Mwet Fuhsr
Misineri Pucspucs ke Moul Luhk uh
Sacnri se emet Nga wi misineri alu ac, Nga akihlenwack mwet nga wi matuhlah ac etuh ke mura uh. Nga liyacack sie sin kawuck wowo luhk ke lutlut ac, mwet sihm ke elementary ac high school ac, tuhlihk muhtwacn se nga tiac arlac wo nuh se ke pacl met ah, ac finne nuh ke pacna tuhlihk mukul fuhsr se suc nga tuh muhsmuhsen nuh se ah.
Kais sie sin mwet inge oasr ikeyac ma pahtpaht sihk. Kawuck wowo se luhk ah pa sie muhtwacn fuhsr na wowo se, ac ke srihpacl Nga sulaclah in sirape na Alu uh. Mwet sihm ma esamyuc ke lutlut ac kahsreyuc in etuh lah yohk srihpuck. Nga lotwelah ke luhngse luhn God ac luhngse pwacye sin muhtwacn fuhsr ma asruoki nuh sihk macnsiskuhnlah elah tiac-fal luhk nuh selos met ah. Tuhlihk se Nga muhsmuhsen nuh se ke Nga fuhsr ah akiyac mwe srihkasrak na wo se, Nga akihlen kahlwem lal ac ke muhta infahrol.
Puhla inge kahsrweyuc etwaclah lah, nwe met liki na ohsun luhk nuh yurin misineri uh ah, Pahpah Inkuhsrao El ahkoeyuclac in eis wosasuc uh sin mwet El fihliyac yuruk uh. Selos me Nga lotwelah lah ma srihsrihk kuht oruh uh kuh in yohk ikeyac. Yohk srihpaciyac uh, Nga etwaclah lah orekma luhn misineri uh muhtwacwacack yuruk.