iTabagone
Vodo Basikeli ki na Veigauna sa Bera Mai
E vuqa na cauravou era vakavakarau vakailavo me ra laki kaulotu. E Aferika e tiki ni vakavakarau oqori me ra rawata na ilavo me saumi rawa kina e dua na pasipote. O Sedrick Tshiambine a rawata na veika e gadreva ena dua na sala gugumatua: ena nona volitaki jaina ena dua na basikeli.
E vakaitikotiko o Sedrick e Luputa, ena Democratic Republic of Congo. O koya e dua vei ira na 45 na cauravou ena tikina o Luputa era cakacaka tiko me ra rawata na ilavo me rawa kina e dua na pasipote me ra lako ki kaulotu. Ena DR Congo na isau ni dua na pasipote e $250, ka rauta ni rua na ikatolu na isau ni kena tara e dua na vale.
Ia e sega ni guce kina o Sedrick. E rawata na nona ilavo ni kaulotu ena nona vodo basikeli ena 15–30 kilomita (9–19 na maile) mai Luputa ki na veikoro lalai, me volia mai kina na jaina, ka qai vodo basikeli kosova lesu na vanua dravuisiga kei Aferika, ni sinai tu na nona basikeli ena vuanikau me laki volitaki ena koro levu. Ena veimacawa ena dau lakova e 180 kilomita (112 na maile) ena gaunisala veinuku, ka vakadua ga na kena tavuki na basikeli ni vakabi ki na dua na yasana na iusana.
Ena nona sasaga sa dau rawata o Sedrick e rauta ni $1.25 ena dua na macawa, se $65.00 ena dua na yabaki. E taura e va na yabaki me qai maroroya rawa kina na ilavo me sauma kina na nona pasipote, ia sa kila oqo ni sa okati ki na nona veisiga ni mataka na veiqaravi vakadaukaulotu tudei baleta ni sa vakarau tu vakailavo me rogoca na kaci ni veiqaravi.