Mensahe sang Unang Panguluhan, Disyembre 2010

Makita Bala Naton ang Cristo?

Ni Pangulong Dieter F. Uchtdorf

Ika-duhang Manuglaygay sa Unang Panguluhan

Isa ka gab-i ginabasahan sang istorya sang isa ka lolo ang iya apat-ka-tuig nga apo nga babayi sang magtangla ini kag magsiling, “Lo, tan-awa bala ang mga bituon!” Ang tigulang nagyuhum kag nagsiling, “Ari kita sa sulod balay, pangga. Wala sang mga bituon diri.” Pero ang bata namilit gid, “May mga bituon ka sa imo kuwarto! Tan-awa!”

Ang lolo nagtangla kag, sa iya kakibot, natalupangdan nga may madamo nga mga nagainggat-inggat sa kisami. Indi ini makit-an pirme pero kon matabuan nga masilakan sang suga ang mga nagainggat-inggat, matuod nga kon tulokon ini daw nagabanig nga mga bituon. Ginkinahanglan ang mga mata sang isa ka bata agud makita ang mga ini, pero yara gid man sila (ang mga nagainggat-inggat). Kag sumugod sadto, kon ang lolo magsulod sa sining kuwarto kag magtangla, makita niya ang wala niya makit-i sang una.

Nagapakadto kita sa isa na naman ka manami nga tion sang Paskua nga puno sang musika kag mga suga, mga pagtipon-tipon kag mga regalo. Apang sa tanan nga mga tawo, kita nga mga miyembro sang simbahan nga nagadala sang ngalan sang Manluluwas kinahanglan magtulok sing labaw sangsa panggwa nga dagway sang tion kag talupangdon ang makainspirar nga kamatuoran kag katahum sang sining tion sang tuig.

Pila ayhan sa Betlehem ang nakahibalo nga didto mismo, malapit sa ila, nabun-ag ang Manluluwas? Ang Anak sang Dios, ang ginahangad kag ginapromisa nga Mesias—Sia yara sa tunga nila!

Madumduman bala ninyo kon ano ang ginhambal sang anghel sa mga manugpahalab? “Kay natawo sa inyo karon nga adlaw sa banwa ni David ang Manluluwas, nga si Cristo nga Ginuo.” Kag sila naghinambalanay, “Makadto kita karon sa Betlehem, kag tan-awon ta ining butang nga nahanabo” (Lucas 2:11, 15).

Subong sang mga manugpahalab sadto, kinahanglan naton maghambal sa aton mga tagipusuon, “Tan-awon ta ining butang nga nahanabo.” Kinahanglan naton handumon ini sa aton mga tagipusuon. Talupangdon naton ang Balaan sang Israel sa pasungan, sa templo, sa bukid, kag sa krus. Subong sang mga manugpahalab, himayaon kag dayawon naton ang Dios para sining mga balita sang dakong kalipay!

Kon kaisa ang pinakamabudlay makita nga mga butang amo yadtong yara man lang gali sa atubang naton. Subong sang lolo nga wala makakita sang mga bituon sa kisami, indi naton kon kaisa makita inang mahapos gid lang makit-an.

Kita nga nakabati sang mahimayaon nga mensahe sang pagkari sang Anak sang Dios, kita nga nagadala sa aton mga kaugalingon sang Iya ngalan kag nagpahisugot nga maglakat sa Iya banas bilang Iya mga disipulo—indi kita dapat magpatumbaya sa pagbukas sang aton mga tagipusuon kag mga kaisipan kag makita Sia sing matuodtuod.

Ang tion sang Paskua tuman kanami sa madamo nga paagi. Tion ini sang mga buhat sang kaluoy kag paghigugma sa isigkatawo. Tion ini sang pagmangin mas mahunahunaon parte sa aton kaugalingon nga mga kabuhi kag parte sa madamo nga mga bugay nga yara sa aton. Tion ini agud magpatawad kag mapatawad. Tion ini sang pagkalipay sa musika kag mga suga nga nagainigpat, mga pagtipon-tipon kag mga regalo. Apang ang kainggat sang tion indi gid dapat magpadulom sang aton panan-awan kag magpugong sa aton nga makita sing matinud-anon ang Prinsipe sang Paghidaet sa Iya kahalangdon.

Himuon naton tanan ang tion sang Paskua sini nga tuig nga isa ka tion sang pagpangalipay kag pagselebrar, isa ka tion sang pagkilala naton sang milagro nga ang aton Dios nga Gamhanan nagpadala sang Iya Bugtong nga Inanak nga si Jesucristo agud tuboson ang kalibutan!

© 2010 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/09. Petsa sang pagtugot sa paglubad: 6/09. Linubad sang First Presidency Message, December 2010. Hiligaynon. 09372 861

Mga Ideya sa Pagtudlo gikan Sining Mensahe

“Ang mga kahiwatan sa pagkuha sang atensyon sarang maggamit agud magpukaw sang interes kag agud buligan ang mga nagatuluon nga magsentro sang ila atensyon sa topiko sang leksyon. … Ang mga larawan importante nga mga materyales sa pagpabakod sang mayor nga ideya sang isa ka leksyon kag sa pagbulig sa mga nagatuluon nga magpamati sing maayo” (Teaching, No Greater Call [1999],160, 176). Sa inyo pagsugod sa pagpaambit sining mensahe, hunahunaa ang paggamit sang kahiwatan sa pagkuha sang atensyon pareho sang pagpakita sang isa ka larawan ukon pagpaambit sang balaan nga kasulatan kag pagpangabay sa pamilya sa paghunahuna parte sa kon paano ini nagaangot sa mensahe.
“Ang isa sang inyo pinakaimportante nga mga lalab-uton amo ang makabulig sa iban sa pagdapat sang mga prinsipyo sang ebanghelyo sa inadlaw-adlaw nga mga sitwasyon. … Buligi ang mga nagatuluon nga madiskubre ang mga bugay nga nagaabot kon ipangabuhi naton ang ebanghelyo” (Teaching, No Greater Call, 159). Pagkatapos nga ipaambit ining mensahe, hunahunaa ang pag-agda sa mga miyembro sang pamilya sa pagpaambit sang ila mga eksperiyensya sang ginsentro nila ang ila igtalupangod sa Manluluwas sa tion sang Paskua.