iTukutuku ni Mataveiliutaki Taumada, Maji 2011
Vakasaqarai na Vinaka
Ena nodrau vaqara tiko e dua na itikotiko vou, e dua na veiwatini gone ni Yalododonu Edaidai erau a veitalanoa vata kei ira ka na rawa ni ra na tiko veivolekati kei rau me baleta na tiko veimaliwai kei na koronivuli ena vanua o ya.
E dua na marama eratou veitalanoa vata tiko a tukuna me baleta na koronivuli era vuli tiko kina na luvena: “Oqo e dua na vanua e sega ni tukuni rawa! Na qasenivuli liu e sa dua na turaga vinaka ka veivakurabuitaki; e tu vinaka nodra ivakarau ni cakacaka na qasenivuli, yalololoma, ka veimaliwai vinaka. Au sa matalau ni rawa vei iratou na luvequ me ratou mai vuli ena koronivuli veivakurabuitaki oqo. O drau na taleitaka eke!”
E dua tani tale na marama e tukuna me baleta nodratou koronivuli na luvena: “E sa dua na vanua vakadomobula. Na qasenivuli liu e bula vakaikoya ga; o ira na qasenivuli era sega ni vakaivola, viavialevu, ka ra yaloca. Kevaka me a tu vei au na ilavo meu toki tani mai na vanua oqo, keu a sa gole makawa!”
Na ka ga e lasa kina ni o rau ruarua na marama erau tukuna tiko na veika me baleta e dua vata ga na qasenivuli liu, o ira na qasenivuli vata ga, vakakina e dua vata ga na koronivuli.
O sa bau raica ni tamata e rawa me ra kunea e veigauna na veika cava ga era vakasaqara tiko? Gumatua ena vakasaqaqara, ka rawa mo na qai kunea ruarua na ka vinaka kei na ka ca voleka sara vua e dua na tamata kei na dua na ka cava ga. E tautauvata sara ga na veika era a cakava na tamata ena Lotu i Jisu Karisito ni Yalododonu Edaidai mai na kena ivakatekivu. O ira era vakasaqara na vinaka era na kunea e dua na tamata yalovinaka ka yalololoma—e dua na tamata e lomana na Turaga ka gadreva me qaravi Koya ka vakalougatataka na nodra bula o ira na nodra itokani. Ia e ka dina talega ni o ira era vakasaqara na ca era na kunea vakaidina na veika ka ra sega soti ni vakainaki.
E ka ni rarawa, ni ena so na gauna na ka oqo e yaco sara tikoga ena loma ni Lotu. O ira era vakasaqara na vuna me ra vakalelewa kina era sega ni oca na vaqara na kena sala, lasulasu, ka ra dinata sara tu yani. E vaka me dredre vei ira me ra vakayalo vinakataki ira. Era kakase ka ra vakasaqara na nodra malumalumu eso. Era katona tu na veika ca me dua na gauna balavu sara, ka ra cakava na kena levu taucoko ni nodra vakacacani ira ka vakalolovirataki ira eso. Oqo e sega ni taleitaka na Turaga “kevaka sa tu na vuvu kei na veiba, sa tu kina na veisei kei na cakacaka kecega e ca” (Jemesa 3:16).
O Peresitedi George Q. Cannon (1827–1901) e kilai Peresitedi Brigham Young (1801–77) me vaka ni rau cakacaka vata vakavoleka sara ena vuqa na yabaki, erau lewena ruarua na Kuoramu ni iApositolo Le Tinikarua ka vaka nona daunivakasala ena Mataveiliutaki Taumada. Ni oti nona sa vakacegu yani o Peresitedi Young, a vola o Peresitedi Cannon ena nona ivola ni veisiga: “Au sega ni vakalewa se kunea na cala ena nona ivakarau o [Brigham Young], nona ivakasala se veivakatavulici ena dua na gauna ena lomaqu, ka vakalailai sara ena noqu vosa se cakacaka. Ia e sa ka taleitaki vei au ena gauna oqo. Na vakanananu e tu vata kei au e veigauna sa ikoya: Kevaka au vakalelewa se kunea na cala, se vakatulewa vei Baraca Brigham, evei na vanua meu na yaco kina; kevaka meu sa tekivuna, evei meu na tini kina? Au sega ni nuitaki au ena dua na sala vaka o ya. Au kila ni vukitani e dau yaco wasoma mai na vakalelewa kei na vaqarai ni cala. Eso tale, ka ra kaukauwa, vuku ka kila ka vakalevu cake me vakatauvatani vata kei au, ena rawa me ra cakava e levu na ka ka dro bula mai na kedra isau ia e sega ni rawa vei au meu cakava oqori.”1
Sa dodonu vei keda na lewe ni Lotu meda vakasamataka ka vakamareqeta na ivakasala veivakayaloqaqataki nei Peresitedi Cannon. Na vosa ni Kalou e vakadreti ira na dau muria na Karisito me ra “savasava, … veivakacegui, yalomalua, sa vakamasuti rawarawa, sa sinai ena loloma kei na vua vinaka, sa sega ni digitaki ira vakatani na tamata, se dauveivakaisini.” Kivei ira na dauveivakacegui, “na vua ni ivalavala dodonu sa kaburaki vata kei na veivakacegui” (Jemesa 3:17, 18).
E noda na digidigi. E rawa meda vakasaqara na ca vei ira eso. Se e rawa meda veivakasaututaki ka cakacaka ena kena vakalevutaki kivei ira eso na kila, cakadodonu, kei na veivosoti ka da gadreva vakalevu sara o keda. E noda na digidigi, na cava ga eda vakasaqara, eda na kunea vakaidina.
© 2011 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/10. Vakadonui me vakadewa: 6/10. iVakadewa ni First Presidency Message, March 2011. Fijian. 09763 858