Klumech ra First PresidencyKOT EL BUIL 2011
A Rubak Ousbech ra Remisionari
Tial mlo merek el Ongeteruich el buil ra temel a klou el ongdibel ea kulmekedong el kirir a lmuut el betok el misionari. A bekel klikiid, e sebecherir el ngeasek el sechal a kirir el mengedmokl el kirel a mision. Tial omesiou a ngerachel ra priesthood—el Rubak a mengerechir ngii er kid ele kid el kmal betook a bla dengai. Rengeasek el sechal, a kumeklatk er kemiu me bom kldmokl el mora omesiou ra misionari. Bo beches e mklikiid el mo omtechei ra Rubak. Bo mesisiich e mngara ungil ulekereuil a bedengiu. Mosuub chedaol llechukl. Alsekum e ngarngii, e bom ngara seminary ma institute. Bo mosuub el mo medengelii sel babilengir a remisionari el Molisechakl ra Ebangkelio er Ngak.
Rodos, meng uaisei el diak a ngerachel ra priesthood el mobang el uaia rengeasek el sechal el mo mesiou el cherrungel el misionari, eng di kom dirrek el kmal ngarngii omrellii el kirel a ureor ra misionari, e kmal dmeu a rengmam el kirel omesiungiu.
Tirkel meklungang el odam ma odos ra Ikelesia, ea kumeklatk el kmo a Rubak a ousbech ra lmuut el betok, el betok el chad el mo mesiou ra ureor ra misionari. Alsekum eng dirkak bol sebechemiu el mora mision el obekel, ea kmal olengit er kemiu me mongedmokl er kemiu er chelechang el kirel sel sils, el sel bol sebechemiu, e bora mision el obekel. Ng kesai aikel taem ra klengar kemiu el bo molchesuar a deuil ma klungiolel a reng sel bo mdak el mesiou ra urerel a Mastang.
Chelechang, ea rebebil er kemiu a locha merur malechub e komomdasou el kmo ko metitur el kongei ra okedong lekor kemiu el mo mesiou. Molatk el kmo tiang a urerel a Rubak, e sel doruul a urerel a Rubak, eng blingeled el ngmai a ngesou ra Rubak. A Rubak a mo sumecheklii a berraod el mchellungel er ngii.
A rebebil, el tir a klikiid el mo mesiou, a mo omelchesiu el kmo ngarngii a lmuut el bebil ra meklou a belkul tekoi el kirir el ma remuul. Mak lotkii a yaksok ra Rubak el kmo: “Tirkel mengull er ngak a bo kungull er tir” (1 Samuel 2:30). Ng diak a tar kid el mo mengull ra Demad ra Babeluades ma Osobeled a lak bol blak a rengud el ngara omesiou, el mo chubechub el misionari.
A okesiul tial teletael ra omesiou ra remisionari a Juliusz ma Dorothy Fussek, el tir a mlokedong el mora mision ra beluu ra Poland. A Brother Fussek a mlechell ra beluu ra Poland. Ng millekoi a tekoi er tial beluu. Ng mle betik a rengul ra rechad. A Sister Fussek a mlechell ra England e mle telkib el medengei a tekoi ra Poland e diak lodengelterir a rechad er tial beluu. Eng di ng klaumerang er tir ra Rubak, ete mocha meruul er tial ngerachel. A ureor a uaia blel cheloit, ea ngerchelir a mle klou. Tiaikid el taem eng dirkak el mekedmokl a mision ra beluu ra Poland. A ngerachel el mlora re Fusseks a mo kudmeklii a rael meng mo sebechel mekedmokl a mision er tial beluu.
A Elder ma Sister Fussek ng locha mlo mesaul a rengrir el tial klungel a urerir a uchul? Ng dimlak a tang. Te mle medengei el kmo okedong el mor tir a mlara Dios. Te milluluuch lolengit chedaol ngesou er Ngii, e mle blak a rengrir el kirel a urerir.
Meng dimle telkib el taem ea Elder Russell M. Nelson ra Chelchad ra Teruich ma terung el Apostol; ma Elder Hans B. Ringger, el sel taem e ngara Seventy; ma ngak, a ulebengkel a Elder Fussek, e mlo kebetech kemam ma oungerachel a klechelid er tial beluu, el Adam Wopatka, ra kabelment ra Poland. Aki rirngesii el kmo, “A ikelesia er kemiu a kmal di subed a leborngii er tial beluu. Ng sebechemiu el mekedechor omekedecheraol er kemiu; e moldurokl ra remisionari el mei. Ng kal chad,” e melutk ra Juliusz Fussek, “a kmal mla mo ungil mesiou ra ikelesia er kemiu. Ng kirel dmeu a rengmiu el kirel okesiul ma urerel.”
Meng uaia re Fusseks, e mei me bo doruul aikel ngii a kired el meruul el urerel a Rubak. Seikid eng mo sebeched, lobengkel a Juliusz ma Dorothy Fussek, e kmung a tekoi el ngara Psalm:
“A ngesou a kngai ra Rubak, el milebii a eanged ma chutem.
“… Ngkel ngoikau a diak bol riid.
“Ele, ngkel nguu a Israel a diak bol riid malechub e bol mechiuaiu” (Psalm 121:2–4).
© 2011 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/10. Kengei er a oidel: 6/10. Oidel a First Presidency Message, January 2011. Palauan. 09761 881
Osischeklel Tial Klumech
Teaching, No Greater Call a kmo: “Mouchais el kmo ng mekerang e sel moltirakl a llach ra ebangkelio e ke ngmai a klengeltengat ra klengar kau. Molengit er tirkal molisechakl er tir el kuk mo ouchais aikel mla duubech el teletael el mor tir” ([1999], 159). Mchiuii tial klumech e moker ra telungalk el kmo ng techang a bla ldung a President Monson el kmo ng kirel mora mision. Mouchais el kirem malechub a rebebil ra rechad el kirel omesiou ra misionari. Malechub e mouchais el kirel a moktek er kau el mora mision ra tara klebesei. Molengit ra rechad ra telungalk el mo ouchais a moktek er tir malechub aikel ungil mla duubech el mor tir.