Ennaan eo an Būreejtōnji eo Kein Kajuon, Jānwōde 2011
Irooj Eaikuj Mijinede ro
Oktoba eo ļo̧k ilo kweilo̧k eo eļap Iaar kūr n̄an elōn̄ļo̧k mijinede. Aolep ro rereeo, likao eo ekajoor ej aikuj kōppopo n̄an jerbale juon mijen.. Kain jerbal in jipan̄ in ej juon jerbal an priesthood—juon eddo Irooj ej kōtmāne jān kōj ro rekar ļap aer leļo̧k. Likao ro, Ij kakkōl kom̧ n̄an pojak n̄an jerbal āinwōt juon mijinede. Kōjparok am̧ erreo in wāppen im erreo ñan jutak ilo etan Irooj. Kōjparok am̧ ājmour im kajoor. Katak jeje ko rekwojarjar. Ijo ekkar, bōk kuņaam̧ ilo seminary im institute. Kamineneik eok make kōn bok in bōk meļeļe eo an mijinede (missionary handbook) Kwaļo̧k Aō Ko̧jpeļ.
Jejtōr ro, Tōre in ejjeļo̧k ippāmi ejja eddo in priesthood in āinwōt likao ro n̄an jerbal āinwōt mijinede ro rej jerbal aolep raan, kom̧ij barāinwōt kōm̧m̧ane juon jipan̄ eaorōk āinwōt mijinede ro, im kōm̧ij karuwaineneik jerbal ko ami.
N̄an būratōr im jejtōr ro rerūtto an Kabun̄ eo, Ij kakememej kom̧ bwe Irooj eaikuji elōñļo̧k, elōn̄ļo̧k iaami n̄an jerbal āinwōt mijinede ro rej jerbal aolep raan. N̄an kom̧ ro rejjan̄in tōpar iien mour eo n̄e kom̧ maron̄ jerbale juon mijen an ripālele, Ij kōketak kom̧ n̄an kōppopo kiiō n̄an raan ņe, ilo an jekjek ko ami kōtļo̧k kom̧, kwe im eo pālele aikuj kōm̧m̧an āindein. Elōn̄ jejjo iien ko ilo mour ko ami n̄e kom̧ naaj lan̄lōn̄ kōn jetōb eo em̧m̧an im bun̄ bōro kaki men kein rej itok jān kōm̧m̧an jerbal ippān doon aolep raan ilo jerbal eo an Maajta eo.
Kiiō, jet iaami remaron̄ abje ilo nemmāme ak watōk am̧ make jekkar n̄an uwaake juon kūr n̄an jerbal. Kememej bwe en̄in ej jerbal eo an Irooj, im n̄e jej pād ilo jerbal eo an Irooj, jej ekkar n̄an jipan̄ eo an Irooj. Irooj enaaj ļame tulik n̄an bōk eddo eo likūti ņae ioon.
Ro jet, men̄e rereeo n̄an jerbal, maron̄ en̄jake elōn̄ļo̧k kālōt ko raorōk. Ekwe Ij ke kememej kallim̧ur eo an Irooj: “Bwe ro rej koutiej Eō Inaaj koutiej er (1 Samuel 2:30). Ejjeļo̧k juon iaad enaaj kautiej Jemedwōj Ilan̄ im ad Rilo̧mo̧r eļap ļo̧k jen jerbal āinwōt juon mijinede ewujlepļo̧k im tiriam̧o.
Juon waanjon̄ak in jerbal rōt in ekar imminene in en̄jake jerbal in mijinede eo an Juliusz im Dorothy Fussek, ro kar kūr er n̄an kadedeļo̧k juon mijen ilo Poland. Būratōr Fussek ekar ļōtak ilo Poland. Eaar kōnono kajin eo. Eaar iakwe armej ro. Jejtōr Fussek ekar ļōtak ilo England im jiddik wōt an jeļā kōn Poland im ejjeļo̧k kōn armej ro an. Lōke ilo Irooj, rekar ilo̧k n̄an jerbal eo aer. Jerbal eo ekar kaaijmakeke, jerbal eo aer eaar lukkuun ļap. Juon mijen ejjan̄in kar ejaake ilo Poland. Jerbal eo kar leļo̧k n̄an Fusseks ekar n̄an kōpooj iaļ eo bwe mijen en maron̄ ejaak.
Eļtōr im Jejtōr Fussek rekar ke pere kōn jon̄an jerbal eo aer? Jaab n̄an jiddik. Rekar jeļā bwe jerbal eo aer ekar jān Anij. Rekar jar kōn jipan̄ eo An ekwojarjar, im rekar wujlepļo̧k er make aolepen būruweer n̄an jerbal eo aer.
Ilo iien eo Eļtōr Russell M. Nelson jen Doulul eo an Jon̄oulruo Rijjilōk ro; Eļtōr Hans B. Ringger, jen Jimjuonn̄oul eo; im N̄a, kar mije jen Eļtōr Fussek, kweilo̧k ippān minister eo an menin jipan̄ an kabun̄, Adam Wopatka, jen kien eo an Polish. Kōm kar ron̄ an ba, “Kabun̄ eo am̧ ej ruwainene ijin. Kom̧ maron̄ kalōk m̧ōn jar ko ami; kom̧ maron̄ jilikintok mijinede ro. Em̧m̧aan in,” jitōn̄ļo̧k Juliusz Fussek, “eaar em̧m̧an an jerbal n̄an kabun̄ eo ami. Kom̧ maron̄ kam̧oolol kōn waanjon̄ak eo an im jerbal eo an.”
Āinwōt baam̧le in an Fussek, jen kōm̧m̧an ta eo jej aikuj in kōm̧m̧an ilo jerbal eo an Irooj. Innām jemaron̄, āliji Sam ko, ippān Juliusz im Dorothy Fussek:
“Aō jipan̄ ej itok jān Jeova, eo Ear Kōm̧anm̧an lan̄ ko im laļ.
“… Eo kōjparok eok E jāmin kiki.
“Lo, Eo ej kōjparok Israel E jāmin mejki ak kiki” (Sam ko 121:2–4).
© 2011 jen Intellectual Reserve, Inc. Aolep jim̧we rej pād ippān. Jeje ilo Amedka. Kōmālim ilo kajin Pālle: 6/10. Kōmālim an Ukook: 6/10. Ukook eo an First Presidency Message, January 2011. Marshallese. 09761 874
Katakin jān Ennaan In
Teaching, No Greater Call ej ba: “kwaļo̧k juon en̄jake eo am̧ make kōn wāween an juon pedped in ko̧jpeļ eo kar kōjeram̧m̧an mour eo am̧. Karuwaineneik ro kwoj katakin n̄an kwaļo̧k tukaduin en̄jake ko aer make” ([1999], 159). Riiti ennaan in im innām kajjitōk ippān membōr in uwaan baam̧le eo wōn ro Būreejtōn Monson ekar ba rej aikuj jerbale juon mijen. Kwaļo̧k en̄jake ko an juon make bwe kwe im ro jet em̧ōj aer jerbal āinwōt mijinede ro rej jerbal aolep raan. Ak kwaļo̧k karōk eo am̧ n̄an jerbal āinwōt juon mijinede ilju im jekļaj. Kajjitōk ippān membōr in uwaan baam̧le eo n̄an kwaļo̧k karōk ko aer im imminene ko aer rem̧m̧an.