Lamharon
Ang Matahum nga Bahin sang isa ka Kagat sang Ido
Sang tig-ilinit sang 2009, ginkagat ako sa nawong sang ido sang akon abyan. Sa malain nga palad, ang kagat naggisi sang akon bibig, kag ginkinahanglan nga tahion ini.
Pagkatapos sang pagkasamad, tuman ang akon kasubo. Gintugotan ko ang kalisud nga mangibabaw sa akon panghuna-huna, kag nagbatyag kasubong nga ang bug-os ko nga kabuhi naguba. Ginakahuya ko ang akon bibig kag indi ko luyag magkadto sa lugar nga madamo sang tawo. Sa akon hunahuna ang akon mga plano parte sa pagpiyano, pagbalibol, pagsimba, paglangoy kag pag-eskwela naguba tanan sa akon pagkasamad.
Apang sa tagsa ka tion nga magpangamuyo ako, magbaton sang mga priesthood blessing, magsugilanon sa akon mga ginikanan, ukon mabisitahan sang akon mga paryente kag kaabyanan, ang akon balatyagon nagamag-an kag mabatyagan ko ang kalipay sa tion sang kasubo. Akon gilayon nahangpan nga kon ang mga tawo nagapanumdum parte sa akon kasamaran, nagabatyag sila sang kaluoy.
Ini nga eksperiyensya nagbulig sa pagpabakod sang akon karakter, kag natun-an ko nga indi magpalibog sang kon ano ang ginapanumdum sang iban nga mga tawo parte sa akon. Nabugayan man ako bangud ang akon pagkasamad nagbulig sa akon nga mahangpan nga dapat ako magpanumdum sing mas diutay sa akon kaugalingon kag magsugod sa pag-ulikid sing dugang sa iban. Ang akon espiritu tuman nga napabakod sa sini nga tion.
Natun-an ko nga ang kalisud kabahin sang plano sang Amay nga Langitnon para sa aton. Kon pangitaon naton ang maayo kag indi ang malain, sarang naton madaug ang kalisud, mangin mas maayo nga tawo, kag matugotan ang eksperiyensya nga magpabakod sang aton panaksihon.