iTabagone
Na Yasa Vinaka ni Dua na iKati ni Koli
Ena vula ikatakata ni 2009, a katia na mataqu na nona koli na noqu itokani. E ka ni rarawa, ni a kasei sara ga na tebenigusuqu ena ikati o ya, ka mani lai cula sara kina.
Ni oti noqu vakamavoataki oqo, au a yalolailai sara ga. Sa tekivu yavalata na noqu vakasama na veika dredre, kau vakila ni sa vaka me vakacacani na noqu bula taucoko. Au sa dau vakasamataka tu ga na tebenigusuqu kau sa sega kina ni dau via laurai e matanalevu. Sa vaka me vakacacani kina na noqu inakinaki me baleta na piano, veitavipolo (volleyball), lotu, sisili, kei na vuli.
Ia ena gauna au dau masu kina, ciqoma na veivakalougatataki vakamatabete, veitalanoa vata kei rau noqu itubutubu, se sikovi mai vei ira na noqu matavuvale kei na itokani, e laveti cake na yaloqu kau vakila na marau ena gauna ni rarawa. Au sa qai kidava ni kevaka era nanuma tiko na tamata na noqu mavoa, era na yalololoma.
Na veika au sotava oqo a vukea na kena toroi cake ni noqu ivakarau ni bula, kau sa vulica meu kakua ni lomaleqataka se cava era vakasamataka tale eso me baleti au. Au sa vakalougatataki talega ena noqu mavoa meu vukei ena noqu kidava ni dodonu me lailai na noqu vakasamataki au ka tekivu meu kauwaitaki ira vakalevu cake sara eso tani tale na tamata. E sa vakaukauwataki vakalevu cake sara na yaloqu ena gauna oqo.
Au vulica ni sa tiki ni ituvatuva nei Tamada Vakalomalagi me baleti keda na veika dredre eda sotava. Kevaka eda vakasaqara na vinaka ka sega na ca, e rawa meda na vorata na veika dredre, yaco meda tamata vinaka cake, ka laiva na veika e sotavi me vakaukauwataka na noda ivakadinadina.