Ti Danam nga Agturong iti Templo

Am-ammom kadi no ania a templo ti kaasitgan kenka? Mangidrowing iti maysa a ladawan dayta a templo, ket isab-it daytoy iti lugar a pakakitaamto iti daytoy iti inaldaw.

Ti templo ti balay ti Apo. Daytoy ti lugar a pakasursuruantayo maipapan iti Nailangitan nga Ama, pagaramidan kadagiti katulagan (wenno kari) Kenkuana, ken pakaawatan kadagiti naindaklan a bendision. Iti templo, aramidentayo ti napateg a trabaho para iti bagbagitayo ken para kadagiti miembro ti pamilia a pimmusayen. Iraman ti trabaho a naaramid iti templo dagiti panangbuniag para kadagiti natay, endowment, ken panaglantip. Dagitoy ti maawagan nga ordinansa iti templo.

Ania ti Mapaspasamak iti uneg ti Templo

Dagiti Panagbuniag para kadagiti Natay

No walo ti tawenmo, mabalinka a mabuniagan ken makumpirmaan a maysa a miembro ti Ti Simbaan ni Jesucristo dagiti Santo iti Ud-udina nga Aldaw. Adu kadagiti kapuonam a pimmusayen a saan pay a nabuniagan ken nakumpirmaan. Nupay natay dagiti bagida, sibibiag pay laeng dagiti espirituda iti lubong dagiti espiritu, a pakaisuruanda iti ebanghelio ni Jesucristo.

No 12 ti tawenmo, mabalinmo ti mapan iti templo ket tulongam dagitoy a tao babaen ti panagpabuniag ken panagpakumpirma babaen iti naganda. Mabalindanton a pilien wenno saan no kayatda nga awaten ti panagbuniag ken kumpirmasion. Mabalinmonto ti agkawes iti puraw no mabuniaganka para kadagiti natay, kas met laeng iti aramidem no mabuniaganka para iti bagim.

Kiddawen kadagiti nagannak kenka a tulongandaka a mangilista kadagiti miembro ti pamilia a pimmusayen a saan pay a nabuniagan iti Ti Simbaan ni Jesucristo dagiti Santo iti Ud-udina nga Aldaw. Ammuem no adda asino man a nakapanen iti templo tapno agpabuniag para kadakuada.

Ti Endowment

Ti endowment ti maysa kadagiti naindaklan a bendision ti templo. Endowment ket kayatna a sawen “sagut.” No awatem ti endowmentmo, masursuromto ti ad-adu pay maipapan iti plano ti pannakaisalakan ken agaramid kadagiti katulagan. Dagiti katulagan ket dagiti kari nga aramidentayo iti Nailangitan nga Ama. Bayat ti panagtungpalmo kadagita a katulagan, agsaganaka a makipagnaedto iti Nailangitan nga Ama ken ni Jesucristo.

Adda iti uneg ti templo ti maysa a napintas, natalna a siled a maawagan iti celestial a siled. Iti celestial a siled mariknatayo nga asidegtayo iti Nailangitan nga Ama ken ni Jesucristo, ket mariknatayo bassit no ania ti kayarigan ti pannakipagindeg Kadakuada iti celestial a pagarian.

Dagiti Panaglantip para iti Panawen ken Kinaagnaayon

No agkallaysa ti lalaki ken babai iti templo, agparintumengda iti altar ken mailantipda para iti panawen ken iti amin a kinaagnanayon. Kaipapanan daytoy a makapagdedennada ken dagiti annakda a sangkamaysa kas agnanayon a pamilia. Agplano nga agkallaysanto iti templo. Daytoy ti kaindaklanan a bendision ti templo.

Ti Temple Recommend

Maysa a nasantuan a lugar ti templo. Penken dagiti bishop ken branch president a dagiti nakasagana ken maikari ti sumrek iti templo. Sakbay a mapanka iti templo, maaddaankanto iti naisangsangayan nga interbyu iti bishop wenno branch presidentmo. Saludsodenna kenka no addaanka iti pammaneknek maipapan ti Simbaan, agtungpal kadagiti bilin, mangsuporta kadagiti lider ti Simbaan, agtungpal iti Word of Wisdom, agbayad iti apagkapullo, ken napudno iti amin a banag nga aramidem ken isaom Tulongannakanto a mangammo no ania ti aramidem tapno agbalin a maikari a sumrek iti templo.

Agsaganaka Itan a Sumrek iti Templo

Ited ti Nailangitan nga Ama ti adu a bendision kadagiti agbiag a sililinteg ken dumar-ay iti templo. Napateg ti agsagana a sumrek iti templo no ubingka pay.

Ay-ayatennaka ti Nailangitan nga Ama ken kayatna nga umawatka kadagiti bendision ti templo. Bendisionannakanto iti panangannongmo kadagiti ordinansa iti templo para iti bagim ken iti dadduma. Nupay mabalin a saanmo a kabaelan ti sumrek iti templo ita, no adda maysa a templo iti asideg, mabalinmo a sarungkaran dagiti arubayan ti templo ken riknaem ti espiritu nga adda sadiay. Mabalinmo met ti mangpatalinaed iti maysa a ladawan ti templo iti pagtaenganyo tapno maipalagip kenka no kasano ti kinapateg ti templo. Agbiagka a sililinteg tapno agbalinkanto a maikari a sumrek iti balay ti Apo.

Kitaem ti sarming iti daytoy a ladawan. Addaan kadagiti sarming ti sumagmamano a siled a paglantipan kas iti daytoy maysa. Gapu kadagiti panaglantip iti templo, dagiti pamiliatayo, kas iti anninaw iti daytoy a sarming, ket makapagtultuloy iti agnanayon.

Kitaen ti celestial a siled iti daytoy a ladawan ken iti ladawan iti panid 64. Kasano ti mariknam no makitam ti celestial a siled?

Templo iti Boston Massachusetts Naidaton idi Oct. 1, 2000.

Siled a paglantipan, Templo iti Aba Nigeria.

Celestial a siled, Templo iti Nuku’alofa Tonga.