iVaqa ni Veisiko, Feperueri 2011
E Dua na Vakalesuimai ni Veika Taucoko
Vulica na itukutuku oqo, ka me veivosakitaki vata kei ira na marama o sikova ena kena ivakarau donu. Vakayagataka na taro me vukea na nomu vaqaqacotaki ira na marama tacimu ka cakava me sa tiki kaukauwa ni nomu bula na iSoqosoqo ni Veivukei.
Vakabauta • Matavuvale • Veivukei
Na Parofita o Josefa Simici a tauyavutaka na iSoqosoqo ni Veivukei me dua na tiki ni Lotu yaga. Me vaka e dua na mataveiliutaki, keitou nuitaka ni na rawa me keitou vukei kemuni mo ni kila na vuna e yaga kina ena nomuni bula na i Soqosoqo ni Veivukei.
Keitou kila ni ra a vakaraitaka na vakabauti Jisu Karisito ka vakaitavi ena Nona cakacaka o ira na marama ni Veiyalayalati Vou. Luke 10:39 e tukuni Meri, ka “sa tiko talega ki na yava i Jisu, ka rogoca na nona vosa.” Ena Joni 11:27 o Maca e wasea na ivakadinadina i Karisito: “Sa kaya vua ko koya, Io, na Turaga: au sa vakadinata ni sa Karisito koi kemuni, na Luve ni Kalou, ko koya sa dodonu me lako mai ki vuravura.” Cakacaka 9:36, 39 e kaya ni “e dua sa lotu ko Tapaica na yacana, … sa dau oga sara na yalewa oqo ena cakacaka vinaka. … a sa tu voleka vua ko ira na yada kecega … ka vakatakila na icurucuru eso kei na isulu [ka] cula.” O Fipi, ena Roma 16:1–2, o koya “sa dau qarava na isoqosoqo lewe ni lotu” ka “sa dau vukei ira na lewe vuqa.”
Na iwalewale ni vakabauta oqo, ivakadinadina, kei na veiqaravi e tomani tiko ena Lotu edaidai ka ra vakadeitaki vata kei na tauyavutaki ni iSoqosoqo ni Veivukei. O Julie B. Beck, na peresitedi raraba ni iSoqosoqo ni Veivukei, a vakatavulica: “Me vaka ga na nona sureti rau o Meri kei Marica na iVakabula ena gauna ni Veiyalayalati Vou me rau vakaitavi ena Nona cakacaka, sa vakakina na marama ni itabatamata oqo, ena tu na nodra ilesilesi lavaki ni vakaitavi ena cakacaka ni Turaga. … Na tauyavutaki ni iSoqosoqo ni Veivukei ena 1842 a utura cake vata na nodra kaukauwa na marama ena nodra dui itavi vakai ira ena tarai ni matanitu ni Turaga.”1
Eda vakayacora na noda cakacaka ena noda vakanamata ki na inaki ni iSoqosoqo ni Veivukei: me vakalevutaka na noda vakabauta kei na bula savasava vakayadudua, vaqaqacotaki ni matavuvale kei na vuvale, ka vakasaqara ka vukei ira era gadreva tu na veivuke.
Au vakadinadinataka ni iSoqosoqo ni Veivukei a tauyavutaki vakalou me veivuke ena cakacaka ni veivakabulai. Na marama vakayadua ni iSoqosoqo ni Veivukei e tiko e dua nodra itavi yaga me ra cakava ena kena vakayacori na cakacaka tabu oqo.
Silvia H. Allred, imatai ni daunivakasala ena mataveiliutaki raraba ni iSoqosoqo ni Veivukei.
Mai na iVolanikalou
Mai na Keda iTukutuku
E vakatavulica o Sisita Julie B. Beck ni “eda kila kina mai vua na Parofita o Josefa Simici ni sa tiki bibi ni Vakalesuimai na iSoqosoqo ni Veivukei.”2 Na cakacaka ni vakalesuimai a tekivu vata kei na iMatai ni Raivotu ena 1820 ka tomani ena “vunau ena vunau, kei na vosa ena vosa” (V&V 98:12). Ena gauna sa tauyavutaki kina me vaka na kena ivakarau na iSoqosoqo ni Veivukei ena ika 17 ni Maji, 1842, a vakatavulica na Parofita vei ira na marama me baleta na yaga ni nodra itutu ena kena vakalesuimai na Lotu. A kaya, “Ena qai taucoko na yavu ni Lotu me yacova ni ra sa tauyavutaki mada na marama.”3
© 2011 mai na Intellectual Reserve, Inc. Dodonu kece e taqomaki.Tabaki e Amerika.Vakadonui me Vakavalagi: 6/10. Vakadonui me vakadewa: 6/10. iVakadewa ni Visiting Teaching Message, February 2011. Fijian. 09762 858