iTukutuku ni Mataveiliutaki Taumada, Janueri 2011
E Gadreva Na Turaga na Daukaulotu
Ena Okotova sa oti ena koniferedi raraba au kaya kina me vakalevutaki na daukaulotu. O kemuni kece na cauravou bula kilikili, ka tu vinaka tu na nomuni bula mo ni vakavakarau mo ni laki kaulotu. Na veiqaravi oqori sa itavi ni matabete—e dua na itavi e namaka vei keda ka sa solia vei keda e vuqa na ka na Turaga. Kemuni na cauravou, au vakauqeti kemuni mo ni vakavakarau ki na veiqaravi vakadaukaulotu. Ni vakasavasavataki kemuni ka me kilikili na nomuni bula mo ni matataka na Turaga. Mo bulabula vinaka tu ka kaukauwa. Vulica na ivolanikalou. Ena veivanua e vakayacori tiko kina, vakaitavi ena semineri kei na yavulotu. Vakamatautaki iko ki na ivoladusidusi ni daukaulotu Vunautaka na Noqu Kosipeli.
Kemuni na goneyalewa, ko ni sega ni vauci ena itavi ni matabete oqo e nodra na cauravou me ra veiqaravi vakadaukaulotu tudei, ia ko ni sa cau sara tiko vakalevu ena cakacaka vakadaukaulotu, ka keimami marautaka na nomuni veiqaravi.
Vei kemuni na turaga kei na marama qase cake ena Lotu, au via taleva tale vei kemuni na Turaga e gadreva e vuqa vakavuqa tale vei kemuni mo ni mai veiqaravi vakadaukaulotu tudei. Kevaka o ni se bera ni yacova na gauna ena nomuni bula me rawa kina ni o ni veiqaravi vakaveiwatini, au vakauqeti kemuni mo ni vakavakarau ena gauna oqo ki na siga, ni sa rawa, mo drau na vakayacora vakakina kei na watimu. E vica walega na gauna ena nomuni bula ena rawa mo ni marautaka kina na yalo kamica kei na vakacegu e dau yaco mai ena noda veiqaravi tudei vata ena nona cakacaka na iVakavuvuli.
Eso beka vei kemuni o ni dau mamadua se o ni nanuma ni sega ni rauti kemuni mo ni lakova na kaci ni veiqaravi. Nanuma oqori na cakacaka ni Turaga, ni da sa cakacaka tiko ena vukuna na Turaga, sa tu na noda ivotavota ena Nona veivuke. Na Turaga ena bulia na dakuda me da colata rawa na icolacola e vakacolati kina.
Eso tale, e dina ni ra kilikili tu me ra veiqaravi, era na nanuma ni tu na veika e bibi cake vei ira. Au se nanuma tiko beka na nona yalayala na Turaga: “Niu na vakarokorokotaki ira era sa vakarokorokotaki au” (1 Samuela 2:30). E sega ni dua vei keda ena vakarokorokotaka vakalevu cake na Tamada Vakalomalagi kei na noda iVakabula me vaka na nona veiqaravi vakadaukaulotu yalodina ka yalololoma.
E dua na ivakaraitaki ni mataqali veiqaravi vakaoqo na veika erau a sotava o Juliusz kei Dorothy Fussek, ka rau a kacivi me rau laki veiqaravi vakadaukaulotu e Poladi. A sucu e Poladi o Baraca Fussek. E vosataka na kena vosa. E lomani ira na tamata. A sucu e Igiladi o Sisita Fussek ka lailai sara na veika e kila me baleti Poladi, me baleti ira na lewena sa qai sega sara. Ena vakararavi vua na Turaga, erau a goleva kina na nodrau ilesilesi. E galili na cakacaka, ka vakaitamera na nodrau itavi. E se bera ni tauyavu ena gauna o ya e Poladi e dua na Tabana ni Kaulotu. A soli vei rau na Fussek na ilesilesi me rau vakarautaka na sala me rawa ni tauyavu e dua na tabana ni kaulotu.
Erau a vuturi beka o Elder kei Sisita Fussek me baleta na vakaitamera ni nodrau ilesilesi? Sega sara ga vakalailai. Erau kila ni nodrau veikacivi sa mai vua na Kalou. Erau masuta na Nona veivuke vakalou, ka soli rau ena yalodina ki na nodrau cakacaka.
Ni toso na gauna, keitou a tomani Elder Fussek o Elder Russell M. Nelson ena Kuoramu ni iApositolo Le Tinikarua; o Elder Hans B. Ringger, ka lewena na Vitusagavulu ena gauna o ya; vata kei au, me keitou laki veitalanoa vata kei Adam Wopatka, na minisita ni veika vakalotu, ni matanitu o Poladi. Keitou a rogoca ena nona tukuna, “E vakatarai eke na nomudou lotu. E rawa ni o ni tara na nomuni veivale; e rawa ni ko ni talai ira mai na nomuni daukaulotu. Na tamata oqo,” ka dusi Juliusz Fussek, “sa veiqaravi vakavinaka sara tu mai ena nomudou lotu. Sa rawa ni dou vakavinavinakataka na nona ivakaraitaki kei na nona cakacaka.”
Me vakataki rau na Fussek, me da cakava na veika e dodonu me da cakava ena nona cakacaka na Turaga. Oti ena qai rawa vei keda, vata kei rau o Juliusz kei Dorothy Fussek, me da vakavoqataka na Same:
“Sa lako mai vei Jiova na noqu ivukevuke, O koya ka bulia na lomalagi kei vuravura.
“… O koya sa maroroi iko ena sega ni sosovu.
“Raica, o koya sa maroroi ira na Isireli ena sega ni sosovu se moce” (Same 121:2–4).
© 2011 mai na Intellectual Reserve, Inc. Dodonu kece e taqomaki. Tabaki e Amerika.Vakadonui me Vakavalagi: 6/10. Vakadonui me vakadewa: 6/10. iVakadewa ni First Presidency Message, January 2011. Fijian. 09761 858