iTukutuku ni Mataveiliutaki Taumada, Feperueri 2011
Sa Na Uasivi Sara na Nomuni Marau
E vica wale sara na marau ena bula oqo e kamikamica cake ka dede sara na kedra balavu mai na nomuni kila ni o ni sa vukei ira eso ena nodra ciqoma e lomadra na kosipeli vakalesui mai nei Jisu Karisito. Na kena taukeni na marau oqori sa ikoya na madigi kivei ira vakayadua na lewe ni Lotu. Ena gauna eda a papitaiso kina, eda a cakava e dua na yalayala ni da na “vakadinadinataka na Kalou ena veigauna kecega, ena veika kecega kei na veivanua kecega [eda] sa tiko kina, me yacova na mate, ia me vakabulai [keda] na Kalou, ka okati kemudou vata kei ira na imatai ni tucake tale mai na mate, me [noda] kina na bula tawamudu” (Mosaia 18:9).
Era vakaitavi kece na lewenilotu ena tiki ni cakacaka ka soli ki na Lotu me ra wasea na kosipeli i Jisu Karisito ki vuravura, ena vanua cava ga era bula kina. A kaya vakamatata na Turaga: “Raica, au sa talai kemudou yani mo dou veivakavulici ka vunauci ira na tamata; ia sa nodra i tavi na tamata yadua era sa rogoca na nomudou i vunau, me ra vunauci ira na wekadra” (V&V 88:81). O ira na daukaulotu tudei me tu vei ira na kaukauwa me ra vakatavulici ira era se bera ni lewe ni Lotu. O ira na lewe ni Lotu e tu vei ira na kaukauwa me ra vakasaqarai ira oqori ka sa vakarautaki ira tu na Turaga me ra vakatavulici mai vei ira na daukaulotu.
E gadrevi meda cakacakataka noda vakabauta ni ra sa tu wavokiti keda na tamata sa vakarautaki ira tu na Turaga me ra vakatavulici. Sa kilai ira tu o Koya ka vakakina na gauna era sa vakarau tu kina, ka rawa Vua me dusimaki keda kivei ira ena kaukauwa ni Yalo Tabu ka solia vei keda na vosa meda sureti ira kina me ra vakatavulici. Na yalayala a solia na Turaga vua e dua na daukaulotu ena 1832 sa ikoya talega na yalayala e solia vei keda o Koya ena noda cakacaka meda vakasaqarai ira kina na tamata me ra vakavakarau ena nodra veivakatavulici na daukaulotu: “Ia au na solia vua na Dauveivakacegui me vakatakila vua na ka dina kei na sala me muria; ia kevaka sa yalodina tikoga, au na vakalevutaka na nona ivau ni sila” (V&V 79:2–3).
Ena noda talega na lewenilotu yalodina ka da na solia na noda igu kina cakacaka ni kaulotu, na yalayala ni marau levu ka a yalataki vei ira na daukaulotu gugumatua:
“Ia kevaka sa vuabale na nomudrau marau ni drau sa vakabula mai e dua ki na matanitu i Tamaqu, sa na uasivi sara na nomudrau marau kevaka drau sa vakabula rawa e lewe vuqa!”
“Raica sa tu vei kemudou na ivola sa volai tu kina na noqu ivakavuvuli, na noqu ivakatakila kei na noqu veivakabulai.
“Dou masuti Tamaqu ena vakabauta ka kerea vua ena yacaqu me soli vei kemudou na Yalo Tabu; io ena vakatakila vei kemudou ko koya na veika sa ganiti ira na luve ni tamata” (V&V 18:16–18).
Sa kacivi ira ka tuberi ira na iliuliu na Turaga me ra dusimaki keda, me ikuri ni Yalo Tabu me vukei keda ena noda kila ka sureti ira era sa vakarau tu me ra vakatavulici. Ena dua na ivola a volai ena ika 28 ni Feperueri, 2002, a vakalevutaka na Mataveiliutaki Taumada na itavi me baleta na cakacaka ni kaulotu vua na bisopi kei na tabanalevu.1 Mai na veivuke ni matabose ni tabanalevu se tabana, a tuva ka cakacakataka e dua na ituvatuva ni kaulotu me baleta na iwasewase na komiti e cake ni matabete. Ena ituvatuva o ya era sa tu kina eso na vakatutu kivei ira na lewenilotu ena sala ka rawa kina vei ira me ra kunei ira era sa vakarau tu me ra vakatavulici mai vei ira na daukaulotu. E tiko e dua ka kacivi me iliuliu ni tabana ni kaulotu ena tabanalevu se tabana. Sa tiko na nona sala ni veitaratara voleka sara na iliuliu ni kaulotu ni tabana o ya kei na daukaulotu tudei vakakina o ira na nodra dauvakatataro.
E levu sara na sala mo na sotava vakavinaka cake kina na nomu itavi vakai iko ena nomu veivuke ena nodra kunei na tamata me ra vakatavulici mai vei ira na daukaulotu. Ena uasivi sara na sala rawarawa duadua.
Masulaka mo dusimaki mai vua na Yalo Tabu. Veitalanoa vata kei ira na iliuliu vakaitaukei kei ira na daukaulotu, kerea na nodra vakatutu kei na nomu yalayala mo vukei ira. Vakauqeti ira o ni vakaitavi vata ena cakacaka oqo. Ka mo ivakadinadina tiko ena veigauna kece sara ena veika o kaya ka cakava ni o Jisu na Karisito kei na Kalou e sauma na masu.
Au vakadinadinataka ni Yalo Tabu ena liutaki iko vei ira era vakasaqara na dina ena nomu masulaka ka cakacakataka na veidusimaki o ya. Kau kila mai na veika au sotava ni nomu marau ena balavu sara vata kei ira era digia me ra ciqoma ki lomadra na kosipeli ka qai vosota ena vakabauta.
© 2011 mai na Intellectual Reserve, Inc.Dodonu kece e taqomaki. Tabaki e Amerika.Vakadonui me Vakavalagi: 6/10. Vakadonui me vakadewa: 6/10. iVakadewa ni First Presidency Message, February 2011. Fijian. 09762 858