Pweng luhn Prestuhnsi Se Met, Jacnweri 2011
Leum El Enenuh Misineri
Toeni luhlahp ke Ohktopa tari ac Nga siyuck in puhs misineri. Mwet fuhsr suwohs, kuh in mahno nuh kwewa enenuh in ahkolah in kuhlwacnsap ke sie misin. Kain kuhlwacnsap inge pa kunohkohn luhn pristut—kunohkohn se Leum El enenuh sesr suc ma ituckyang yohk nuh se uh. Mwet fuhsr, Nga ahkkweye kom in ahkolah in kuhlwacnsap in ekihn sie misineri. Liyekomyang in nwacsnwacs ac suwohs ac in fal in ahol Leum. Liyacacng moul lom ac kuhiyom. Lutlutkihn ma suhmuhslah. Yen ma oasr ma inge we uh, wi kuhlahs luhn mwet fuhsr ac institute an. Ahkpahyekom ke puk srihsrihk luhn misineri an Luti Wosasuc Luhk.
Tahmtahel, ke wacngihn yuruwos kain kunohkohn luhn pristut se pacna ma oacna mukul fuhsr in oruh kuhlwacnsap in ekihn misineri ke lwen nuh kwewa, kowos oacyacpac oruh mwe kahsruh sacohk se in ekihn misineri, ac kuht pain kowos ke kuhlwacnsap lowos an.
Nuh suwos tamuhlwel ac tahmtahel mahtuh ke Alu uh, Nga ahkacsmakihnye kowos lah Leum El enenuh in puhs, puhsacni suwos in wi oruh kuhlwacnsap ke misineri ke lwen nuh kwewa uh. Fin soenna pacl lowos in oruh kuhlwacnsap ke misin luhn siacnyacn uh, Nga kwacfe kowos in ahkolah inge nuh ke lwen se, ke lwelah luhn ohiyac ma sikyak yuruwos an, kom ac muhtwacn kiyom an in oruh oacna. Oasr kuhtuh pacl ke moul lowos an ke kowos ac tuhfah engankihn nguhn wowo ac insewowo ma tuhkuh ke ituckyang luhn tuhkweni kuhlwacnsap ke lwen nuh kwewa ke orekma luhn Leum.
Inge, kuhtuh suwos kuh in tonong kuh nuhnkuh muh kowos tiac kuh in oruh wo ke pahng in kuhlwacnsap uh. Esam lah orekma luhn Leum pa inge, ac ke kuht oruh kuhlwacnsap luhn Leum uh, oasr suwohs lasr nuh ke kahsruh luhn Leum. Leum El ac taflwe fin tukum in kuh in lihpihsacack ma toasr fihliyucki feim uh.
Kuhtuh sahyac, nwe fal in kuhlwacnsap, kuh in puhla selos muh oasr srihpac yohk sahyac lalos. Kwacl kuh Nga esam Olwelah luhn Leum ah: “Nga fah akfulatyalos su akfulatyeyu” (1 Samuel 2:30). Wacngihn sesr fah ahkfuhlwactye Pahpah Tuhmasr Inkuhsrao ac Mwet Lahngo lasr yohk liki na in kuhlwacnsap in oruh sie misineri insacnweacng ac insemuhlahlah.
Sie mwe srihkasrak ke kain ohiyac inge pa puhlakihn luhn misineri lal Juliusz ac Dorothy Fussek, suc pahngonyuck in koanwelah misin se fin acn Poland. Tamuhlwel Fussek el isuslac Poland. El kahs Poland. El luhngse mwet we uh. Tahmtahel Fussek el isuslac England ac etuh kuhtuh acn Poland ac tiac etuh ke mwet we uh. Luhlahlfongi ke Leum, elos som ke ma kuneyucki lalos. Orekma sac muhkahimtacl, orekma lalos yohkna. Misin uh in pacl sac soenna akwucki fin acn Poland. Ma kuneyucki ituckyang nuh sin Fusseks ah pa in ahkolah innek se in muh kuh in akwucki sie misin.
Kuh Elder ac Tahmtahel Fusseks elos fuhlweack ke srihpen yohklacna luhn ma kuneyucki lalos uh? Tiac ke kihtin pacl. Elos etuh lah pahng lalos uh ma sin God. Elos pruhe nuh ke kasruh muhtahl Lal, ac elos kihsackuhnwacng ke insiyaclos nuh ke orekma lalos.
Ke pacl sac Elder Russell M. Nelson ke U luhn Mwet Sap Singucul Luo; Elder Hans B. Ringger, suc tuh wi Mwet Itngucul; ac Nga, weluhl Elder Fussek, ohsun nuh sin mwet tol ke alu, Adam Wopatka, ke kafucrmacn Poland ah. Kuht lohng ke el fahk, “Alu lowos uh sukohsohk nuh yenuh. Kowos kuh in muhsahi lom lowos an; kowos kuh in suhpuh misineri lowos an. Mukul se inge,” srihsrngilyac Juliusz Fussek, “el kuhlwacnsapi wo alu lowos uh. Kom kuh in srui mwe srihkasrak ac orekma lal uh.”
In oacna Fusseks, lwelah kuht in oruh ma kuht enenuh in oruh ke orekma luhn Leum uh. Na kuht kuh, ke Juliusz ac Dorothy Fussek, onkackihn Sam:
“Kasru luk tuku sin Leum God me, suc orala kusrao ac faclu.
“… El su liyekomyang fah tia motulla.
“Liye, el suc liyaung Israel fah tiana motul kuh folosuwosla” (Sam 121:2–4).
© 2011 sin Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke English: 6/10. Ahkkweyeyucklac ke lweng: 6/10. Lwenglah ke First Presidency Message, January 2011. Kosraean. 09761 868
Luti ke Pweng Se Inge
Teaching, No Greater Call fahk: “Akacsruhi ke puhlakihn la ke ohiyen moulkihn ip yohk ke wosasuc uh ahkinsewowoye moul lowos uh. Suli elos suc kom luti an in sruhmuhn kuhtuh ke puhlakihn lalos an” ([1999],159). Riti pweng se inge ac siyuck sin mempucr ke sucu suc Prestuhn Monson el fahk lah elos enenuh in kuhlwacnsap ke sie misin. Akacsruhi ke puhlakihn luhn kais sie ma kom kuh elos sahyac tuh puhla ke kuhlwacnsap in ekihn misineri ke lwen nuh kwewa. Kuh akacsruhi ke plwacn lom in kuhlwacnsap in ekihn misineri se ke pacl tok uh. Siyuck sin mempucr ke sucu an in akacsruhi ke plwacn lalos ac ma wo elos puhlakihn uh.