iVaqa ni Veisiko, Janueri 2011

Na iTukutuku kei na iYau ni iSoqosoqo ni Veivukei

Vulica na itukutuku oqo, ka me veivosakitaki vata kei ira na marama o sikova ena kena ivakarau donu. Vakayagataka na taro me vukea na nomu vaqaqacotaki ira na marama tacimu ka cakava me sa tiki kaukauwa ni nomu bula na iSoqosoqo ni Veivukei.

Vakabauta • Matavuvale • Veivukei

A nanuma lesu o Eliza R. Snow na veivakatavulici ni Parofita o Josefa Simici ni “e dina ga ni yaca [iSoqosoqo ni Veivukei] e yaca ni gauna oqo, na isoqosoqo sa tauyavutaki makawa sara.”¹

Erau a sikovi Josefa Simici, na Tamada Vakalomalagi kei na Luvena, o Jisu Karisito, ia mai vua, sa vakalesuimai kina na taucoko ni kosipeli ki vuravura. A tiki ni veivakalesuimai o ya na iSoqosoqo ni Veivukei. Na ituvaki ni Lotu a sega ni taucoko me yacova ni ra sa tuvalaki na marama.²

Ena veivula mai oqo, na iVaqa ni Veisiko ena solia vei keda na madigi me da vulica vakalevu cake sara na itukutuku ni iSoqosoqo ni Veivukei kei na kena itavi ena vakalesuimai ni kosipeli. E vuqa na vuna, na kilai ni keda itukutuku e sega walega ni bibi ia e yaga.

iMatai, na kilai ni noda itukutuku e uqeti keda me da vaka na marama ni Kalou ka gadrevi me da vakakina. Mai na kena vakamuri ni nodra ivakaraitaki vakamarama o ira na marama ni Yalododonu Edaidai, e rawa ni da vulica mai na veika sa oti na ivakarau me da sotava kina na veigauna se bera mai.³

iKarua, na noda itukutuku e vakatavulica ni veiivakavuvuli vata ga ni Lotu e liu era sa noda yavu ni ivakavuvuli nikua. Na kila ka kei na noda inaki oqo—me vakalevutaki na vakabauta kei na bula savasava vakayadudua, vaqaqacotaki ni matavuvale kei na vuvale, ka vukei ira era gadreva—na semati vata ni noda gauna sa oti kei na noda gauna oqo.

iKatolu, ni da vakadikeva na keda itukutuku, e rawa me da wasea vakavinaka cake na noda isolisoli vakayalo. E kaya o Peresitedi Henry B. Eyring, iMatai ni Daunivakasala ena Mataveiliutaki Taumada: “O solia yani na isolisoli ena nomu vukei ira tale eso me ra ciqoma na isolisoli ni loloma. … Na itukutuku ni iSoqosoqo ni Veivukei e volai tu ena vosa kei na iwiliwili, ia na kena iyau sa ikoya ni sa ka ni yalo na kena veisolitaki.”⁴

Kena itinitini, na kilai ni keda itukutuku e vukea na kena na taucoko tiko na iSoqosoqo ni Veivukei ena gauna se bera mai. A vakamacalataka o Peresitedi Spencer W. Kimball (1895–1985), “Keimami kila ni o ira na marama era vakavinavinakataka vakatitobu na veigauna e liu era na kauwai me baleta na kena vakavinakataki e dua na bula savasava ena gauna se bera mai.”⁵

Julie B. Beck, peresitedi raraba ni iSoqosoqo ni Veivukei.

Mai na iVolanikalou

Esiteri 9:28–29; Roma 16:1–2; Alama 37:8; Moronai 7:45–47

Mai na Keda iTukutuku

“Na iSoqosoqo ni Veivukei sa ikoya na nona isoqosoqo na Turaga me baleti ira na marama.”⁶ Ena nona itutu vaka parofita, e a tauyavukata kina o Josefa Simici na iSoqosoqo ni Veivukei ena ika 17 ni Maji, 1842. Na iwasewase lailai, duidui ena imatai ni soqoni era marama gugumatua, me vakataki ira na marama ni iSoqosoqo ni Veivukei nikua. “Eratou yabaki tinivakacaca o iratou na gone duadua, kei koya e qase duadua, e dua na marama yabaki limasagavulu vakacaca. Eratou lewe tinikadua vei ira na marama era sa vakawati, lewe rua erau yada, lewe ono era sega ni vakawati, kei na kena ituvaki e dua e sega ni matata. Na nodra vuli kei na kedra ituvaki e duidui sara vakalevu, vakatalega kina na nodra itutu vakailavo. Na kedra duidui ena vakalevutaki vakavuqa ena kena tomani na tubu cake tikoga ni lewe ni isoqosoqo, ia era sa tomana tikoga me ra duavata.”⁷

© 2011 mai na Intellectual Reserve, Inc. Dodonu kece e taqomaki. Tabaki e Amerika.Vakadonui me Vakavalagi: 6/10. Vakadonui me vakadewa: 6/10. iVakadewa ni Visiting Teaching Message, January 2011. Fijian. 09761 858