Pweng luhn Prestuhnsi Se Met, Febweri 2011

Fuhkah Luhpan Engam Lowos

Sel Prestuhn Henry B. Eyring

Mwet in Kahsruh Se Met ke Prestuhnsi Se Met

Sesahlah engan ke moul suc emwem liki kuh kawihl liki na in etuh lah kom kahsruh elos sahyac tari in us wosasuc luhn Jisus Kraist nuh insiyaclos. In engankihn engan sacn pa pacl wowo luhn mempucr kwewa ke Alu uh. Ke kuht pacptaislac ah, kuht orwaclah sie olwelah muh kuht ac “tu in ekihn sie mwet loh sin God ke pacl nuh kwewa ac in ma nuh kwewa, ac yen nuh kwewa suc [kuht] oasr we, finne nwe ke misac, tuh [kuht] in kuh in ahknwacsnwacsyeyuck sin God, ac in wekyucklac wi elos ke moulyak se met, tuh [kuht] in eis moul ma pahtpaht” (Mosiah 18:9).

Mempucr nuh kwewa insese ke ip se kuneyuck nuh ke Alu uh in us wosasuc luhn Jisus Kraist nuh facl uh, yen nuh kwewa ac puhlan moul na lalos. Leum El fahklah kahlwem: “Liye, Nga suhpwekomwot in fahkwack ac sulkackihn nuh sin mwet uh, ac ohinge elos nuh kwewa suc sulkackihnyuck nuh se tari in sulkackihn nuh sin mwet tuhlan la an” (liye D&C 88:81). Misineri ke lwen nuh kwewa uh in oasr kuh se lalos in lotwelos suc soenna mempucr lac ke Alu uh. Mempucr ke Alu uh in oasr kuh se lalos in soklah elos suc Leum El ahkolah tari misineri in luti uh.

Kuht enenuh in moklwe luhlahlfongi lasr ma Leum El ahkolah tari mwet infahroktacl in lutiyuck uh. El etuh lah suc elos uh ac elos ahkolah ngac, ac El kuh in kol kuhtlac nuh yorohlos ke kuh luhn Nguhn Muhtahl ac in acse nuh sesr kahs in solwaclos in lutiyuck. Olweacng se Leum El sang nuh sin sie misineri ke yac 1832 pa pac olwelah se El acse nuh sesr ke kuneyuck se lasr in suk mwet ma ahkolah nuh ke luti sin misineri: “Nga ac suhpwacoht nuh facl Nguhn Muhtahl, suc fah lotwel ke ma pwacye ac innek suc elan fah som kac; ac oacna ke el luhlahlfongi kuh, Nga fah sifil sunilyac ke twefuroh” (liye D&C 79:2–3).

Ac olwelah ke engan luhlahp nuh sin misineri luhlahlfongi kuh pa oacyacpac ma lasr mempucr suc luhlahlfongi kuh suc sang insiyacsr nuh ke orekma luhn misineri uh:

“Ac ingena, fin engan lowos uh yohk ke sie mwet suc kom use nuh yuruk nuh ke tohkohsrahi luhn Pahpah tuhmuhk uh, fuhkah yohkiyacn engan lowos fin kowos use mwet pucspucs nuh yuruk!

“Liye, oasr yuruwos wosasuc luhk, ac yot luhk, ac molwelah luhk.

“Siyuck sin Pahpah ke inek, ac luhlahlfongi lah kom ac tuhfah eis, ac kom ac tuhfah eis Nguhn Muhtahl, suc fahkwack ma nuh kwewa suc fal nuh sin tuhlihk nuhtin mwet” (D&C 18:16–18).

In weacng pac ke Nguhn Muhtahl in kahsre kuht akihlen ac suli elos suc ahkolah in lutiyuck, Leum El pahngon ac ahkpahye mwet kol in kol kuht. Ke sie lwacta ke Febweri 28, 2002, Prestuhnsi se Met el ahkyohkyaclihk kunohkohn luhn pisap ac ward ke orekma luhn misineri.¹ Ke kahsruh luhn ward kuh kaunsucl luhn pracns, u fuhlwact luhn pristut uh orwaclah plwacn se luhn misineri nuh ke u an. Ke plwacn sac oasr nuhnak tohuyak ke ohiyac ma mempucr an kuh in suk elos suc ahkolah in lutiyuck sin misineri uh. Oasr mwet se ma pahngyak in oruh mwet kol luhn misin ke ward kuh pracns. Mwet kol luhn misin sac fototo nuh yurin misineri ke pacl nuh kwewa uh ac mwet sirape kuh intoein lalos an.

Oasr inkacnek na pucspucs kowos kuh in sun wo ma enenweyuck lowos kais sie in kahsruh suk mwet nuh sin misineri uh in luti. Inkacnek fihsracsr uh pa ac wo emet uh.

Pruhe in kuh in kolyuck sin Nguhn Muhtahl. Sramsram nuh sin mwet kol ac misineri uh, in siyuck ke nuhnak lalos ac olwelah nuh selos kahsruh lowos an. Ahkkweye elos suc wi kowos ke orekma se inge. Ac oruh sie mwet loh pacl nuh kwewa ke ma kom fahk ac oruh ma Jisus El pa Kraist ac lah God El topuk pruhe.

Nga ahkpwacyei lah Nguhn Muhtahl fah kol kowos nuh yohrohlos suc suk ma pwacye ke kom pruhe ac orekma nuh ke kolyuck sacn. Ac Nga etuh ke puhla luhk lah engan lowos fah oan paht yohrohlos suc sulwaclah in eis ke wosasuc nuh insiyaclos ac in kutong ke luhlahlfongi.

© 2011 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/10. Ahkkweyeyucklac ke lweng: 6/10. Lwenglah luhn First Presidency Message, February 2011. Kosraean. 09762 868

Luti ke Pweng Se Inge

Teaching, No Greater Call ahkuhtweyac nuh sesr in ahkkweyelos suc kuht luti in akiyac finsrak in kahsrwelos moulkihn ip yohk elos lotwelah uh (liye sra puk 159). Wi sucu uh, motko in akihlen mwe insewowo ke orekma luhn misineri fwackyuck sel Prestuhn Eyring ac, fin pihrihkyuck, suli sucu uh in akiyac finsrak uh in akacsruhi ke wosasuc uh.
Motko in oruh nuhnak an ke inkacnek luhn sucu an in akacsruhi ke wosasuc, esam kahs in kahsruh lal Prestuhn Eyring ma fahk lah “inkacnek fihsracsr uh pa wo emet uh.” In lutlutkihn yohk ke oruh nuhnak, liye Teaching, No Greater Call, sra puk 160.