Klumech ra First Presidency, Ongeteruich ma ongerung el buil 2010
Ng Sebeched el Mesang a Kristo?
A tara klebesei ea chedam el rubak a milenguiu ra cheldecheduch el mora euang a rekil redil el ngelekel a ngelekel e ngulemes el mor bab e kmo, “Chedam, ka momes aikal ptuch!” Ngkal rubak a mlo klikmechur e dulang el kmo, “Kid a ngara chelsel a blai, e rungalk. Ng diak a ptuch er tiang.” Eng di ngikal ngalek a di melekoi, “Ngarngii a ptuch ra chelsel a rum er kau! Momes!”
Ngkal rubak a ulemes el mor bab, e mlo mechas a rengul, leng miles a kora medidiich el ngara tensio. Ng diak desal ungil mes, eng di a llomes sel bol sbechii er ngii, eng meral kora teletelel a ptuch. Ng osengel a ngalek a miles, eng ding mlar ngii. Me ngulemuchel er tiaikid el taem, e ngikal rubak sel tal bol tuu er tial rum e lomes er bab, eng sebechel mes a dimlak el ues ra ngara mong.
Kid a mocha soiseb ra tara klebokel el taem ra Kurismas el mui ra chelitakl ma llomes, blengur ma beresent. Eng di a rokui el chad, e kid a rechedal a ikelesia el obang a ngklel Osobel a kired el lengelakl osenged er tial taem el mo sebeched el mesang sel meral klemerang ma klebekelel tial taem.
A kora omdasou el kmo te telang el chad el mlara Bethlehem a mle medengei el kmo, ng di kmeed er tir, a cherellel Osobel? A Ngelekel a Dios, ngkal meketeketang el longiil er ngii el Mesiah—A Ngii el mlara delongelir!
Kom dobedebek a tekingel a anghel el mora remengkar a charm? ”Chelechal sils eng mo mechell ra chelsel a beluu ra David a Osobel, el ngii a Kristo el Rubak.” Me te dulang el kmo, “Mei e dorael el mora beluu ra Bethlehem, e desang tial tekoi el mla duubech” (Lukas 2:11, 15).
Meng uaia tirkel mengkar a charm, eng kired el kmung ra chelsel a rengud el kmo, “Mei e desang tial teletael el mla duubech.” Ng kirel mor ngii a klemeriar reng ra rengud el kirel. Mei e desang ngkel di Chimong el Chedaol ra Israel el ngara ongolel a charm, chelsel a templo, bebul a ked, e ngara kerus. Meng uaia remengkar a charm, e mei e dekebkellii e dodengesii a Dios el kirel tial klou el klumech ra deoureng!
A bebil ra taem ea ikel kot el meringel a deues el tekoi aikel kmal meketeketang el ngara bitar kid. El uaia ngkel chedam el dimlak el ues a ptuch el ngara tensio, e kid a lebebil ra taem eng diak a ngerang el desang sel dolab a di osenged.
Kid el mla rongesii a chetengakl el klumech el kirel sel lemei a Ngelekel a Dios, kid el mla mo oungakl ra Ngklel a mla sosieb ra telbiil el mo merael ra Rolel el Chedal—eng diak el kired el obosech el mekengii a rengud ma uldesued meng sebeched el meral Mesang.
Tial taem ra Kurismas a klebokel ra chelsel a kakerous el teletael. Ng taem ra blekokeuii lomeruul lobengkel a beltik el reng ra klochad. Ng taem el dolbedebek el kirel a klengar kid ma ikel betok el klengeltengat el dolab. Ng taem ra ousubes ma klausubes. Ng taem el dengara deoureng ra chelitakl, llomes, blengur ma beresent. Eng di cheltel tial taem a diak el kirel ngosengesii osenged el terrebengid me lak desang a meral Prince ra Budech me sel Klisichel.
Mei e derellii tial taem ra Kurismas el taem ra deoureng ma ungil klebesei, el taem el doureng a sulel a Mesisiich el Dios el uldureklii a Di Chimong el Ngelekel Sechal, el Jesus Kristo, el mo osobelel a beluulechad!
© 2010 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/09. Kengei er a oidel: 6/09. Oidel a First Presidency Message, December 2010. Palauan. 09372 881
Uldasou el Kirel Osischeklel Tial Klumech
1. ”A omeruul a sebechel usbechall el mo omeksemeriar e ngosuterir a remesuub el mo omtab ra klumech el ngara tial suobel. … A siasing a kmla bedochel el dongu el melisiich ra belkul a suobel e ngosuterir a remesuub el mo blak a rengrir el omtab” (Teaching, No Greater Call [1999],160, 176). Me sel momuchel el ouchais er tial klumech, e momdasou ousbech omeruul el uaia olecholt a siasing malechub a bades ra chedaol llechukl e moker ra telungalk el mo omdasou el kmo ng mekerang e uaia tial klumech.
2. ”A tara kot el klou a belkul moktek er kau a ngosuterir a rebebil el mo oltirakl a osisechakl ra ebangkelio ra klengar tir ra bekel sils. … Mngosuterir a rebebil el mo metik a klengeltengat el bol ngai sel loltirakl ra ebangkelio” (Teaching, No Greater Call, 159). Uirur ra omouchais er tial klumech, e momdasou a siotai ra rechedal a telungalk el mo ouchais a teletael mla duubech el mor tir sel lomtab e lomdasou ra Osobel ra temel a Kurismas.