langit.
“Ket siak kunak met kenka, a sika Pedroka; ket iti daytoy a bato bangonekto ti iglesiak; ket dagiti ruangan ti impierno saandanto nga agballigi kenkuana.
“Ket itdekto kenka dagiti tulbek ti pagarian ti langit; ket ti aniaman a galutamto ditoy daga, magalutanto idiay langit; ket ti aniaman a warwaramto ditoy daga mawarwaranto idiay langit” (Mateo 16:13, 16–19).
Ni Pedro ti agiggem kadagiti tulbek. Ni Pedro ti agiggem iti bileg a pangilantip, dayta a turay nga addaan iti bileg a mamagreppeng wenno mamaglantip iti daga wenno mangwarwar iti daga ken kastanto met iti langit. Adda dagita a tulbek iti Presidente ti Simbaan—iti propeta, mammadto, ken mammaltiing. Dayta sagrado a bileg a pangilantip ket adda iti Simbaan itan. Awanen ti ibilang pay nga addaan iti nasagsagraduan a panagutob dagiti makaammo iti kinapateg daytoy a turay. Awanen ti ad-adda pay a maitalimeng. Adda sumagmamano laeng a lallaki a naikkan iti daytoy bileg a pangilantip iti rabaw ti daga iti naituding a panawen—iti tunggal templo adda dagiti kakabsat a lallaki a naikkan iti bileg a pangilantip. Awan ti makaala iti daytoy malaksid ti propeta, mammadto, ken mammaltiing ken ti Presidente ti Simbaan ni Jesucristo dagiti Santo iti Ud-udina nga Aldaw.
Kinuna ti Propeta Joseph Smith a masansan a masaludsod kenkuana, “‘Saankami kadi a maisalakan a dikami aglasat iti amin kadagidiay nga ordinansa, ken dadduma pay?’ Isungbatko, Saan, diyo maawat ti pakabuklan ti pannakaisalakan. Kinuna ni Jesus, ‘Idiay balay ni Amak, adda adu a pagianan, ket innak isaganaankayo iti pagianan.’ [Kitaen iti Juan 14:2. Ti balay ditoy a nadakamat ket nasken koma a naipatarus iti pagarian; ket asino man a tao a maitan-ok iti kangatuan a mansion ket nasken nga agtungpal iti celestial a linteg, ken kasta met iti sibubukel a linteg” (iti History of the Church, 6:184).
Ti aramid iti templo ti pagtaudan ti naespirituan a bileg
Dagiti templo ti mismo a pannakasentro ti naespirituan a pigsa ti Simbaan. Nasken a mangnamnamatayo a ti kabusor ket padasennanto ti makibiang kadatayo a kas Simbaan ken iti tunggal maysa kadatayo bayat ti panagkagumaantayo a makiraman iti daytoy sagrado ken naparegta nga aramid. Mangisangbay ti aramid iti templo iti adu a panagkedked gapu ta daytoy ti pagtaudan ti dakkel a naespirituan a bileg kadagiti Santo iti Ud-udina nga Aldaw ken iti sibubukel a Simbaan.
Iti pannakaidaton ti panuli a bato ti Templo ti Logan Utah, inaramid ni President George Q. Cannon, nga adda idi iti Umuna a Panguluen, daytoy a sao:
“Tunggal pamuon a bato a maipan para iti maysa a Templo, ken tunggal Templo a maileppas a mayannurot iti urnos ti Apo ket nangipaltiing iti nasantuan a Priesthoodna, mangpakapsut iti bileg ni Satanas iti daga, ken mangpapigsa iti bileg ti Dios ken Kinadiosan, mamagtignay iti langit a sibibileg para kadatayo, umawag ken mangyeg kadatayo kadagiti bendision dagiti Agnanayon a Dios, ken dagiti agnanaed iti sidongda” (iti “The Logan Temple,” Millennial Star, Nob. 12, 1877, 743).
No dagiti miembro ti Simbaan ket maburiboran wenno no madagsenanda a mangpanunot kadagiti napateg unay a pangeddeng, gagangay laeng a banag para kadakuada ti mapan iti templo. Nasayaat daytoy a lugar a pangipanan kadagiti pakaseknantayo. Iti templo makaawattayo iti naespirituan a pannirigan. Sadiay, kabayatan ti serbisio iti templo, addatayo iti “ruar ti lubong.”
No dadduma dagiti panunottayo ket madagensenan unay kadagiti problema ken adu unay a banag ti aggigiddan a makasapul iti atensiontayo ket saantayo a makapagpanunot a nasayaat ken makakita a nalawag. Iti templo mapagpag ti tapok ti pakariribukan, ti angep ken ti kinakudrep kasla agpangatoda, ket “makitatayo” dagiti banag a ditay nakita idi ket makabiroktayo iti wagas a pakarisutan dagiti parikuttayo a saantayo nga ammo a nasapsapa.
Ti Apo bendisionannatayto bayat panagaramidtayo iti aramid ti sagrado nga ordinansa kadagiti templo. Dagiti bendision sadiay ket saanto a limitado iti panagserbitayo iti templo. Mabendisionantayonto kadagiti amin nga aramidtayo.
Dagiti aramidtayo iti templo ti mangsalaknib ken mangsaluad kadatayo.
Awan ti aramid nga ad-adda a makasaluad iti daytoy a Simbaan no di ti aramid iti templo ken ti panagsukisok iti pakasaritaan ti pamilia a mangsupsuporta iti daytoy. Awan ti aramid nga ad-adda pay a makapadalus iti espiritu. Awan ti aramid nga ar-aramidentayo ti makaited kadatayo iti dakdakkel a bileg. Awan ti aramid nga agkasapulan iti nangatngato a pagrukodan ti kinalinteg.
Dagiti aramidtayo iti templo ti mangsalaknib ken mangsaluad kadatayo, agpada a kas maysa a tao ken kas tattao.
Isu nga umaykayo iti templo—umaykayo ken dawatenyo dagiti bendisionyo. Sagrado daytoy nga aramid.
© 2010 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti Visiting Teaching Message, October 2010. Ilokano. 09370 864