Mensahe sa Visiting Teaching, Disyembre 2010

Ang Aton Responsibilidad sa Pagpartisipar sa Buluhaton sa Templo kag Family History

Julie B. Beck, pangkabilugan nga pangulo sang Relief Society.

Tun-i ining materyal kag, sa nagakaigo, hambali ini upod sang mga sister nga inyo ginabisita. Gamita ang mga pamangkot agud buligan kamo sa pagpabakod sang inyo mga sister kag himuon ang Relief Society nga aktibo nga bahin sang inyo mismo kabuhi.

Litrato

Relief Society seal

Pagtuo • Panimalay • Bulig

Sa mga dinag-on, madamo nga mga tawo ang nagkalamatay nga wala makahibalo parte sa ebanghelyo. Ang pila sadto sa mga tawo ang inyo malapit kag malayo nga mga paryente. Nagahulat sila sa inyo nga maghimo sang kinahanglanon nga pagsayasat agud isugpon ang inyo mga pamilya kag hikuton ang nagaluwas nga mga ordinansa para sa ila.

Ang kalabanan sang mga templo sa kalibutan indi gid tuman kasako. Ang Ginuo nagpromisa nga ang inyo mga tagipusuon magaliso sa mga amay agud nga ang duta indi pagsakiton sing tuman sa Iya pagkari (tan-awa sa D&C 2:2–3).

May yara sang personal nga mga bugay nga inyo mabaton bilang resulta sang pagpartisipar sa buluhaton sa templo kag family history. Isa sini amo ang kalipay nga inyo mabatyagan sa inyo pag-alagad sa inyo mga katigulangan. Ang isa pa gid amo nga mangin kaangay kamo para sa temple recommend, nga nagapakita sang inyo katakos sa atubangan sang Ginuo. Ang yadtong indi takos sa karon sang prebilihiyo sa pag-angkon sang isa ka recommend dapat makig-angot sa isa ka bishop ukon branch president agud makakuha sini sa labing madali nga panahon. Palihog indi pagtugoti nga wala kamo sining importante kaayo nga kwalipikasyon. Nagasaksi ako nga ang Pagbayad-Sala [Atonement] ni Jesucristo natabo gid kag nga ang mga sala sarang mapatawad sa husto nga paghinulsol.

Sa aton pagpartisipar sa buluhaton sa templo kag family history, siguro kita nga makaangkon sang Espiritu nga magpasulhay sa aton sa mga hangkat nga aton ginaatubang kag maggiya sa aton sa importante nga mga desisyon. Ang buluhaton sa templo kag family history kabahin sang aton buluhaton sa paghatag sang kaumpawan, ukon pag-alagad, sa aton kaugalingon nga mga katigulangan.

Gikan sa Aton Kasaysayan

“Ang Propetang si Joseph Smith nagsiling, ‘Ang pinakadako nga responsibilidad sa sining kalibutan nga ginpahamtang sang Dios sa aton amo ang pagpangita sang aton mga minatay’ (History of the Church, 6:313). Halin sa pagsugod, ang mga sister sang Relief Society nagsakdag sining dako nga buluhaton. Sa Nauvoo sang 1842, ang handom ni Sarah M. Kimball nga magbulig sa mga tawo nga nagatukod sang templo nagtulod sa isa ka grupo sang mga sister nga mag-organisar sang ila mga kaugalingon agud nga makaalagad sila sing mas maayo. Sang nagasugod sila sa pagsinapol, ang Propeta … nag-organisar sang una nga Relief Society suno sa sulukdan sang priesthood. Sumugod sadto, ang mga sister sang Relief Society nagbulig sa pagpauswag sang buluhaton sa templo sang Nauvoo. …

“Sang 1855, walo ka tuig ang nagligad sang una nga mag-abot ang mga Santos sa Utah, ang Endowment House ginpasad. Si Eliza R. Snow, nga nangin isa sang orihinal nga mga miyembro sang una nga Relief Society kag nagpreserba sang mga rekord sinang organisasyon, gintawag ni Pangulong Brigham Young sang 1866 nga mangin ang pangkabilugan nga pangulo sang Relief Society. Sia kag ang iban pa nga mga sister nangin matutom nga mga kabulig sa Endowment House. Dayon, sa pagkahuman sang mga templo sang St. George, Logan, kag Manti, ining mga sister nagbiyahe sa tagsa ka templo agud mahikot nila ang buluhaton para sa mga minatay didto.”¹

© 2010 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/09. Petsa sang pagtugot sa paglubad: 6/09. Linubad sang Visiting Teaching Message, December 2010. Hiligaynon. 09372 861

Ano ang Sarang Ko Mahimo?

Paano ko mabuligan ang akon mga kauturan nga babayi sa pagpangita sang ila mga katigulangan kag paghikot sang mga ordinansa sang templo para sa ila? Hunahunaa ang mga sirkumstansya sang tagsa ka utod nga babayi samtang ginabinagbinag ninyo kon paano masabat ang iya mga panginahanglan. Mahimo ninyo hunahunaon nga ang buluhaton sa family history sa masami makapabakod sang bag-o, nagbalik, kag di-gawa aktibo nga mga miyembro.
Sang san-o bala ang buluhaton sa templo kag family history nagpasulhay sa akon sa mga hangkat nga akon ginaatubang ukon naggiya sa akon sa importante nga mga desisyon?

Para sa dugang nga kasayuran, maglog-on sa www.reliefsociety.lds.org.