iVaqa ni Veisiko, Maji 2011

Ena Veiliutaki ni Matabete ka salavata kei na iTuvatuva ni Matabete

Vulica na itukutuku oqo, ka me veivosakitaki vata kei ira na marama o sikova ena kena gauna donu. Vakayagataka na taro me vukea na nomu vaqaqacotaki ira na marama ka cakava me sa tiki kaukauwa ni nomu bula na iSoqosoqo ni Veivukei.

iVakatakilakila

Relief Society seal

Vakabauta • Matavuvale • Veivukei

Kemuni na taciqu lomani, eda sa kalougata! E sega walega ni da lewe ni Lotu, ia eda lewena talega na iSoqosoqo ni Veivukei—“na iSoqosoqo ni Turaga me baleti ira na marama.”¹ Na iSoqosoqo ni Veivukei e ivakadinadina ni nona lomani ira na Luvena yalewa na Kalou.

E sega ni katakata na lomamu ena nomu nanuma lesu tale na itekitekivu marautaki ni isoqosoqo oqo? Ena ika 17 ni Maji, 1842, na Parofita o Josefa Simici a tauyavutaki ira kina na marama “ena veiliutaki ni matabete ka salavata kei na ituvatuva ni matabete.”²

Na kena tauyavutaki “ena veiliutaki ni matabete” a solia vei ira na marama na kaukauwa kei na veidusimaki. O Eliza R. Snow, ikarua ni peresitedi raraba ni iSoqosoqo ni Veivukei, a vakatavulica ni iSoqosoqo ni Veivukei “e sega ni rawa ni bula ni sega na Matabete, mai na dina ni vu ni kena taucoko na kaukauwa kei na veivakayarayarataki mai na ivurevure o ya.”³ E vakamacalataka o Elder Dallin H. Oaks ena Kuoramu ni iApositolo Le Tinikarua, “Na kaukauwa me ra vakayagataka na vakailesilesi kei na qasenivuli ni iSoqosoqo ni Veivukei … sa ikoya na kaukauwa e rawa ni lako mai vei ira mai na nodra isema vakaisoqosoqo vata kei na Lotu i Jisu Karisito ni Yalododonu Edaidai kei na nodra vakatikori mai na ligadra na iliuliu ni matabete era a lesi ira.”⁴

Ena kena tauyavutaki “ena ituvatuva ni matabete” a solia vei ira na marama na itavi vakamareqeti. A vakamacalataka o Julie B. Beck, na peresitedi raraba ni iSoqosoqo ni Veivukei: “Keimami cakacaka ena ivakarau ni matabete—na kena ibalebale ni da vakasaqara, ciqoma ka cakacakataka na ivakatakila; vakatulewa ena matabose; ka da kauwaitaka vakaikeda na nodra qaravi ira na tamata vakayadudua. Na noda sa ikoya na inaki ni matabete meda vakavakarautaki keda me baleta na veivakalougatataki ni bula tawamudu mai na kena vakayacori kei na kena maroroi na veiyalayalati. O koya gona, me vakataki ira na ganeda ka ra taura tu na itutu ni matabete, na noda sa ikoya e dua na cakacaka ni veivakabulai, veiqaravi, ka yaco meda tamata yalosavasava.”⁵

Barbara Thompson, ikarua ni daunivakasala ena mataveiliutaki raraba ni iSoqosoqo ni Veivukei.

Mai na iVolanikalou

1 Korinica 11:11; Vunau kei na Veiyalayalati 25:3; 121:36–46

Mai na Keda iTukutuku Makawa

Ena gauna a tara kina na Valetabu e Nauvoo, e dua na ilawalawa marama era gadreva me ra tauyavutaka na kena tokoni na sasaga ni kena tara. A vakarautaka na lawa me baleta na isoqosoqo vou oqo o Eliza R. Snow. Ena gauna a vakaraitaka kina vei Josefa na Parofita, a sauma lesu: “Tukuna vei ira na marama sa vakadonuya na Turaga na nodra soli ka oqo, ka sa tiko vua e dua na nodra itavi e vinaka cake. … Au na tauyavutaki ira na marama ena veiliutaki ni matabete ka salavata kei na ituvatuva ni matabete.”⁶ Ni oti e dua na gauna lekaleka, a tukuna na Parofita ki na iSoqosoqo ni Veivukei sa qai tauyavu vou: “Au sa solia kina oqo na idola kivei kemuni ena yaca ni Kalou, ka na yaco na marau ki na iSoqosoqo oqo, ka na sovaraki yani na vuku kei na kila ka mai na gauna oqo.”⁷ A namaki vei ira na marama me ra tubu cake ki na dua na itagede vou vakalou ka vakavakarau me baleta na cakacaka vakalotu ni matabete ka vakarau me qaravi ena valetabu.

© 2011 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/10. Vakadonui me vakadewa: 6/10. iVakadewa ni Visiting Teaching Message, March 2011. Fijian. 09763 858