Lamharon
Paskua sang isa ka Misyonero
Sang ika-duha ko nga Paskua bilang isa ka full-time nga misyonero, ako kag ang akon companion nagbisita sa isa ka bag-o lang ginbunyagan nga miyembro kag sa iya pamilya. Pagkatapos sang isa ka manami nga Noche Buena, nagpaambit kami sa ila sang isa ka mensahe sang Paskua.
Ginpangabay namon ang pamilya nga magdrowing sang mga larawan sang mga bagay nga nagapahanumdom sa ila parte sa tion sang Paskua pareho sang mga bituon, mga regalo, pagkatawo ni Jesus, kag mga Christmas tree. Nagbasa kami dayon sang balaan nga mga kasulatan, kalakip na ang 2 Nefi 19:6: “Kay sa aton isa ka bata ang nabun-ag, sa aton isa ka anak nga lalaki ang ginahatag; kag ang pagbulut-an manginsa iya abaga; kag tawgon ang iya ngalan, Makatilingala, Manuglaygay, ang Dios nga Gamhanan, Ang Amay nga Nagapadayon, Ang Prinsipe sang Paghidaet.” Nagkanta kami sang “Once in Royal David’s City” (Hymns, no. 205), naglantaw sang isa ka sine parte sa Pagkabun-ag ni Jesus [Nativity], kag nagpaambit sang panaksihon parte kay Jesucristo.
Isa yadto ka Paskua sa simple lamang nga mga sirkumstansya nga malayo sa amon mga pamilya kag sa kinaandan nga mga selebrasyon sang Paskua, apang sa amon pagpaambit sang panaksihon parte sa Manluluwas, nabatyagan ko ang mas dako nga pagpalangga kag pagpasalamat sa Iya kag sa Iya pagkabun-ag. Narealisar ko nga ini mangin katapusan ko nga Paskua sa full-time nga pag-alagad bilang misyonero sa akon Amay nga Langitnon, apang nahangpan ko nga ang Iya Espiritu makapamatuod sa akon parte sa Iya Anak bisan diin man ako.